សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ មន្ត្រីគ្រប់គ្រងគ្រោះមហន្តរាយបានអះអាងថា ជំនន់ទឹកភ្លៀងនៅក្នុងរយៈពេលប៉ុន្មានថ្ងៃនេះបានប៉ះ ពាល់ដល់ខេត្តចំនួន៣ធ្ងន់ធ្ងរ បណ្តាលឱ្យមនុស្សស្លាប់ ៤នាក់ ក្នុងនោះប៉ះពាល់ប្រជាជនជាង១ម៉ឺនគ្រួសារនិង ដំណាំស្រូវ និងដំណាំរួមផ្សំជិត៣ម៉ឺនហិកតាត្រូវអះអាងជាបណ្តោះអាសន្នថាខូចខាត។
លោក សុទ្ធគឹម កុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយមានប្រសាសន៍នៅព្រឹកថ្ងៃទី២៨ ខែកញ្ញា នេះថា រយៈពេលប៉ុន្មានថ្ងៃនេះមាន ភ្ញៀងធ្លាក់ជាបន្តបន្ទាប់ និងមានបរិមាណទឹកភ្ញៀងមានកម្រិតច្រើនបានបង្កឱ្យមានការជន់លិចនៅតាមបណ្តាខេត្តមួយចំនួនដូចជា ខេត្តបន្ទាយមានជ័យ ប៉ះ ពាល់៨ក្រុងស្រុក ស្មើនឹង២៨ឃុំសង្កាត់បណ្តាលឱ្យមនុស្សស្លាប់៤នាក់ដោយសារលង់ទឹក ប៉ះពាល់ប្រជាជនជាង៥០០០គ្រួសារ ជម្លៀសប្រជាជនទៅរកទីទួលសុវត្តិភាពជាង២០០គ្រួសារ ក្នុងនោះមានមួយចំនួនបានវិលត្រឡប់ទៅផ្ទះវិញជាបណ្តើរៗ ប៉ះពាល់ស្រូវជាង ២៥០០០ហិកតា ដំណាំរួមផ្សំជិត៦០០០ហិកតា លិចសាលារៀន៣៣កន្លែង និងវត្តអារាម១៦កន្លែង។
បន្ទាប់ពីខេត្តបន្ទាយមានជ័យគឺខេត្តកំពង់ធំដែល ប៉ះ ពាល់៧ក្រុងស្រុក និងប៉ះពា់ល់ប្រជាជន១៥២០គ្រួសារ ក្នុងនោះជម្លៀសប្រជាជនទៅរកទីទួលសុវត្តិភាពចំនួន ២២៦គ្រួសារ។ រីឯខេត្តសៀមរាប ប៉ះពាល់៨ក្រុងស្រុក ស្មើ៤១ឃុំសង្កាត់ ប៉ះពាល់ប្រជាជនជិត៦០០០គ្រួសារលេចផ្ទះប្រជាជនជាង៣០០០ខ្នងជម្លៀសប្រជាជន ២៩គ្រួសារលេចស្រូវជិត២ម៉ឺនហិកតានិងលេចសាលា រៀន៤៨កន្លែង។
យោងតាមក្រសួងធនធានទឹក និងឧតុនិយម បញ្ជាក់ថា ចាប់ពីថ្ងៃទី២៨ រហូតដល់ថ្ងៃទី៣០ ខែកញ្ញា ឆ្នាំ២០២២ កម្ពុជានឹងរងនូវឥទ្ធិពលព្យុះទី១៦ ឈ្មោះ ណូរុ (NORU) ដែលអាចនឹងធ្វើឲ្យខេត្តមួយចំនួនបន្តរងជំនន់ទឹកភ្លៀង៕
ដោយ៖ សូរិយា
