សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង៖ ពិរុទ្ធជនម្នាក់ ជាមុខសញ្ញាគ្រឿងញៀន និងឆែកឆេររកឃេីញថ្នាំញៀនម៉ាកWY ជិត២០០គ្រាប់ ត្រូវបានកម្លាំងផ្នែកប្រឆាំងគ្រឿងញៀន នៃអធិការដ្ឋាននគរបាលស្រុកភ្នំព្រឹកអនុវត្តដីកាបង្គាប់ឱ្យចាប់ឃាត់ខ្លួន ដើម្បីបញ្ជូនខ្លួនទៅសាលាដំបូងខេត្តបាត់ដំបង ចាត់ការតាមច្បាប់។
បេីយោងតាមការបញ្ជាក់ពីលោកវរសេនីយ៍ទោ ហេង បារាំងអធិការនគរបាលស្រុកភ្នំព្រឹក បានឱ្យដឹងនៅព្រឹកថ្ងៃអាទិត្យទី២៤ ខែកក្កដា ឆ្នាំ២០២២នេះថា៖ លោកបានដឹកនាំកម្លាំងផ្នែកប្រឆាំងគ្រឿងញៀនស្រុក កាលពីថ្ងៃទី២៣ ខែកក្កដាម្សិលមិញនេះ នៅចំណុចភូមិអូរ ឃុំពេជ្រចិន្ដា ស្រុកភ្នំព្រឹក ខេត្តបាត់ដំបង ចុះអនុវត្តដីកាបង្គាប់ឱ្យចាប់ខ្លួន លេខ ៣២៥ ត.ព្រ ចុះថ្ងៃទី១៣ ខែឧសភា ឆ្នាំ២០២២ របស់ ឯកឧត្តម ជា វណ្ណៈ ចៅក្រមជំនុំជម្រះ នៃសាលាដំបូងខេត្តបាត់ដំបង ដោយបង្គាប់ឱ្យចាប់ខ្លួនឈ្មោះ រឹម ចាន់ណាភេទប្រុស អាយុ ៣២ ឆ្នាំមានទីលំនៅភូមិអូរ ឃុំពេជ្រចិន្ដា ស្រុកភ្នំព្រឹក ខេត្តបាត់ដំបង ជាប់ចោទពីបទជួញដូរដោយខុសច្បាប់នូវសារធាតុញៀន ប្រព្រឹត្តនៅចំណុចភូមិអូរ ឃុំពេជ្រចិន្ដា ស្រុកភ្នំព្រឹក ខេត្តបាត់ ដំបង កាលពីថ្ងៃទី៣០ ខែសីហា ឆ្នាំ២០២១ ។
ក្នុងកិច្ចប្រតិបត្តិការនេះដោយមានការអនុញ្ញាតពីលោក កែវ សុជាតិ ព្រះរាជអាជ្ញា នៃអយ្យការអមសាលាដំបូងខេត្តបាត់ដំបង ផងនោះសមត្ថកិច្ចបានធ្វេីការឆែកឆេរ និងដកហូតវត្ថុតាងរួមមាន៖
-ថ្នាំគ្រាប់រាងមូលសំប៉ែត ពណ៌ស្លាទុំ មានអក្សរបរទេសនៅលេីគ្រាប់ថ្នាំ សញ្ញាWY ចំនួន ១៧៧គ្រាប់ សង្ស័យជាសារធាតុញៀន និងទូរស័ព្ទដៃ ម៉ាកOPPO ចំនួន ០១គ្រឿង(ចាស់) ។
បច្ចុប្បន្នជនត្រូវចោទ និងវត្ថុតាងខាងលេី នៅព្រឹកថ្ងៃអាទិត្យទី២៤ ខែកក្កដានេះ បានកសាងសំណុំរឿងបញ្ជូនមកការិយាល័យជំនាញ នៃស្នងការដ្ឋាននគរបាលខេត្ត ដេីម្បីចាត់ការបន្តតាមនីតិវិធី៕
ដោយ៖អារុណរះ
