សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ មានករណីគ្រោះថ្នាក់ចរាចរណ៍គួរឲ្យរន្ធត់មួយបណ្ដាលឱ្យនារីម្នាក់ស្លាប់ភ្លាមៗ ដោយសារតែមានរថយន្តធុនធំមិនស្គាល់ម៉ាកបើកវ៉ាជែងរថយន្តមកពីខាងមុខហើយក៏ជ្រុលទៅបុកម៉ូតូមួយគ្រឿងដែលបើកបញ្ច្រាសគ្នាយ៉ាងពេញទំហឹងបង្កការភ្ញាក់ផ្អើលដល់អ្នកភូមិនិងអ្នកធ្វើដំណើរទាំងព្រឹក។
ហេតុការណ៍នេះបានកើតឡើងកាលពីវេលាម៉ោង៨និង៤៥នាទីព្រឹក ថ្ងៃទី៧ខែវិច្ឆិកាឆ្នាំ២០២២ លើផ្លូវលេខ៣១៤Dស្ថិតនៅក្នុងភូមិព្រីងជ្រុំ ឃុំព្រះពន្លា ស្រុកកំពង់រោទ៍ ខេត្តស្វាយរៀង។
យោងតាមសមត្ថកិច្ចគរបាលស្រុកបានឱ្យដឹងថា នារីដែលស្លាប់មានឈ្មោះ ម៉ម ស្រីមុំ អាយុ២០ឆ្នាំ មុខរបរអាជីវករ មានទីលំនៅភូមិតែងម៉ៅ ឃុំចន្ទ្រា ស្រុក ចន្ទ្រា ខេត្តស្វាយរៀង បើកម៉ូតូម៉ាកHonda wave ពណ៌សលាយខ្មៅ ពាក់ស្លាកលេខ ស្វាយរៀង ១R-៧២៨២ខូចខាតទាំងស្រុង។
ចំណែកអ្នកបើករថយន្តបង្កហេតុមិនត្រូវបានស្គាល់អត្តសញ្ញាណនោះទេព្រោះក្រោយឃើញសភាពការណ៍មិនស្រួលបានបើករថយន្តគេចខ្លួនបាត់ស្រមោលតែម្ដង។
តាមសាក្សីបានឱ្យដឹងថា មុនកើតហេតុគេឃើញនារីរងគ្រោះជិះម៉ូតូមួយគ្រឿងម៉ាកHonda wave ពណ៌សលាយខ្មៅ ពាក់ស្លាកលេខ ស្វាយរៀង ១R-៧២៨២លើផ្លូវលេខ៣១៤D ខណៈនោះស្រាប់តែមានរថយន្តធុនធំមួយគ្រឿងពណ៌សមិនចាំម៉ាកបានធ្វើដំណើរពីត្បូងទៅជើងហើយក៏បានវ៉ារថយន្តដែលបើកពីខាងមុខរួចក៏ជ្រុលទៅបុកម៉ូតូពេញទំហឹងលាន់សូរប្រាវបង្កការភ្ញាក់ផ្អើលតែម្ដង។
បច្ចុប្បន្នវត្ថុតាងម៉ូតូរបស់ជនរងគ្រោះត្រូវបានសមត្ថកិច្ចយកទៅរក្សាទុកនៅប៉ុស្តិ៍នគរបាលរដ្ឋបាលព្រះពន្លា រីឯសពបានធ្វើកំណត់ហេតុនិងបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណីទាំងក្ដុកក្ដួលបំផុត។
សមត្ថកិច្ចចរាចរណ៍ស្រុកបានបញ្ជាក់ពីមូលហេតុដោយសារតែអ្នកបើកបររថយន្តធុនធំវ៉ាជែងខ្វះការប្រុងប្រយ័ត្នទើបមានករណីគ្រោះថ្នាក់ខាងលើកើតឡើង៕
ដោយ៖ សុថាន
