សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់ធ្វើចរាចរណ៍នៅតាមដងផ្លូវដោយជួយរីយ៉ែរថយន្តឱ្យគេគ្រាន់បានថវិកាចិញ្ចឹមគ្រួសារ ហើយត្រូវម៉ូតូបុកបណ្តាលឱ្យរងរបួសធ្ងន់ ត្រូវបានរថយន្តសង្គ្រោះអង្គភាព៧១១ ដឹកយកទៅសង្គ្រោះភ្លាមៗ ។
ហេតុការណ៍គ្រោះថ្នាក់ចរាចរណ៍នេះបង្កឱ្យមានការភ្ញាក់ផ្អើលឡើងកាលពីម៉ោង១០យប់ថ្ងៃទី៣១ ខែតុលា ឆ្នាំ២០២២ នៅតាមបណ្តោយផ្លូវជាតិលេខ៣ ខាងមុខបុរី ជារី ស្ថិតក្នុងភូមិព្រៃព្រីងខាងត្បូង១ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ។
សមត្ថកិច្ចបានឱ្យដឹងថា បុរសរងគ្រោះរូបនេះមិនបានស្គាល់ឈ្មោះ និងអាសយដ្ឋាននោះទេ ។ ចំណែកម៉ូតូដែលបើកបុកជនរងគ្រោះម៉ាកហុងដា (ZOOMER-X) ពណ៌សលាយទឹកក្រូច ពាក់ស្លាកលេខ ភ្នំពេញ 1GD-1514 បើកបរដោយបុរសម្នាក់ មិនស្គាល់អត្តសញ្ញាណ ។
ប្រភពព័ត៌មាននៅកន្លែងកើតហេតុបានឱ្យដឹងថា មុនពេលកើតហេតុគេឃើញបុរសម្នាក់ជាអ្នកធ្វើចរាចរណ៍នៅទល់មុខបុរី ជារី និងជួយរីយ៉ែរថយន្តនៅហាងក្បែរកន្លែងកើតហេតុ ខណៈពេលជនរងគ្រោះដើរឆ្លងផ្លូវ ស្រាប់តែមានម៉ូតូម៉ាកហ្ស៊ូមមើ អុិច បើកបរដោយបុរសម្នាក់ក្នុងទិសដៅពីត្បូងទៅជើងក្នុងល្បឿនយ៉ាងលឿនបានបុកជនរងគ្រោះពេញទំហឹង បណ្តាលឱ្យរងរបួសបែកក្បាលហូរឈាមសន្លប់ស្តូកស្តឹង ចំណែកអ្នកបើកបរម៉ូតូបានរងរបួសធ្ងន់បែកមុខផងដែរ ។
ប្រភពព័ត៌មានបន្តទៀតថា ខណៈមានគ្រោះថ្នាក់ភ្លាមៗបងប្អូនប្រជាពលរដ្ឋបានទំនាក់ទំនងទៅរថយន្តសង្គ្រោះរបស់អង្គភាព៧១១ មកដឹកជនរងគ្រោះបញ្ជូនទៅសង្គ្រោះបន្ទាន់នៅមន្ទីរពេទ្យព្រះកុសុមៈទាំង២នាក់ ។
បន្ទាប់ពីកើតហេតុកម្លាំងសមត្ថកិច្ចនគរបាលប៉ុស្តិ៍ចោមចៅទី២បានយកម៉ូតូហ្ស៊ូមមើ អុិចទៅរក្សាទុករង់ចាំដោះស្រាយគ្នានៅពេលក្រោយ ៕
ដោយ៖ ជ្រោយពេជ្រ
