សារព័ត៌មាន នគរវត្ត តែងតែនាំមុខគេជានិច្ច
នេះជាលើកទីបីហើយដែលរុស្ស៊ី បើកវេទិកាបច្ចេកទេសយោធាអន្តរជាតិ Army – 2022 និងកីឡាយោធាអន្តរជាតិ Army games 2022 ដែលបានបើកជាផ្លូវការនៅរមណីយដ្ឋាន Patriot នៃកម្លាំងប្រដាប់អាវុធសហភាពរុស្ស៊ី។
នៅក្នុងក្របខ័ណ្ឌព្រឹត្តិការណ៍កីឡាយោធា Army games 2022 ដែលបានចាប់ផ្តើមឡើងនៅថ្ងៃទី១៣ខែសីហាឆ្នាំ២០២២ ក្នុងតំបន់ទីលាន Alabino ជាយក្រុងមូស្គូ ប្រទសរុស្ស៊ី ។ នៅក្នុងពិធីប្រកួតកីឡាយោធានោះក៏មាន ការប្រកួតរថក្រោះផងដែរ។
នៅថ្ងៃទី១៥ខែសីហា ក្នុងរមណីយដ្ឋាន Patriot ថ្នាក់ដឹកនាំនៃក្រសួងការពារជាតិ ប្រមុខដឹកនាំយោធា អ្នកជំនាញមកពីបណ្តាប្រទេសជុំវិញពិភពលោកបានមកចូលរួម បើទោះបីស្ថានភាពបច្ចុប្បន្ន មានភាពស្មុគស្មាញដោយសារសង្គ្រាមនៅអ៊ុយក្រែនយ៉ាងណាក្តី។
នេះជាលើកទីបីជាប់គ្នាហើយដែលពិធីដ៏សំខាន់នេះបានរៀបចំឡើងនៅរមណីយដ្ឋានយោធា Patriot ក្នុងប្រទេសរុស្ស៊ី។ នៅក្នុងឆ្នាំនេះ ពិធីត្រូវបានអូសបន្លាយរហូតដល់ថ្ងៃទី២១ខែសីហា ដោយមានក្រុមហ៊ុនឧស្សាហកម្មការពារជាតិ ប្រមាណ១៥០០ក្រុមហ៊ុនមកពីជុំវិញពិភពលោកបានណែនាំពីផលិតផលយោធារបស់ខ្លួន ដែលមានដល់ទៅ២៨.០០០ប្រភេទ។
ជាមួយគ្នានេះដែរ អាវុធទំនើបៗជាច្រើនរបស់រុស្ស៊ី នឹងត្រូវបានបង្ហាញនៅក្នុងរមណីយដ្ឋាន Patriot ជាយក្រុងមូស្គូ និងនៅអាកាសយានដ្ឋានយោធា Kubinka និងទីលានAlabino៕
ដោយ៖ ធីរីណា(រូបថត ៖ ក្រសួងការពារជាតិរុស្ស៊ី)
