រថយន្តកាមរីស្វិតបុករថយន្តហ្វដ រ៉េនជើរ រងការខូចខាតយ៉ាងដំណំ

ភ្នំពេញ ៖ បុរសម្នាក់បើករថយន្តកាមរីស្វិតបត់ខ្វះការប្រុងប្រយ័ត្នបានជ្រុលទៅបុករថយន្តហ្វដ រ៉េនជើរមួយគ្រឿងទៀតបណ្តាលឱ្យរងការខូចខាតយ៉ាងដំណំ។

    ហេតុការណ៍គ្រោះថ្នាក់ចរាចរណ៍នេះបង្កការភ្ញាក់ផ្អើលកាលពីវេលាម៉ោង៧ និង៤០នាទីព្រឹកថ្ងៃទី១៦ ខែសីហា ឆ្នាំ២០២២ ស្ថិតនៅតាមបណ្ដោយផ្លូវបេតុង ក្នុងសង្កាត់គោកឃ្លាង ខណ្ឌសែនសុខ រាជធានីភ្នំពេញ។

    តាមប្រភពព័ត៌មាននៅកន្លែងកើតហេតុបានឱ្យដឹងថា មុនពេលកើតហេតុគេឃើញរថយន្ត FORD RANGER ពណ៌បៃតង ពាក់ស្លាកលេខភ្នំពេញ2AH- 6759 បើកបរដោយបុរសម្នាក់ក្នុងទិសដៅពីត្បូងទៅជើង លុះមកដល់ត្រង់ចំណុចកើតហេតុផ្លូវបែកជាបួនក៏បានបើកបត់ស្ដាំស្រាប់តែត្រូវរថយន្តកាមរីស្វិតមួយគ្រឿង ពណ៌ស លាយខៀវ ពាក់ស្លាកលេខភ្នំពេញ 2N-0108 បើកបរដោយបុរសម្នាក់ធ្វើដំណើរតាមបណ្ដោយផ្លូវបេតុងក្នុងទិសដៅពីកើតទៅលិចហើយបត់ស្ដាំក៏ជ្រុលទៅបុករថយន្តFORD RANGER បណ្ដាលឱ្យរងការខូចខាតទ្វារចំហៀងខាងឆ្វេង តែសំណាងល្អមិនបណ្ដាលឱ្យមានអ្នកណាម្នាក់រងរបួសនោះទេ ។

    ក្រោយកើតហេតុសមត្ថកិច្ចមូលដ្ឋានបានមកដល់ ហើយបានឱ្យភាគីទាំងពីរធ្វើការសម្រុះសម្រួលគ្នា ដោយភាគីខាងរថយន្តបង្កយល់ព្រមយករថយន្តរងគ្រោះទៅជួសជុលដើម្បីបញ្ចប់រឿងនៅនឹងកន្លែងកើតហេតុ៕

ដោយ៖ និន សុភ័ស្ត