សារព័ត៌មាន នគរវត្ត តែងតែនាំមុខគេជានិច្ច
ខ្សែប្រយុទ្ធ Robert Lewandowski បាននិយាយថា “រឿងរបស់គាត់បានបញ្ចប់” នៅ Bayern Munich ខណៈដែលគាត់ស្វែងរកការផ្លាស់ប្តូរពីម្ចាស់ជើងឯកអាល្លឺម៉ង់នៅរដូវក្តៅនេះ។
Lewandowski នៅសល់កុងត្រាមួយឆ្នាំទៀត ប៉ុន្តែនៅដើមខែនេះប្រធានផ្នែកកីឡារបស់ Bayern Munich លោក Hasan Salihamidzic បាននិយាយថា កីឡាករវ័យ៣៣ឆ្នាំរូបនេះបានបង្ហាញពីបំណងចង់ចាកចេញ។
Lewandowski ត្រូវបានផ្សារភ្ជាប់យ៉ាងខ្លាំងជាមួយនឹងការផ្លាស់ប្តូរទៅកាន់ Barcelona។ គាត់បាននិយាយថា “មានរឿងមួយច្បាស់ណាស់ថ្ងៃនេះ រឿងរបស់ខ្ញុំជាមួយ Bayern Munich គឺចប់ហើយ។
ថ្លែងពីកាតព្វកិច្ចអន្តរជាតិជាមួយប្រទេសប៉ូឡូញកីឡាកររូបនេះបានបន្ថែមថា “បន្ទាប់ពីអ្វីៗបានកើតឡើងក្នុងប៉ុន្មានខែថ្មីៗនេះ ខ្ញុំមិនអាចស្រមៃថានឹងមានកិច្ចសហប្រតិបត្តិការល្អបន្ថែមទៀតនោះទេ។ ខ្ញុំដឹងថា ការផ្ទេរមួយនឹងក្លាយជាដំណោះស្រាយដ៏ល្អបំផុតសម្រាប់ភាគីទាំងពីរ”។
Lewandowski បានចូលរួមជាមួយក្លិប Bayern Munich កាលពីឆ្នាំ២០១៤ ក្រោយពីចាកចេញពី Borussia Dortmund ហើយបានឈ្នះពានរង្វាន់ Bundesliga ចំនួន៨ និង Champions League ក្នុងឆ្នាំ២០២០។
ខ្សែប្រយុទ្ធរូបនេះស៊ុតបញ្ចូលទីបាន៥០គ្រាប់ក្នុង៤៦ប្រកួតសម្រាប់ Bayern Munich ក្នុងរដូវកាលនេះ ហើយបានស៊ុតបញ្ចូលទី៣៤៤គ្រាប់ក្នុង៣៧៥ប្រកួតក្នុងអំឡុងពេលស្នាក់នៅរយៈពេល៨ឆ្នាំរបស់គាត់ ដែលជាចំនួនគ្រាប់បាល់ច្រើនលំដាប់ទី២បន្ទាប់ពីកីឡាករ Gerd Muller នៅក្លិបយក្សអាល្លឺម៉ង់ Bayern Munich ៕
ដោយ៖ ភារៈ(រូបភាព ៖ BBC Sport)
