សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ លោក កើត រិទ្ធ រដ្ឋមន្ត្រីក្រសួងយុត្តិធម៌ អមដោយថ្នាក់ដឹកនាំក្រសួងយុត្តិធម៌ នៅរសៀលថ្ងៃពុធ ៥រោច ខែស្រាពណ៍ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៧ ខែសីហា ឆ្នាំ២០២២ បានអនុញ្ញាតឱ្យបេក្ខជន បេក្ខនារី ជ័យលាភីអាហារូបករណ៍ប្រទេសជប៉ុនសម្រាប់ការអភិវឌ្ឍធនធានមនុស្ស (JDS) ឆ្នាំសិក្សា ២០២២-២០២៤ ចំនួន ២៤ រូប ចូលជួបសំដែងការគួរសម និងទទួលអនុសាសន៍ណែនាំដ៏ខ្ពង់ខ្ពស់ពី លោករដ្ឋមន្ត្រី មុនពេលចេញដំណើរទៅបន្តការសិក្សានៅប្រទេសជប៉ុន។
នៅក្នុងជំនួបនេះ លោករដ្ឋមន្ត្រី បានធ្វើការកោតសរសើរ និងវាយតម្លៃខ្ពស់ចំពោះការខិតខំប្រឹងប្រែងរបស់ បេក្ខជន-បេក្ខនារី ទាំងអស់ ក្នុងការប្រកួតប្រជែងរហូតក្លាយជាជ័យលាភីអាហារូបករណ៍ ទៅបន្តការសិក្សានៅប្រទេសជប៉ុន។ ទន្ទឹមនេះ លោករដ្ឋមន្រ្តី, លោក ជិន ម៉ាលីន រដ្ឋលេខាធិការ, លោក កេង សុម៉ារិទ្ធ រដ្ឋលេខាធិការ និងលោក តាន់ ហ៊ាងដាវ័ណ្ណ អគ្គនាយកនៃក្រសួងយុត្តិធម៌ បានចែករំលែកបទពិសោធន៍ផ្ទាល់ខ្លួន ក្នុងនាមជាអតីតនិសិ្សតអាហាររូបករណ៍ដែលបានទៅសិក្សានៅបរទេស និងបានផ្តាំផ្ញើដល់ជ័យលាភីទាំងអស់ឱ្យខិតខំសិក្សារៀនសូត្រ ក្រេបជញ្ជក់ចំណេះដឹងពីបរទេស ដើម្បីចូលរួមជាកម្លាំងចលករក្នុងការអភិវឌ្ឍប្រទេសជាតិ។
ជាចុងក្រោយ លោករដ្ឋមន្រ្តី បានផ្តាំផ្ញើដល់ជ័យលាភីទាំងអស់ ឱ្យចេះរួមសាមគ្គីគ្នា និងជួយយកអាសាគ្នាទៅវិញទៅមក ដូចពាក្យស្លោកដែលពោលថា «ចង្កឹះមួយគេកាច់បាក់ ចង្កឹះមួយបាច់គេកាច់មិនបាក់» និង «នៅផ្ទះម្តាយទីទៃ នៅព្រៃម្តាយតែមួយ» ព្រមទាំង ជូនពរដល់ បេក្ខជន បេក្ខនារី ទាំងអស់ឱ្យទទួលបានជោគជ័យក្នុងការសិក្សា៕
ដោយ៖ស តារា
