សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បានបែកក្បាលស្លាប់ក្នុងថ្លុកឈាមនិងម្នាក់ទៀតរងរបួសធ្ងន់ បន្ទាប់ពីជិះម៉ូតូឌុបគ្នាលឿនដូចហោះជ្រុលទៅបុករថយន្តបែនដឹកខ្សាច់ដែលចតស្ងៀមលើចិញ្ចើមផ្លូវពេញទំហឹង កាលពីវេលាម៉ោង១១និង៣០នាទីយប់ថ្ងៃសៅរ៍ទី៦ ខែសីហា ឆ្នាំ២០២២ ស្ថិតនៅតាមបណ្ដោយផ្លូវជាតិលេខ៦A ត្រង់ចំណុចមុខបន្ទាយទាហានជើងទឹក ក្នុងភូមិកៀនឃ្លាំង សង្កាត់ជ្រោយចង្វា ខណ្ឌជ្រោយចង្វា។
សពជនរងគ្រោះមានឈ្មោះ ភា អាយុជាង៣០ឆ្នាំ មានស្រុកកំណើតនៅខេត្តបាត់ដំបង។
យោងតាមប្រភពពីកន្លែងកើតហេតុបានឱ្យដឹងថា មុនពេលកើតហេតុគេឃើញបុរសរងគ្រោះជិះម៉ូតូធុនធំមួយគ្រឿងពាក់ស្លាកលេខភ្នំពេញ1HW- 6105 ដោយឌុបបុរសម្នាក់ទៀតធ្វើដំណើរក្នុងទិសដៅពីកើតទៅលិចបោះពួយយ៉ាងលឿន ខណៈមកដល់ចំណុចកើតហេតុខាងលើបានជ្រុលទៅបុករថយន្តបែនដឹកខ្សាច់ពាក់ស្លាកភ្នំពេញ3A-8438 ដែលកំពុងឈប់លើចិញ្ចើមផ្លូវពីក្រោយពេញទំហឹង បណ្ដាលឱ្យអ្នកបើកម៉ូតូស្លាប់ភ្លាមៗ និងអ្នករួមដំណើររងរបួសធ្ងន់ត្រូវរថយន្តសាមុយដឹកយកទៅសង្គ្រោះនៅមន្ទីរពេទ្យ។
ក្រោយកើតហេតុ គេឃើញមានវត្តមានសមត្ថកិច្ចមូលដ្ឋានចុះមកចំណុចកើតហេតុហើយបានទាក់ទងបន្តទៅសមត្ថកិច្ចជំនាញមកធ្វើករវាស់វែងយកម៉ូតូនិងរថយន្តទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយតាមផ្កូវច្បាប់។ ចំណែកសពជនរងគ្រោះត្រូវបានសមត្ថកិច្ចធ្វើកំណត់ហេតុរួចប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណី៕
ដោយ ៖ ភារ៉ា ដង្កោ
