សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង ៖ មានករណីគ្រោះថ្នាក់ចរាចរណ៍គួរឱ្យរន្ធត់ខណៈបុរសម្នាក់ជិះម៉ូតូបុករថយន្តកុងតឺន័រឈប់ពីក្រោយយ៉ាងពេញទំហឹងបណ្ដាលឱ្យធ្លាយខួរស្លាប់នឹងកន្លែងបង្កការភ្ញាក់ផ្អើលដល់អ្នកភូមិនិងអ្នកធ្វើដំណើរទាំងយប់។
ហេតុការណ៍នេះបានកើតឡើងកាលពីវេលាម៉ោង៧និង៤៥នាទីយប់ថ្ងៃទី៣១ខែឧសភាឆ្នាំ២០២២ស្ថិតនៅលើផ្លូវ៣១៤Dនៅភូមិត្រពាំងឆ្លូញឃុំ ញរស្រុកកំពង់រោទ៍ ខេត្តស្វាយរៀង។
យោងតាមសមត្ថកិច្ចនគរបាលស្រុកបានឱ្យដឹងថាអ្នកស្លាប់មានឈ្មោះ កុយ វ៉ាន ភេទប្រុស អាយុ ៣៥ឆ្នាំមុខរបរកម្មករមានទីលំនៅភូមិព្រៃត្រុំ ឃុំញរ ស្រុកកំពង់រោទ៍ ខេត្តស្វាយរៀង។
ចំណែកអ្នកបើករថយន្តកុងតឺន័រ ស្លាកលេខ ភ្នំពេញ ៣B.៥៧០៩ សណ្ដោងរុឺម៉ក ពាក់ស្លាកលេខ ភ្នំពេញ ៤A.១១៧៦ មិនត្រូវបានស្គាល់អត្តសញ្ញាណនោះទេក្រោយកើតហេតុឃើញសភាពការណ៍មិនស្រួលបានរត់គេចខ្លួនភ្លាមៗ។
តាមសាក្សីបានឱ្យដឹងថាមុនកើតហេតុមានរថយន្តកុងតឺន័រមួយគ្រឿងពាក់ស្លាកលេខ ភ្នំពេញ ៣B.៥៧០៩ សណ្ដោងរុឺម៉ក ពាក់ស្លាកលេខ ភ្នំពេញ ៤A១១៧៦ដោយធ្វើដំណើរពីត្បូងទៅជើងហើយក៏បានឈប់ចតលើផ្លូវខណៈនោះស្រាប់តែមានបុរសម្នាក់បានជិះម៉ូតូមួយគ្រឿងម៉ាកហុងដាឌ្រីម ១២៥ពណ៌ខ្មៅ ផលិតឆ្នាំ២០១៨ ពាក់ស្លាកលេខ ស្វាយរៀង ១K.០៤២៥ក្នុងទិសដៅស្របគ្នាក៏បុកពីក្រោយយ៉ាងពេញទំហឹងបណ្ដាលឱ្យ
ធ្លាយខួរស្លាប់នឹងកន្លែងបង្កការភ្ញាក់ផ្អើលដល់អ្នកភូមិនិងអ្នកធ្វើដំណើរទាំងយប់។
បច្ចុប្បន្នសមត្ថកិច្ចបានវាស់វែងនិងអូសយកវត្ថុតាងម៉ូតូនិងរថយន្តមករក្សាទុក នៅប៉ុស្តិ៍នគរបាលរដ្ឋបាលញរដើម្បី កសាងសំណុំរឿងតាមច្បាប់ រីឯសាកសពត្រូវបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណីទាំងក្ដុកក្ដួលបំផុត ៕
ដោយ៖ យឹម សុថាន
