សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ មានការភ្ញាក់ផ្អើលដល់អ្នកភូមិក៏ដូចជាក្រុមគ្រួសារទាំងយប់ខណៈដែលបុរសពីរនាក់បានផឹកស៊ីស្រវឹងហើយឈ្លោះប្រកែកគ្នាឈានដល់ភាគីម្ខាងប្រើអំពើហិង្សាយកដំបងវាយភាគីម្ខាងទៀតបែកក្បាលរងរបួសធ្ងន់។
ហេតុការណ៍នេះបានកើតឡើងកាលពីវេលាម៉ោង៧និង៣០នាទីយប់ថ្ងៃទី២២ខែកញ្ញាឆ្នាំ២០២២នៅចំណុចភូមិថ្នា ឃុំថ្នាធ្នង់ ស្រុករំដួល ខេត្តស្វាយរៀង។
សមត្ថកិច្ចនគរបាលស្រុកបានឱ្យដឹងថាបុរសរងគ្រោះមានឈ្មោះឃួន ចន្ថន អាយុ៣៧ឆ្នាំ មុខរបរកសិករ រស់នៅភូមិថ្នា ឃុំថ្នាធ្នង់ ស្រុករំដួល ខេត្តស្វាយរៀងរងរបួសក្បាលត្រូវចំនួន៣ដំបង។
ចំណែកជនសង្ស័យមានឈ្មោះ ដួង តិន អាយុ៣១ឆ្នាំ មុខរបរកសិករ រស់នៅភូមិថ្នា ឃុំថ្នាធ្នង់ ស្រុករំដួល។
តាមអ្នកភូមិបានឱ្យដឹងថា មុនពេលកើតហេតុជនរងគ្រោះនិងជនសង្ស័យបានអង្គុយផឹកស៊ីជាមួយគ្នាដោយមានការជជែកលេងសប្បាយរីករាយជាធម្មតា។
ក្រោយមកពេលស្រវឹងរៀងៗខ្លួនស្រាប់តែស្រែកឡូឡាដាក់គ្នាទៅវិញទៅមករហូតឈានដល់មានទំនាស់ពាក្យសម្តីគ្នាយ៉ាងខ្លាំង ខណៈនោះជនសង្ស័យខឹងក៏ស្ទុះយកដំបងវាយចំក្បាលខាងលើត្រចៀកផ្នែកខាងឆ្វេងជនរងគ្រោះបណ្តាលឱ្យរងរបួសបែកឈាម បង្កការភ្ញាក់ផ្អើលដល់អ្នកភូមិនិងក្តុមគ្រួសារចាប់ទាញចេញនិងយកបុរសរងគ្រោះទៅព្យាបាលនៅមន្ទីរពេទ្យបង្អែកសាមគ្គីរំដួលដោយត្រូវក្រុមគ្រូពេទ្យដេរអស់ចំនួន៥ថ្នេរ។
ក្រោយបង្កហេតុជនសង្ស័យឃើញសភាពការណ៍មិនស្រួលបានរត់គេចខ្លួនបាត់ភ្លាមៗ។
បច្ចុប្បន្នសមត្ថកិច្ចកំពុងធ្វើការស្រាវជ្រាវស្វែងរកជនសង្ស័យយកមកកាត់ទោសតាមច្បាប់ឱ្យខាងតែបាន៕
ដោយ៖ សុថាន
