សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ក្រសួងបរិស្ថាន នៅរសៀលថ្ងៃសុក្រទី២៨ ខែតុលា ឆ្នាំ០២២នេះ បានឱ្យដឹងថា ពិព័រណ៍ការងារ និងផលិតភាពជាតិឆ្នាំ២០២២ ដែលប្រព្រឹត្តទៅនៅថ្ងៃទី២៨-២៩ ខែតុលា ឆ្នាំ២០២២ នៅមជ្ឈមណ្ឌលសន្និបាត និងពិព័រណ៍កោះពេជ្រ ដែលរៀបចំដោយក្រសួងការងារ និងបណ្តុះបណ្តាលវិជ្ជាជីវៈ និងមានការចូលរួមពីក្រសួង ស្ថាប័ន និងវិស័យឯកជនជាច្រើន។
ក្រសួងបរិស្ថាន បានឱ្យដឹងទៀតថា ព្រឹត្តិការណ៍នេះគឺជាឱកាសផ្តល់ដល់យុវជន សិស្ស-និស្សិត និងអ្នកស្វែងរកការងារទាំងអស់មានឱកាសទទួលបានការងារធ្វើភ្លាមៗ ការប្រឹក្សាយោបល់អំពីអាជីព វិធីសាស្រ្តជោគជ័យក្នុងការដាក់ពាក្យស្វែងរកការងារ ការចែករំលែកចំណេះដឹង និងបទពិសោធន៍ទទួលបានជោគជ័យក្នុងអាជីព ក៏ដូចជាតម្រូវការទីផ្សាការងារ។
នៅក្នុងការចូលរួមតាំងពិព័រណ៍ការងារ និងផលិតភាពជាតិឆ្នាំ២០២២នេះ ក្រសួងបរិស្ថានចូលរួមដាក់តាំងបង្ហាញពីវឌ្ឍនភាពការងារលើការគ្រប់គ្រងវិស័យបរិស្ថាន ដោយមានការតាំងបង្ហាញនូវវីដេអូឯកសារ និងស្ព័តខ្លីៗ ឯកសារទាក់ទងនឹងកិច្ចគាំពារបរិស្ថាន ការអភិរក្សធនធានធម្មជាតិ ការអភិរក្សជីវៈចម្រុះ និងការរស់នៅដោយចីរភាពរបស់ប្រជាសហគមន៍ ដែលចូលរួមពី ៖
*អគ្គនាយកដ្ឋានរដ្ឋបាល និងហិរញ្ញវត្ថុ
*អគ្គនាយកដ្ឋានគាំពារបរិស្ថាន
*អគ្គនាយកដ្ឋានចំណេះដឹងនិងព័ត៌មានបរិស្ថាន
*អគ្គនាយកដ្ឋានគោលនយោបាយនិងយុទ្ធសាស្ត្រ
*អគ្គនាយកដ្ឋានសហគមន៍មូលដ្ឋាន
*អគ្គនាយកដ្ឋានតំបន់ការពារធម្មជាតិ។
ទន្ទឹមនឹងនោះដែរ ក្រសួងបរិស្ថាន ក៏មានការដាក់តាំងបង្ហាញនូវអណ្តើកហ្លួង ដែលជាប្រភេទសត្វកម្រ ហើយក៏មានការចាប់អារម្មណ៍យ៉ាងខ្លាំងពីអ្នកចូលរួមផងដែរ ៕
ដោយ៖សហការី
