សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ ករណីគ្រោះអគ្គិភ័យមួយបានកេីតឡេីងបណ្ដាលឱ្យផ្ទះប្រជាពលរដ្ឋជាច្រើនខ្នងត្រូវអគ្គិភ័យលេបត្របាក់ទាំងព្រឹកនៅក្នុងស្រុកខ្សាច់កណ្តាល កាលពីវេលាម៉ោង១០និង៣០នាទីព្រឹកថ្ងៃទី៣០ ខែសីហា ឆ្នាំ២០២២ ស្ថិតនៅភូមិពុកឫស្សីកណ្ដាល ឃុំពុកឫស្សី ស្រុកខ្សាច់កណ្តាល ខេត្តកណ្ដាល ។
យោងតាមក្រុមការងារមជ្ឈមណ្ឌលប្រចាំបញ្ជានៃអគ្គស្នងការដ្ឋាននគរបាលជាតិបានឱ្យដឹងថា បន្ទាប់ពីទទួលព័ត៌មានសុំអន្តរាគមន៍ពីសមត្ថកិច្ច១១៧ក្នុងករណីខាងលើនេះថា មានករណីអគ្គិភ័យឆាបឆេះផ្ទះប្រជាពលរដ្ឋស្ថិតនៅភូមិពុកឫស្សីកណ្តាល ឃុំពុកឫស្សី ស្រុកខ្សាច់កណ្តាល ខេត្តកណ្តាលមក ភ្លាមៗនោះលោកអនុសេនីយ៍ឯក ឡាយ សុខភា មជ្ឈមណ្ឌលប្រចាំបញ្ជា នៃអគ្គស្នងការដ្ឋាននគរបាលជាតិបានបញ្ជូនព័ត៌មានទៅប្រចាំបញ្ជានៃអធិការដ្ឋាននគរបាលស្រុកខ្សាច់កណ្ដាល លោក ម៉ែន សុខឃឿន ជាអធិការដើម្បីចុះធ្វើអន្តរាគមន៍បន្ទាន់ ។
លទ្ធផល៖ នៅម៉ោង១២និង៣៩នាទីរសៀលថ្ងៃទី៣០ ខែសីហា ឆ្នាំ២០២២ សមត្ថកិច្ចចម្រុះនិងរថយន្តពន្លត់អគ្គិភ័យ បានចុះធ្វើអន្តរាគមន៍ដល់កន្លែងកើតហេតុ ដោយបានបាញ់ទឹកពន្លត់រលត់ទាំងស្រុង នៅម៉ោង១១និង៣០នាទី ។ អគ្គិភ័យនេះបានឆេះផ្ទះអស់ចំនួន០៣ខ្នង មូលហេតុ បណ្តាលមកពីឆ្លងចរន្តអគ្គិសនី (ទុសេ្សខ្សែភ្លើង) ហើយយើងបានប្រើរថយន្តពន្លត់អគ្គិភ័យចំនួន០៥គ្រឿង បាញ់ទឹកអស់ចំនួន០៦រថយន្ត ក្នុងនោះមានរថយន្តស្រុកខ្សាច់កណ្តាល០២គ្រឿង រថយន្តស្រុកមុខកំពូល០១គ្រឿង រថយន្តស្រុកល្វាឯម០៣គ្រឿង។
ករណីនេះមិនបណ្តាលឱ្យមានគ្រោះថ្នាក់ដល់ប្រជាពលរដ្ឋឡើយ ហើយប្រតិបត្តិការពន្លត់បានបញ្ចប់នៅម៉ោង ១៣:២០ នាទី ថ្ងៃទី៣០ ខែសីហា ឆ្នាំ២០២២ ៕
ដោយ៖សហការី
