ក្រសួងបរិស្ថាន​ និងអង្គការដៃគូផ្នែកអភិរក្សបន្តរៀបចំយុទ្ធនាការអន្ទាក់សូន្យនៅខេត្តក្រចេះ

ខេត្ត​ក្រចេះ ​៖​ បេី​យោង​តាមប្រភពព័ត៌មានពី​ក្រសួង​បរិស្ថាន​ បានឱ្យដឹង​ថា៖​ «យុទ្ធនាការអន្ទាក់សូន្យក្នុងតំបន់ការពារធម្មជាតិ» ដឹកនាំដោយក្រសួងបរិស្ថាន​ នឹងប្រារព្ធនៅទីរួមខេត្តក្រចេះ​ នៅថ្ងៃទី១៨ ខែមិថុនា​ ឆ្នាំ​២០២២នេះ​ ក្រោមអធិបតីភាពលោក នេត្រ ភក្ត្រា រដ្ឋលេខាធិការក្រសួងបរិស្ថាន ដោយមានការចូលរួមពីតំណាងរដ្ឋបាលខេត្តក្រចេះ មន្ទីរជំនាញចំណុះរដ្ឋបាលខេត្ត អង្គការអភិរក្សនានានិងប្រជាពលរដ្ឋ។ 

ក្រសួង​បរិស្ថាន​ បានបន្ថែមថា​ ខេត្តក្រចេះគឺជាខេត្តទី៣ ដែលក្រសួងបរិស្ថាននិងអង្គការដៃគូបានរៀបចំយុទ្ធនាការអន្ទាក់សូន្យក្នុងកិច្ចខិតខំប្រឹងប្រែងដើម្បីផ្សព្វផ្សាយពីផលប៉ះពាល់បង្កឡើងដោយអន្ទាក់ និងការខិតខំប្រឹង ប្រែងរកដំណោះស្រាយ ដើម្បីទប់ស្កាត់ការដាក់អន្ទាក់នៅក្នុងតំបន់ការពារធម្មជាតិ និងផ្តល់ទីជម្រកសុវត្ថិភាពដល់សត្វព្រៃ និងមនុស្ស។ 

ក្នុងក្របខណ្ឌនៃយុទ្ធនាការអន្ទាក់សូន្យនេះ លោក នេត្រ ភក្ត្រា រដ្ឋលេខាធិការក្រសួងបរិស្ថានបានដឹកនាំធ្វើសន្និសីទសារព័ត៌មានដោយមានការចូលរួមពីតំណាងអង្គការសមាគមអភិរក្សសត្វព្រៃកម្ពុជា WCS អង្គការ WWF អង្គការ WEA អង្គការអភិរក្សអន្តរជាតិ CI អង្គការ RECOFTC និងអង្គការជីវិតធម្មជាតិកម្ពុជា Nature Life ដោយបានបង្ហាញពីជំហានវិជ្ជមាននៃយុទ្ធនាការអន្ទាក់សូន្យនាពេលកន្លងមកដោយទទួលបានការគាំទ្រខ្ពស់ពីគ្រប់មជ្ឈដ្ឋាន និងការតាំងចិត្តខ្ពស់របស់ភាគីពាក់ព័ន្ធក្នុងការធ្វើឱ្យយុទ្ធនាការអន្ទាក់សូន្យនេះទទួលបានជោគជ័យ អន្ទាក់ត្រូវបានកាត់បន្ថយនៅក្នុងតំបន់ការពារធម្មជាតិ៕

ដោយ​៖សហការី​