សារព័ត៌មាន នគរវត្ត តែងតែនាំមុខគេជានិច្ច
ខេត្ដកំពង់ស្ពឺ ៖ រថយន្តធុនធំ២គ្រឿងបានបុកគ្នាលាន់លឺដូចរន្ទះតែមិនបណ្ដាលឲ្យមាននរណាម្នាក់រងរបួសឬប៉ះពាល់ដល់អាយុជីវិតក្នុងហេតុការណ៍ខាងលើនេះឡើយ។
ករណីគ្រោះថ្នាក់ចរាចរណ៍នេះបានកើតឡើងនៅវេលាម៉ោង១៧ និង៣០នាទីថ្ងៃទី៩ ខែកញ្ញា ឆ្នាំ២០២២ នៅលើផ្លូវជាតិលេខ ៤ គីឡូម៉ែត្រ ៥៩-៦០ ស្ថិតនៅចំណុចមុខភូមិកណ្ដាល ឃុំមហាសាំង ស្រុកភ្នំស្រួច ខេត្តកំពង់ស្ពឺ។
តាមការបញ្ជាក់ពីសមត្ថកិច្ចបានឱ្យដឹងថារថយន្តមួយគ្រឿងម៉ាក FUSO ពណ៌បៃតង ពាក់ស្លាកលេខកំពង់ស្ពឺ 3A-1733 សណ្តោងសឺមីរ៉ឺម៉ក ពាក់ស្លាកលេខកំពង់ស្ពឺ 4A-0051 អ្នកបើកបរមិនស្គាល់អត្តសញ្ញាណ បើកបរពីទិសខាងលិចទៅកើត មកដល់ចំណុចខាងលើ បានរេចង្កូតចូលចំណែកផ្លូវម្ខាងទៀត ទៅបុករថយន្តមួយគ្រឿងម៉ាក HINO ពណ៌ ទឹកប្រាក់ ពាក់ស្លាកលេខ ភ្នំពេញ 3B-1087 (ដឹកធុងហ្គាស) បើកបរដោយឈ្មោះ ជ្រា ស្រ៊ា ភេទប្រុស អាយុ ៤២ឆ្នាំ រស់នៅភូមិម្រាល ឃុំកំពង់ពពិល ស្រុកពារាំង ខេត្តព្រៃវែង បើកបរបញ្រ្ចាសទិសគ្នា ។
លោកវរសេនីយ៍ទោ ពៅ នឿន អអធិការរងនគរបាលស្រុកភ្នំស្រួច ទទួលបន្ទុកផ្នែកសណ្ដាប់ធ្នាប់ បានឱ្យដឹងបន្ថែមថា អ្នកបើកបររថយន្ត FUSO អាចជាងងុយគេងឬប្រេីប្រាស់ទូរស័ព្ទដៃទេីបបានជាមានស្នាមជាន់ហ្វ្រាំង មូលហេតុ វាក់និងរថយន្ដនៅទិសបញ្រ្ចាសគ្នា។
ករណីខាងលេីនេះមិនបណ្ដាលឲ្យមានរបួសមនុស្សនោះទេ គ្រាន់តែបង្កឱ្យមានការខូចខាតរថយន្ដទាំង២គ្រឿងធ្ងន់ធ្ងរ ។បច្ចុប្បន្នជំនាញចរាចរណ៍ស្រុកកំពុងសម្រួលចរាចរណ៍នៅគោលដៅកេីតហេតុនិងរកមធ្យោបាយរថយន្ដស្ទួច ដើម្បីយកទៅរក្សាទុកនៅអធិការដ្ឋាននគរបាលស្រុកភ្នំស្រួច ដើម្បីចាត់ការតាមនីតិវិធី ៕
ដោយ៖ ស សម
