សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ធំ ៖ កម្លាំងបរិស្ថាន នៃស្នាក់ការអូរងាវបានឆ្មក់ចាប់បានរថយន្តយីឌុប លួចដឹកជញ្ជូនផលអនុផលព្រៃឈើខុសច្បាប់ចេញពីដែនបរិវេណព្រៃឡង់ ត្រង់ចំណុចច្រកជាំស្វាយ ស្ថិតនៅភូមិសំអោង ឃុំមានរិទ្ធ ស្រុកសណ្តាន់ ខេត្តកំពង់ធំ កាលពីថ្ងៃទី២០ ខែកក្កដា ឆ្នាំ២០២២នេះ។
យោងតាមការឱ្យដឹងពីមន្ត្រីបរិស្ថានបានខ្សឹបប្រាប់ឱ្យដឹងនាយប់ថ្ងៃកើតហេតុថា ករណីនេះគឺមន្ត្រីជំនាញបានទទួលព័ត៌មានពីប្រជាពលរដ្ឋថា មានរថយន្តលួចដឹកជញ្ជូនផលអនុផលព្រៃឈើ ដោយបានបំលែងរូបភាព តាមរយៈគោយន្តកន្រ្តៃ ហើយលើកមកដាក់រថយន្តយីឌុបដើម្បីបន្លំភ្នែកសមត្ថកិច្ចជំនាញ ។
មន្ត្រីបរិស្ថានបានបន្តថា រថយន្តប្រភេទយីឌុបមានស្លាកក្បាល កំពង់ចាម 3A-4601 កន្ទុយមានស្លាកលេខ កំពង់ចាម 4A-1074 ពណ៌ខៀវ លាយពណ៌ស ផ្ទុកឈើប្រភេទលេខ២ សន្និដ្ឋានប្រមាណជា២០ម៉ែត្រគូប ។
បច្ចុប្បន្ននេះរថយន្ត និងវត្ថុតាងទាំងអស់ត្រូវបានមន្ត្រីបរិស្ថានអូរងាវយកទៅរក្សាទុកនៅឯស្នាក់ការ ចំណែកម្ចាស់ និងតៃកុងរថយន្តបានរត់គេចបានស្រមោល ។
លោក តុប កក្កដា ប្រធានមន្ទីរបរិស្ថានខេត្តកំពង់ធំបានឱ្យដឹងនាថ្ងៃទី២២ ខែកក្កដានេះថា បញ្ហាខាងលើនេះ គឺកម្លាំងមន្ត្រីជំនាញបានធ្វើការស្រាវជ្រាវជាច្រើនថ្ងៃ ហើយករណីនេះគឺម្ចាស់ឈើជាគ្រូបង្រៀននៅស្រុកបារាយណ៍ បានកាន់ចំណារពីថ្នាក់ដឹកនាំ១រូប ក្នុងចំណារនេះគឺដោយស្នើសុំទិញឈើ មកធ្វើផ្ទះចំនួន៣០ម៉ែត្រគូបប៉ុណ្ណោះ កាលពីខែកុម្ភៈ ឆ្នាំ២០២២មកម្ល៉េះ លោកក៏បានអនុញ្ញាត និងការដឹកជញ្ជូនចុះ តែឱ្យដឹកតែម្តងប៉ុណ្ណោះ ព្រោះអីក្នុង និងឯកសារផ្សេងៗ ចំណារគឺអនុញ្ញាតតែម្តងប៉ុណ្ណោះ។
លោកប្រធានមន្ទីរបរិស្ថានខេត្តបានបន្តថា សកម្មភាពនេះលោកបានស្រាវជ្រាវឃើញថា បានយកចំណារថ្នាក់ដឹកនាំក្នុងដៃ មកដឹកជញ្ជូនឈើខុសច្បាប់ប្រហែលជា ៣ដងមកហើយ រូបលោកក៏បានដឹងថា មានការឃុបឃិតថ្នាក់ក្រោមៗ ប៉ុន្តែពេលនេះលោកមិនអាចលើកលែងឡើយ ។
លោកបានបញ្ជាក់ថា បញ្ហាឈើខាងលើនេះ ក្នុងសន្ឋិដ្ឋានឈើប្រហែលជាង ១៥ម៉ែត្រគូប ក្នុងរថយន្តយីឌុបវេអ័ង ប្រភេទឈើវិញនោះមិនទាន់ដឹងថាប្រភេទឈើអ្វីដែរ ។ បច្ចុប្បន្ននេះ រថយន្តខាងលើនេះបានយកមករក្សាទុកនៅស្នាក់ការអូរងាវ ស្រុកសណ្តាន់ បណ្តោះអាសន្ន និងស្រាវជា្រវរកម្ចាស់ឈើណាពិតប្រាដក ដើម្បីចាត់ការតាមនីតិវិធីច្បាប់ ។
យោងតាមប្រភពបានបង្ហើបឱ្យដឹងថា កាលពីកន្លងមកនេះប្រហែលជាថ្ងៃ ១០មុន មានបុគ្គល២នាក់ បានយកចំណារថ្នាក់ដឹកនាំទៅជួបខាងមន្ត្រីជំនាញ ខាងជើងបឹងទន្លេសាប ដើម្បីសុំការអនុញ្ញាតដឹកជញ្ជូនឈើ ពីស្រុកសណ្តាន់ តែខាងមន្ត្រីជំនាញមិនបានអនុញ្ញាតទេ។
ប្រភពដដែលបានបង្ហើបថា បុគ្គលឈ្មោះ ប៉ិច ជាមន្ត្រីកងរាជអាវុធហត្ថស្រុកបារាយណ៍ និងគ្រូបង្រៀន បានកាន់ឯកសារ និងចំណារថ្នាក់ដឹកនាំ មកបន្លំភ្នែកមន្ត្រីជំនាញ និងមហាជន ដើម្បីយកធ្វើជាប្រយោជន៍ផ្ទាល់ខ្លួនប៉ុណ្ណោះ។
បើយោងតាមប្រភពច្បាស់ការបានបង្ហើបថា ឈើក្នុងរថយន្តនោះ មានឈ្មួញឈើឈ្មោះ ស៊ីណា កូនប្រសាឈ្មោះ ម៉េង ដែលមានលំនៅដ្ឋាននៅកែងអូរល្អក់ ផ្សារ៩៩ ក្នុងភូមិអូរពកសាមគ្គី ឃុំមានរិទ្ធ ស្រុកសណ្តាន់ ។
សូមបញ្ជាក់ថា រថយន្តខាងលើនេះបានទិញ និងដឹកជញ្ជូនឈើពីប្រជាពលរដ្ឋបានលួចកាប់ចេញពីតំបន់អភិរក្សព្រៃឡង់ ដែលគ្រប់គ្រងដោយមន្ត្រីបរិស្ថានខេត្តកំពង់ធំ ៕
ដោយ៖ចន្ទ លីហ្សា
