សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ នារសៀលថ្ងៃទី១៤ ខែតុលា ឆ្នាំ២០២២ លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍ បានទទួលជួបសម្តែងការគួរសមនិងពិភាក្សាការងារជាមួយលោក Nguyen Huy Tang ឯកអគ្គរដ្ឋទូតវិសាមញ្ញនិងពេញសមត្ថភាពនៃសាធារណរដ្ឋសង្គមនិយមវៀតណាមប្រចាំនៅកម្ពុជា នៅទីស្តីការក្រសួងប្រៃសណីយ៍និងទូរគមនាគមន៍។
ជាកិច្ចចាប់ផ្តើម លោករដ្ឋមន្ត្រី បានសម្តែងនូវការស្វាគមន៍យ៉ាងកក់ក្តៅជូនចំពោះឯកឧត្តមឯកអគ្គរដ្ឋទូត និងថ្លែងអំណរគុណយ៉ាងជ្រាលជ្រៅចំពោះភាគីវៀតណាមដែលតែងតែគាំទ្រដល់កម្ពុជានាពេលកន្លងមក។ នៅក្នុងជំនួបនេះ លោករដ្ឋមន្ត្រី បានជម្រាបជូន លោកឯកអគ្គរដ្ឋទូត អំពីសមិទ្ធផលការងារសំខាន់នៃក្រសួងដែលសម្រេចបាននៅក្នុងរយៈពេលពីរឆ្នាំចុងក្រោយនេះ ដែលរួមមាន៖ ការកសាងសមត្ថភាព ការរៀបចំគោលនយោបាយ និងលិខិតបទដ្ឋានគតិយុត្តិ ការកសាងហេដ្ឋារចនាសម្ព័ន្ធ និងការងារកំណែទម្រង់របស់ក្រសួងផងដែរ។
ជាការឆ្លើយតប លោកឯកអគ្គរដ្ឋទូត បានកោតសរសើរចំពោះសមិទ្ធផលស្នាដៃរបស់ក្រសួង ក្រោមការដឹកនាំរបស់ឯកឧត្តមរដ្ឋមន្ត្រី និងបានបង្ហាញគោលជំហរនៅក្នុងការបន្តពង្រីក និងពង្រឹងកិច្ចសហប្រតិបត្តិការទ្វេភាគីរវាងប្រទេសទាំងពីរឱ្យកាន់តែរឹងមាំ ជាពិសេសលើវិស័យទូរគមនាគមន៍ និងសន្តិសុខសាយប័រ។ ឆ្លៀតក្នុងឱកាសនោះ លោកឯកអគ្គរដ្ឋទូត បានគោរពអញ្ជើញ ឯកឧត្តមរដ្ឋមន្ត្រី ទៅបំពេញទស្សនកិច្ចជាផ្លូវការនៅសាធារណរដ្ឋសង្គមនិយមវៀតណាម នៅពេលខាងមុខនេះ។
លោករដ្ឋមន្ត្រី បានថ្លែងអំណរគុណចំពោះការអញ្ជើញនេះ ហើយឯកឧត្តមរដ្ឋមន្ត្រី នឹងពិនិត្យលទ្ធភាពបំពេញទស្សនកិច្ចតបតាមសំណើនេះ ដើម្បីសិក្សាដកស្រង់បទពិសោធន៍ និងឧត្តមានុវត្ត ពីប្រទេសក្នុងតំបន់ ក្នុងការអភិវឌ្ឍវិស័យប្រៃសណីយ៍ ទូរគមនាគមន៍ និងបច្ចេកវិទ្យាគមនាគមន៍និងព័ត៌មាន ៕
ដោយ : សហការី
