សារព័ត៌មាន នគរវត្ត តែងតែនាំមុខគេជានិច្ច
កីឡាករលំដាប់ពិភពលោក Rafael Nadal បានបង្ហាញជាថ្មីម្តងទៀត ជាកីឡាករដ៏អស្ចារ្យបំផុតក្នុងប្រវត្តិសាស្ត្រ French Open ដោយបានផ្តួលគូប្រជែងដ៏ខ្លាំង Novak Djokovic ដើម្បីឈានទៅដល់វគ្គពាក់កណ្តាលផ្តាច់ព្រ័ត្រផ្នែកបុរស។
Nadal ដែលនឹងឈ្នះពានជាលើកទី១៤បានចាប់ផ្តើមយ៉ាងល្អ ហើយបានវាយចេញពីការតស៊ូពីក្រុមការពារតំណែងជើងឯក Djokovic ដើម្បីយកឈ្នះក្នុងលទ្ធផល 6-2 4-6 6-2 7-6 (7-4) នៅ Roland Garros។Nadal បានទទួលជ័យជម្នះនៅម៉ោង១និង១៥នាទីម៉ោងក្នុងស្រុកបន្ទាប់ពីប្រកួតរយៈពេលជាង៤ម៉ោងនៅលើទីលាន។
ម្ចាស់ជើងឯក Grand Slam ២១សម័យរូបនេះនឹងត្រូវជួបជាមួយកីឡាករលេខ៣ពិភពលោក Alexander Zverev នៅថ្ងៃសុក្រ ទី៣ ខែមិថុនានេះ។ Zverev អាយុ២៥ឆ្នាំរបស់អាល្លឺម៉ង់បានឈានដល់វគ្គពាក់កណ្តាលផ្តាច់ព្រ័ត្រសម្រាប់២ឆ្នាំជាប់ៗគ្នាបន្ទាប់ពីបានយកឈ្នះកីឡាករ Carlos Alcaraz កាលពីព្រឹកថ្ងៃអង្គារ។
Nadal អាយុ៣៥ឆ្នាំដែលបានថ្លែងអំណរគុណដល់ហ្វូងមនុស្សនៅទីក្រុងប៉ារីសដែលបង្ហាញពី “សេចក្តីស្រឡាញ់” របស់ពួកគេបាននិយាយថា “ដើម្បីឈ្នះជាមួយ Novak មានវិធីតែមួយគត់គឺត្រូវលេងឱ្យអស់ពីសមត្ថភាពពីចំណុចដំបូងដល់ចុងក្រោយ។ នេះគឺជារាត្រីវេទមន្តមួយសម្រាប់ខ្ញុំ”។
ក្រោយចប់ការប្រកួត Djokovic បាននិយាយថា ” Nadal បានបង្ហាញពីមូលហេតុដែលគាត់ជាជើងឯកដ៏អស្ចារ្យ ហើយរក្សាភាពរឹងមាំខាងផ្លូវចិត្ត។ គ្មានការសង្ស័យទេគាត់សមនឹងទទួលបានវា។ គាត់ជាកីឡាករល្អជាងក្នុងគ្រាដ៏សំខាន់ គាត់ចាប់ផ្តើមបានល្អ ហើយខ្ញុំចាប់ផ្តើមមិនសូវបានល្អ។ ខ្ញុំទទួលបានសន្ទុះក្នុងសិតទី២ ហើយខ្ញុំគិតថាខ្ញុំត្រឡប់មកវិញក្នុងការប្រកួតនេះ ប៉ុន្តែគាត់អាចយកកីឡាវាយតឺន្នីសរបស់គាត់ទៅកម្រិតមួយទៀត” ។
គួរបញ្ជាក់ថា ជ័យជម្នះសម្រាប់កីឡាករវាយតឺន្នីសលេខ៥ពិភពលោកNadal គឺបានសងសឹកការបរាជ័យក្នុងវគ្គពាក់កណ្តាលផ្តាច់ព្រ័ត្ររបស់គាត់ដោយ Djokovic កាលពីឆ្នាំមុន និងបានពង្រីកកំណត់ត្រាគ្រប់ពេលរបស់គាត់នៅលើទីលាន Roland Garros ដល់១១០ដងក្នុង១១៣ប្រកួត។ ការប្រកួតរវាងអ្នកទាំងពីរគឺជាការស៊ូទ្រាំបំផុតក្នុងកីឡាវាយតឺន្នីសផ្នែកបុរស ដោយ Nadal បានឈ្នះការជួបគ្នាលើកទី៥៩ ដែលធ្វើឱ្យគាត់កាត់បន្ថយគម្លាតមកត្រឹម៣០-២៩ក្នុងការប្រកួតជាមួយគ្នា ៕
ដោយ៖ ភារៈ(រូបភាព ៖ BBC Sport)
