សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ អគ្គលេខាធិការរង និងជាអ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) លោក សោម សូរីដា បានមានប្រសាសន៍ នៅរសៀលថ្ងៃទី ១២ ខែកក្កដានេះថា ករណីអនុប្រធានគណបក្សភ្លើងទៀនប្រមាថស្ថាប័នជាតិមួយថា ជាចោរ មិនមែនជារឿងសាមញ្ញ ហើយក៏មិនមែនជាការបញ្ចេញមតិដែរ។ ដូច្នេះ ត្រូវតែដោះស្រាយគ្នាតាមយន្តការតុលាការពោលគឺមិនអាចសុំទោសបានឡើយ។
ការលើកឡើងលោក សោម សូរីដា បែបនេះ ជាការឆ្លើយតបចំពោះការលើកឡើងរបស់លោក សុន ឆ័យ ដែលបានថ្លែងប្រាប់អ្នកសារព័ត៌មាន ក្រោយពីចាកចេញពីសាលាដំបូងរាជធានីភ្នំពេញនៅព្រឹកថ្ងៃទី១២ ខែកក្កដានេះថា លោកសម្តែងការសោកស្តាយដែល គ.ជ.ប បានលើកយកករណីរបស់លោកទៅតុលាការ។ លោកថា ករណីនេះ គ.ជ.ប គួរតែមានការពន្យល់មួយ។
លោក សោម សូរីដា បញ្ជាក់ថា «ការប្រមាថស្ថាប័នជាតិថា ជាចោរ គឺជាការប្រមាថមួយ ដែលមិនអាចគិតថា ជារឿងធម្មតាដែលត្រូវហៅអ្នកប្រមាថមកចរចាឬជជែកគ្នារកខុសរកត្រូវនោះទេ។ករណីលោក សុន ឆ័យ ប្រមាថ ជាសាធារណៈ និងបរិហារកេរ្តិ៍ជាសាធារណៈនេះ ខ្ញុំសូមបញ្ជាក់ថា មិនមែនជាការបញ្ចេញមតិ ដែល គ.ជ.ប ត្រូវអញ្ជើញលោក សុន ឆ័យ មករកខុសរកត្រូវជាមួយ គ.ជ.ប នោះទេ អីចឹងករណីនេះ គឺជាករណីដែលត្រូវដោះស្រាយគ្នាតាមយន្តការតុលាការ»។
លោក សោម សូរីដា បានបន្ថែមថា បើលោក សុន ឆ័យ គិតថាការប្រមាថ គ.ជ.ប ថា ជាចោរបែបនេះ ហើយថា គឺជារឿងធម្មតានោះ លោកស្មានខុសហើយ គិតខុសហើយ។ អ្នកនាំពាក្យ គ.ជ.ប បានបន្ថែមថា លោក សុន ឆ័យ គួរតែចេះថ្លឹងថ្លែងអំពីពាក្យពេចដ៏ ការប្រើប្រាស់ភាសាខ្មែរ ដែលគួរតែប្រើក្នុងន័យមួយ គោរពគ្នាទៅវិញ ទៅមក រវាងបុគ្គលដែលជាថ្នាក់ដឹកនាំគណបក្សនយោ បាយ ជាមួយស្ថាប័នជាតិមួយ ដែលមានចែងនៅក្នុងរដ្ឋធម្មនុញ្ញ។
លោកបានបន្តថា ដោយឡែកការលើកឡើង របស់លោក សុន ឆ័យ ថា ការប្តឹងនោះ ជាការធ្វើឲ្យខាតពេលវេលារបស់លោកនោះ វាគ្រាន់តែជាការលើកឡើង ដើម្បីបន្ថយនូវទោសកំហុសទៅសាធារណជនប៉ុណ្ណោះ។ ប៉ុន្តែកិច្ចការនេះ មិនសាមញ្ញដូចលោក សុន ឆ័យ គិតនោះទេ លោក សុន ឆ័យ គួរពិចារណាឡើងវិញពីពាក្យសម្ដីរបស់ខ្លួន។
គួររំលឹកថា កាលពីព្រឹកថ្ងៃទី ១២ ខែកក្កដា ឆ្នាំ ២០២២នេះ លោក សុន ឆ័យ អនុប្រធានគណបក្សភ្លើងទៀន បានចូលឆ្លើយបំភ្លឺលើបណ្តឹង របស់គណៈកម្មាធិការជាតិរៀបចំការបោះឆ្នោត (គ.ជ.ប) ពីបទបរិហារកេរ្តិ៍ជាសាធារណៈ ដែលបណ្តឹងនេះ គ.ជ.ប បានស្នើឲ្យតុលាការផ្តន្ទាទោសលោក សុន ឆ័យ តាមមាត្រា ៣០៥ នៃក្រមព្រហ្មទណ្ឌ និងធ្វើលិខិតសុំទោសជាសាធារណៈ។
មកដល់ពេលនេះ លោក សុន ឆ័យ ទទួលរងបណ្តឹងចំនួន ២ គឺ ទី១, បណ្តឹងពាក់ព័ន្ធការចោទនិងការបំភ្លៃព័ត៌មានជុំវិញដំណើរការបោះឆ្នោតជ្រើសរើសក្រុម ប្រឹក្សាឃុំ-សង្កាត់ អាណត្តិទី ៥ ដែលត្រូវបានចាត់ទុកជាអំពើទុច្ចរិត, បំភ្លៃខុសពីការពិត, ការផ្តល់ព័ត៌មានក្លែងក្លែង ក្នុងចេតនាទម្លាក់កំហុសដោយអសុទ្ធចិត្ត និងមួលបង្កាច់នាំឲ្យប៉ះពាល់យ៉ាងធ្ងន់ធ្ងរធ្ងរ ដល់កិត្តិយសរបស់គណបក្សប្រជាជនកម្ពុជា ហើយបណ្តឹងនេះ មេធាវីបានទាមទារសំណងជំងឺចិត្តចំនួន ៤.០០០លាន រៀល ឬប្រហែល ១លានដុល្លារអាមេរិក។ ទី២, បណ្តឹងពីបទបរិហារកេរ្តិ៍ជាសាធារណៈ របស់ស្ថាប័នគ.ជ.ប ដែលបណ្តឹងនេះ បានស្នើឲ្យតុលាការផ្តន្ទាទោសលោក សុន ឆ័យ តាមមាត្រា ៣០៥ នៃក្រមព្រហ្មទណ្ឌ និងស្នើឲ្យលោក សុន ឆ័យ ធ្វើលិខិតសុំទោសជាសាធារណៈ៕
ដោយ៖ សូរិយា
