សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប ៖ ទើបទទួលបានសេចក្តីរាយការណ៍ពីការកើនឡើងនៃកម្ពស់ទឹកនៅក្នុងតំបន់ខ្លះក្នុងឃុំឃុនរាម ក្រោយពីមានភ្លៀងធ្លាក់យ៉ាងជោកជាំអស់រយៈពេលជាច្រើនថ្ងៃ ដែលធ្វើឱ្យផ្នែកខ្លះនៃផ្លូវក្រួសក្រហមក្នុងឃុំត្រូវបានទឹកហូរឆ្លងកាត់ និងជន់លិចផ្ទះបងប្អូនប្រជាពលរដ្ឋមួយចំនួន។ សូមបងប្អូនប្រជាពលរដ្ឋនៅក្នុងស្រុកបន្ទាយស្រីជាពិសេសអ្នករស់នៅតាមបណ្តោយដងស្ទឹង និងតាមជ្រលងមុខទឹកនៅតាមជើងភ្នំគូលែន បង្កើនការប្រុងប្រយ័ត្នខ្ពស់ ចំពោះហានិភ័យនៃជំនន់ទឹកភ្លៀងគំហុក(Flash Flood) ជាពិសេសប្រសិនបើភ្លៀងនៅតែបន្តធ្លាក់ខ្លាំងជាប់ៗគ្នាជាច្រើនថ្ងៃទៅមុខទៀត។ នេះជាការថ្លែងរបស់លោក ឃឹម ហ្វុីណង់ អភិបាលនៃគណៈអភិបាលស្រុកបន្ទាយស្រី ខេត្តសៀមរាប នៅល្ងាចថ្ងៃទី១៣ ខែកក្កដា ឆ្នាំ២០២២ ។
លោកអភិបាលស្រុកបន្ទាយស្រីបានបន្តថា បន្ទាយស្រីគឺជាស្រុកដែលមានផ្ទៃរងទឹកភ្លៀងនៃទីជម្រាលជើងភ្នំគូលែនយ៉ាងវែង លាតសន្ធឹងពីព្រំប្រទល់ខាងកើតរហូតដល់ព្រំប្រទល់ខាងលិច ដែលដើរតួនាទីដូចជា”ទ”ទឹកភ្លៀងដ៏ធំចាក់បញ្ចូលទឹកភ្លៀងទាំងអស់មកក្នុងស្រុក ងាយនឹងបង្កជាហានិភ័យគ្រោះជំនន់ទឹកភ្លៀង ប្រសិនបើមានភ្លៀងធ្លាក់ជាប់ៗគ្នាច្រើនថ្ងៃដូចដែលធ្លាប់កើតមានឡើងក្នុងឆ្នាំ២០១១ និងឆ្នាំ២០២០។
លោកអភិបាលស្រុកបានអរគុណបងៗកងកម្លាំងដែលបានចុះទៅពិនិត្យដល់ទីកន្លែងភ្លាមៗ និងបានរាយការណ៍មកលោក។ រដ្ឋបាលស្រុកបន្ទាយស្រីនឹងបន្តឃ្លាំមើល និងប្រុងប្រៀបកម្លាំងនិងសម្ភារបម្រុងជួយអន្តរាគមន៍ក្នុងករណីដែលកើតមានគ្រោះទឹកជំនន់ជាយថាហេតុណាមួយ៕
ដោយ ៖ សិលា
