សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប ៖ ចោលផ្ទះ ចោលសម្បែង ចោលការងារមុខរបរ ចោលម៉ោងកូនចៅត្រូវសិក្សារៀនសូត្រ ដើម្បីមករស់នៅបែបនេះមិនមែនជាការរត់គេចពីហានិភ័យនោះទេ តែកំពុងតែរត់មករកហានិភ័យហើយ! គ្រាន់តែរឿងប្រឈមនឹងការផ្ទុះឆ្លងជំងឺកូវីដតែមួយមុខនោះគឺវាគ្រប់គ្រាន់នឹងប្រញាប់ចាកចេញពីទីនេះបាត់ទៅហើយ នេះមិនទាន់និយាយដល់ការចូលរួមគាំទ្រសកម្មភាពដែលត្រូវបានចាត់ទុកថាខុសច្បាប់ផង។ នេះជាការថ្លែងដោយ លោកឃឹម ហ្វីណង់ អភិបាលនៃគណៈអភិបាលស្រុកបន្ទាយស្រីខេត្តសៀមរាប នៅយប់ថ្ងៃទី ៣០ខែសីហាឆ្នាំ ២០២២ ។
លោកអភិបាលស្រុកបានបញ្ជាក់ថា, ខាតទាំងជីវភាព ខាតទាំងអនាគត ខាតទាំងកេរ្តិ៍ឈ្មោះមុខមាត់ សមល្មមនឹងដល់ពេលបែរងាកក្រោយ ហើយហ៊ានទទួលស្គាល់ការពិត និងវិលទៅរកផ្លូវត្រូវវិញ ផ្លូវដែលប្រកបទៅដោយការរិះគិតពិចារណាត្រឹមត្រូវ។
លោកថ្លែងបន្តថា, មិនមានការបង្ខិតបង្ខំមិនឱ្យជឿលើជំនឿផ្ទាល់ខ្លួនណាមួយនោះទេ ហើយក៏មិនមានការហាមឃាត់មិនឱ្យជួបជុំខាងផ្នែកនយោបាយនោះដែរ តែអ្វីៗធ្វើឡើងត្រូវស្ថិតនៅក្នុងរង្វង់នៃក្របខណ្ឌច្បាប់ ហើយដាច់ខាតមិនត្រូវប៉ះពាល់ទៅដល់សន្តិសុខសណ្តាប់សង្គម និងសុវត្ថិភាពសាធារណៈឡើយ។
លោកអភិបាលស្រុកលើកឡើងថា, លោកអភិបាលខេត្តបានបញ្ជាក់ច្បាស់ហើយថា៖ កុំភាន់ច្រឡំថានឹងមានការពន្យាពេលនៃការរំសាយ ឬបំបែកការប្រមូលផ្តុំ ។ រដ្ឋបាលខេត្តនឹងមិនទុកឲ្យសកម្មភាពអនាធិបតេយ្យ ដែលធ្វើឲ្យប៉ះពាល់ដល់សន្តិសុខសង្គម សុវត្ថិភាពសាធារណៈ និងការឃោសនាប្រជាភិថុតិបែបអបីយជំនឿនោះទេ ជាពិសេសសុខមាលភាព ព្រមទាំងបញ្ហាប្រឈមនឹងជំងឺកូវីដ-១៩ និងជំងឺផ្សេងៗទៀត ៕
ដោយ ៖ សិលា
