សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ លោកឧត្តមសេនីយ៍ត្រី ហៀង ស៊ីថា ស្នងការរងផែនការងារសេនាធិការ តំណាងខ្ពង់ខ្ពស់លោកឧត្តមសេនីយ៍ទោ ស ថេង ស្នងការនគរបាលខេត្ត នៅព្រឹកថ្ងៃសុក្រទី១០ ខែមិថុនា ឆ្នាំ២០២២ នៅសាលប្រជុំស្នងការដ្ឋាននគរបាលខេត្ត បានបើកកិច្ចប្រជុំការងារគ្រប់គ្រងវិទ្យុទាក់ទង និងផ្សព្វផ្សាយការងារសំខាន់ៗមួយចំនួន ដែលមានការអញ្ជើញចូលរួមពីលោកនាយ នាយរង ការិយាល័យជំនាញពាក់ព័ន្ធ លោកអធិការ អធិការរង មកពីបណ្តាអធិការដ្ឋាននគរបាលក្រុង.ស្រុក ។
លោកវរសេនីយ៍ឯក ម៉ម ឆៃលី នាយការិយាល័យវិទ្យុទាក់ទង បានប្រាប់ឲ្យដឹងថា ដោយការទំនាក់ទំនងតាមរយៈវិទ្យុទាក់ទងកន្លងមកមានការធ្លាក់ចុះ ដែលបង្កអោយមានការកើនឡើងនូវបទល្មើស នៅតាមមូលដ្ឋាន បណ្តាលមកពីខ្វះវិទ្យុទាក់ទងដែលចាស់ទ្រុឌទ្រោម និងប្រព័ន្ធមានការរអាក់រអួល មានមាត្រដ្ឋានតូច និងប្រើប្រាស់ បានត្រឹមរយៈចម្ងាយជិត ។
ដោយមានការយកចិត្តទុកដាក់ពីសំណាក់លោក ប្រធាននាយកដ្ឋានវិទ្យុទាក់ទង និងលោកស្នងការនគរបាល បានស្នើសុំក្រុមការងារជំនាញវិទ្យុទាក់ទងមកពីប្រទេសដើម្បីកែសម្រួលប្រព័ន្ធឲ្យបានប្រើប្រាស់ឡើងវិញ ។
ក្នុងឱកាសនេះការិយាល័យជំនាញសុំប្រមូលវិទ្យុទាក់ទងប្រើប្រាស់ស៊ីមទាំង៥៨គ្រឿង ជាអំណោយរបស់អតីតអភិបាលខេត្ត ដែលត្រូវចំណាយថវិកាបង់ប្រចាំខែក្នុងការប្រើប្រាស់ មកភ្ជាប់ប្រព័ន្ធ និងបង្កើត Chanel ប្រើប្រាស់នៅតាមអង្គភាព ។
លោកឧត្តមសេនីយ៍ត្រី ហៀង ស៊ីថា ស្នងការរង បានមានប្រសាសន៍យល់ស្របតាមលោកនាយការិយាល័យជំនាញ ក្នុងការពង្រឹងការប្រើប្រាស់វិទ្យុទាក់ទងឡើងវិញ នឹងបានផ្សព្វផ្សាយដល់អធិការដ្ឋានទាំងអស់ពន្លឿនការធ្វើរបាយការណ៍លើកិច្ចការងារផ្តល់ថវិកាការងារការពារបោះឆ្នោត ផែនការសកម្មភាព និងរបាយការណ៍បូកសរុបលទ្ធផលការងារឆ្នាំ២០២១ របាយការណ៍ប្រជុំប្រចាំខែ បញ្ជីវត្តមាននៅតាមអង្គភាព ផែនការសកម្មភាពសម្រាប់ឆ្នាំ២០២២ និងលទ្ធផលការងារប្រចាំឆមាសទី១ ឆ្នាំ២០២២ ។
ទន្ទឹមនឹងនេះ ត្រូវពង្រឹងបន្ថែមទៀតលើការងារប្រយុទ្ធប្រឆាំងគ្រឿងញៀន តម្លើងបញ្ជីក្មេងទំនើង ដើម្បីឆ្លើយតបក្នុងការបង្ការ ទប់ស្កាត់ និងបង្ក្រាប បានទាន់ពេលវេលា ក្តាប់សភាពការណ៍សន្តិសុខទាំងចំហរ និងសម្ងាត់ រាល់គ្រប់សកម្មភាពគណៈបក្សនយោបាយ និងត្រៀមលក្ខណៈទទួលនូវការមកដល់នៃព្រឹត្តិការណ៍ SEAGAME 2023 និងការងារបោះឆ្នោតជ្រើសតាំងតំណាងរាស្ត្រ ឆ្នាំ២០២៣ ៕
ដោយ៖សហការី
