ពលរដ្ឋជាង១០០គ្រួសាត្រូវអាជ្ញាធរជម្លៀសរកទីទួលសុវត្ថិភាពនិងផ្តល់អំណោយជាបន្តបន្ទាប់

ខេត្តបន្ទាយមានជ័យ៖ ពលរដ្ឋចំនួនជាង១០០គ្រួសារត្រូវបានអាជ្ញាធរនិងសមត្ថកិច្ចក្រុងប៉ោយប៉ែតជម្លៀសរកទីទួលសុវត្ថិភាពជាបន្តបន្ទាប់ ខណៈភ្លៀងនៅតែបន្តធ្លាក់ជាបន្តបន្ទាប់រួមទាំងជំនន់ធ្លាក់មកពីប្រទេសថៃនិងធ្វើការផ្តល់គ្រឿងឧបភោគបរិភោគរួមមុង,ភួយនៅថ្ងៃទី២តុលា២០២២នេះ។

 មន្តីរសាលាក្រុងប្រាប់ថា ទីទួលសុវត្ថិភាពចំនួន៣កន្លែងនៅក្រុងប៉ោយប៉ែតរួមមានចំណុចសាលាកូរ៉េ,សាលាបឋមសិក្សាវត្តបាលិលេយ្យស្ថិតក្នុងបរិវេណវត្តបាលិលេយ្យនិងបុរីK.Nមានពលរដ្ឋស្នាក់នៅព្រោងព្រៀតមានក្មេងមានចាស់រួមទាំងជនពិការផងដែរ។

លោក គាត ហ៊ុល អភិបាលក្រុងប៉ោយប៉ែតប្រាប់ថាចាប់តាំងពីថ្ងៃទី២៨កញ្ញាមកទល់ព្រឹកថ្ងៃទី២តុលានេះដោយសារភ្លៀងបន្តធ្លាក់ស្ទើររៀងរាល់ថ្ងៃម្យ៉ាងទឹកហូរធ្លាក់ពីថៃផងនោះបានបង្ករឲ្យទឹកអូរព្រំដែនបន្តហក់ឡើងឥតឈប់ឈរ។លោកបន្តថាភូមិមួយចំនួនតាមបណ្តោយអូរព្រំដែនខាងត្បូងផ្លូវជាតិលេខ៥បានរងការជន់លិចជាបណ្តើរៗ។លោកបន្តថាពលរដ្ឋចំនួន១១៨គ្រួសារត្រូវបានជម្លៀសរកទីទួលសុវត្ថិភាពនិងបានផ្តល់អំណោយមុង,ភួយ,គ្រឿងឧបភោគនិងបរិភោគជាបន្តបន្ទាប់គិតត្រឹមថ្ងៃទី២តុលានេះ។អំណោយទាំងអស់ខាងលើរបស់សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជាតាមរយៈលោកឧបនាយករដ្ឋមន្ត្រីកែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀននិងជាប្រធានក្រុមការងារថ្នាក់ជាតិចុះជួយខេត្តបន្ទាយមានជ័យ។

លោកអភិបាលក្រុងបានអំពាវនាវដល់ពលរដ្ឋដែលរស់នៅតាមបណ្តាភូមិកំពុងប្រឈមបញ្ហាទឹកលិចទាំងអស់មេត្តាមានការប្រុងប្រយ័ត្នខ្ពស់ពាក់ព័ន្ធចរន្តអគ្គិសនីពិសេសព្រឺភ្លើងនិងកុមារតូចក៏ដូចជាសត្វពាហៈនៈផងដែរ។

នៅរសៀលថ្ងៃទី២ខែតុលាឆ្នាំ២០២២នេះនៅទីប្រជុំជនក្រុងប៉ោយប៉ែតមួយនេះពិសេសខាងជើងផ្លូវជាតិលេខ៥ដូចជាបេនឡានក្រុងឬម្តុំផ្សារត្រី,ផ្សារថ្មីប៉ោយប៉ែតនិងផ្លូវបេតុងមួយចំនួនកំពុងតែមានការជន់លិចផងដែរ ៕

ដោយ ៖ វណ្ណា