សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ លោក ជា ពីសី អភិបាលនៃគណៈអភិបាលខណ្ឌទួលគោក បានថ្លែងនៅលេីបណ្ដាញសង្គមហ្វេសប៊ុកផ្ទាល់ខ្លួននៅព្រឹកថ្ងៃព្រហស្បតិ៍ទី០១ ខែកញ្ញា ឆ្នាំ២០២២នេះថា៖ អាជ្ញាធរខណ្ឌទួលគោក ចុះដកហូតយកកេសវេចខ្ចប់គ្រឿងសមុទ្រចំនួន ៤០កេស រំលោភនៅលើចិញ្ចើមផ្លូវសាធារណៈ។
លោកអភិបាលខណ្ឌ បានឱ្យដឹងទៀតថា កាលពីវេលាម៉ោង ៤ទៀបភ្លឺថ្ងៃទី១ ខែកញ្ញានេះ លោក ចាន់ បណ្ឌិត អភិបាលរងខណ្ឌទួលគោក បានដឹកនាំកម្លាំងសណ្ដាប់ធ្នាប់សាលាខណ្ឌ ចុះដកហូតយកកេសវេចខ្ចប់គ្រឿងសមុទ្រចំនួន ៤០កេស និងបានធ្វើកិច្ចសន្យាណែនាំអប់រំជាមួយម្ចាស់អាជីវកម្មលក់គ្រឿងសមុទ្រ រំលោភនៅលើចិញ្ចើមផ្លូវសាធារណៈ ។
ចំពោះកិច្ចសន្យាណែនាំអប់រំជាមួយម្ចាស់អាជីវកម្មលក់គ្រឿងសមុទ្រ ដោយមានខ្លឹមសារដូចខាងក្រោម ៖
– ហាមមិនឲ្យយកចិញ្ចើមផ្លូវដាក់តាំង ឬទំលាក់លក់របស់របរផ្សេងៗដែលធ្វើឲ្យប៉ះពាល់ដល់សណ្តាប់ធ្នាប់សាធារណៈ នៅលើផ្លូវ ៥៩៨ ពិសេសទំលាក់ ឬចែកចាយគ្រឿងសមុទ្រលើចិញ្ចើមផ្លូវ ជាប់របងសាកលវិទ្យាល័យភូមិន្ទភ្នំពេញ ចាប់ពីថ្ងៃទី ២ កញ្ញា ២០២២ តទៅ។
– ប្រសិនបើមិនសហការ ឬនៅតែបន្តដាក់តាំង ឬទំលាក់នៅទីតាំងខាងលើដដែល នោះអាជ្ញាធរនឹងអនុវត្តវិធានការច្បាប់ ដកហូតសម្ភារៈ ឬគ្រឿងសមុទ្រ មករក្សាទុក នៅរដ្ឋបាលខណ្ឌទួលគោក ដោយមិនទទួលខុសត្រូវលើការបាត់បង់ និងខូចខាតនោះឡើយ ។
ជាចុងក្រោយ ម្ចាស់អាជីវកម្មខាងលើ បានព្រមព្រៀង និងផ្ដិតមេដៃ លើកិច្ចសន្យាអប់រំណែនាំជាមួយ អាជ្ញាធរ រួចហើយផងដែរ៕
ដោយ៖សហការី
