ព័ត៌មានទាន់ហេតុការណ៍៖

អបអរសាទរព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ នៅខេត្តព្រះវិហារ មានប្រជាពលរដ្ឋចូលរួមរីករាយ និងអបអរសាទរយ៉ាងកុះករ

ចែករំលែក៖

ខេត្តព្រះវិហារ ៖ ពិធីប្រណាំងទូកលក្ខណៈសហគមន៍ អបអរសាទរព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ នៅខេត្តព្រះវិហារ មានប្រជាពលរដ្ឋចូលរួមរីករាយ និងអបអរសាទរយ៉ាងកុះករ ។ 

សូមបញ្ជាក់ថា, នៅថ្ងៃទី០៧ ខែវិច្ឆិកា ឆ្នាំ២០២២ រដ្ឋបាលខេត្តព្រះវិហារបានរៀបចំពិធីប្រណាំងទូកលក្ខណៈសហគមន៍ អបអរសាទរព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ ក្រោមអធិបតីភាពដោយ លោកទេសរដ្ឋមន្ត្រី មាស សុភា ប្រធានក្រុមការងាររាជរដ្ឋាភិបាល ចុះមូលដ្ឋានខេត្តព្រះវិហារ លោក សួស យ៉ារ៉ា អ្នកតំណាងរាស្តមណ្ឌលព្រះវិហារ លោក គីម រិទ្ធី អភិបាលខេត្តព្រះវិហារ ព្រមទាំងថ្នាក់ដឹកនាំខេត្ត មន្ត្រីរាជការ ប្រជាពលរដ្ឋយ៉ាងច្រើនកុះករ ដែលបានធ្វើឡើងនៅសហគមន៍ទេសចរណ៍ទំនប់៩៥ ស្ថិតក្នុងសង្កាត់ប៉ាលហាល ក្រុងព្រះវិហារ។

លោក មាស សុភា បានថ្លែងពាំនាំការផ្តាំផ្ញើសាកសួរសុខទុក្ខ ដោយក្តីនឹករលឹក ពីសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋទូទាំងខេត្តព្រះវិហារ ក្នុងឱកាសដ៍សែនសប្បាយរីករាយ នៃពីធីអុំទូក នាថ្ងៃនេះ។

លោកទេសរដ្ឋមន្ត្រីបានបញ្ជាក់ថា «ឆ្នាំនេះព្រះរាជាណាចក្រកម្ពុជាយើង ស្ថិតក្នុងសន្តិភាព និងការអភិវឌ្ឍ និងមានក្តីសប្បាយរីករាយ ដោយខេត្តភាគច្រើននៅទូទាំងប្រទេស ប្រារព្វពិធីបុណ្យអុំទូកអកអំបុក។ សម្រាប់រាជធានីភ្នំពេញដោយសារឆ្នាំនេះប្រទេសយើង រៀបចំកិច្ចប្រជុំអាស៊ាន ចំឱកាសជារៀងរាល់ឆ្នាំយើងបានប្រារព្វព្រះរាជពិធីបុណ្យអុំទូកនេះ ដូច្នេះយើងមិនបានចាត់តាំងព្រះរាជពិធីបុណ្យអុំទូកទេ ប៉ុន្តែអនុញាតឱ្យខេត្តនីមួយៗដែលមានលទ្ធភាពរៀបចំពិធីបុណ្យអុំទូក ដែលជាបុណ្យប្រពៃណីជាតិរបស់យើង»។បន្ថែមពីនេះទៀត លោក មាស សុភា បានលើកឡើងថា ដោយឡែកនៅខេត្តព្រះវិហាររបស់យើង ជាខេត្តឆ្ងាយដាច់ស្រយ៉ាល ជាខេត្តដែលស្ថិតនៅក្នុងតំបន់ព្រៃភ្នំ មានទន្លេ មានបឹងបួ ដែលជារៀងរាល់ឆ្នាំយើងបានចាត់តាំងពិធីបុណ្យអុំទូកដែរ ប៉ុន្តែក្នុងរយះពេលនៃជំងឺកូវីដ១៩ គឺយើងបានអាក់ខាន។

ការរៀបចំពិធីបុណ្យអុំទូក បណ្តែតប្រទីប នៅទំនប់៩៥នេះ ជាលើកទី១ ដែលកន្លងមកមិនធ្លាប់បានរៀបចំទេ ហើយការរៀបចំនេះក្រោមការផ្តួចផ្តើមពី លោក គីម រិទ្ធី អភិបាលខេត្តព្រះវិហារ។

លោកក៏បានអំពាវនាវដល់ប្រជាពលរដ្ឋយើងត្រូវចូលរួមការពារនូវសុខសន្តិភាព ដែលសម្តេចតេជោ ហ៊ុន សែន បានខិតខំដោយលំបាក ដើម្បីឱ្យប្រទេសជាតិយើងការតែអភិវឌ្ឍន៍រីកចម្រើនថែមទៀត៕

ដោយ : សហការី


ចែករំលែក៖