លោកសន្តិបណ្ឌិត សុខ ផល ៖ សមត្ថកិច្ចនៅទូទាំងប្រទេស បានបង្ក្រាបទីតាំងល្បែងស៊ីសងខុសច្បាប់គ្រប់ប្រភេទប្រមាណជាង ៩.០០០ ទីតាំង និងឃាត់មនុស្សជាង ១ម៉ឺន ៣ពាន់នាក់

ចែករំលែក៖

ភ្នំពេញ៖ លោកសន្តិបណ្ឌិត សុខ ផល ប្រធានក្រុមការងារបង្ក្រាបការលេងល្បែងស៊ីសង ខុសច្បាប់គ្រប់ប្រភេទ បានឱ្យដឹង នៅល្ងាចថ្ងៃទី១ ខែតុលា ឆ្នាំ២០២២នេះថា៖ កម្លាំងសមត្ថកិច្ចនៅទូទាំងប្រទេសកម្ពុជា ចុះបង្ក្រាបទីតាំងល្បែងស៊ីសងខុសច្បាប់គ្រប់ប្រភេទទាំង២៥ រាជធានី-ខេត្ត បានប្រមាណជាង ៩ពាន់ទីតាំង និងឃាត់ខ្លួនមនុស្សជាង ១ម៉ឺន ៣ពាន់នាក់ ក្នុងនោះមាន មួយចំនួនធ្វើការអប់រំ និងធ្វើកិច្ចសន្យា និងមួយចំនួនទៀត ក៏បានចាត់វិធានការច្បាប់ដោយបញ្ជូនទៅតុលាការដើម្បីចាត់ការតាមនីតិវិធី; នេះបេីគិតត្រឹមរយៈពេល ១៧ថ្ងៃ ចាប់ពីថ្ងៃទី១៥ ខែកញ្ញា ដល់ថ្ងៃទី១ ខែតុលា ឆ្នាំ២០២២។

លោកសន្តិបណ្ឌិត សុខ ផល បានគូសបញ្ជាក់យ៉ាងដូច្នេះថា៖ គិតចាប់ពីថ្ងៃទី១៥ ដល់ថ្ងៃទី៣០ ខែកញ្ញា ឆ្នាំ២០២២ម្សិលមិញនេះ លទ្ធផលនៃការបង្ក្រាបការលេងល្បែងស៊ីសងខុសច្បាប់គ្រប់ប្រភេទនៅទូទាំងប្រទេសចំនួន ២៥ រាជធានី-ខេត្ត សមត្ថកិច្ចជំនាញ ចុះបង្ក្រាបបាន ៩ពាន់ទីតាំង និងឃាត់ខ្លួនមនុស្សចំនួន ១៣.០៣២ នាក់។ ក្នុងនោះស្រីចំនួន ៥.៥៨៩នាក់ ដោយក្នុងនោះ ធ្វើការអប់រំ និងធ្វើកិច្ចសន្យា ចំនួន ១២.៧៨៦នាក់ ក្នុងនោះស្រី ៥.៤៩៤នាក់ និងបញ្ជូនទៅតុលាការ ចំនួន ២៤៦នាក់ ក្នុងនោះស្រី ៩៥នាក់។

គួរជម្រាបថា កាលថ្ងៃទី១៤ ខែកញ្ញា ឆ្នាំ២០២២កន្លងទៅនេះ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានចេញលិខិតបង្គាប់ការចាត់តាំងលោក សន្តិបណ្ឌិត សុខ ផល រដ្ឋលេខាធិការក្រសួងមហាផ្ទៃ ដឹកនាំក្រុមការងារ ដើម្បីសហការ បង្ក្រាបល្បែងស៊ីសង ខុសច្បាប់គ្រប់ប្រភេទ ទូទាំងប្រទេស។ លិខិតបង្គាប់ការនេះ មាន ប្រសិទ្ធិភាពអនុវត្តចាប់ពីថ្ងៃទី១៤ ខែកញ្ញា ឆ្នាំ២០២២ រហូតដល់ថ្ងៃបញ្ចប់បេសកកម្ម។

ជាមួយគ្នានោះសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា កាលពីថ្ងៃទី១៦ ខែកញ្ញា ឆ្នាំ២០២២ បានចេញសេចក្តីសម្រេច ស្តីពីការបង្កើតក្រុម ការងារបង្ក្រាបការលេងល្បែងស៊ីសងខុសច្បាប់គ្រប់ប្រភេទ។ ការចេញសេចក្តីសម្រេចនេះ បានធ្វើឡើងបន្ទាប់ពីមានការស្នើសុំពីសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ។ ក្រុមការងារនេះ មានសមាសភាព ចំនួន ១១រូប ដោយក្នុងនោះមានប្រធាន ១រូប គឺលោកសន្តិបណ្ឌិត សុខ ផល និងអនុប្រធាន ២រូប គឺនាយឧត្តមសេនីយ៍ នេត សាវឿន និងលោក នៅ លក្ខិណា រួមទាំងសមាជិកចំនួន ៩រូប៕