សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល ៖ បុរសម្នាក់សង្ស័យស្រវឹងស្រាខ្លាំងហើយបានបើករថយន្តLexus Rx330 ពាក់ស្លាកលេខនគរបាល មួយគ្រឿងធ្វេីដំណេីរក្នុងល្បឿនលឿនជ្រុលទៅបុករះបង្គោលឡាក់និងឡំប្រឺតាមួយគ្រឿងបណ្ដាលឱ្យបុរសម្នាក់រងរបួសធ្ងន់ ហេីយរថយន្តបង្កបន្តទៅបុករបងផ្ទះប្រជាពលរដ្ឋរងការខូចខាត ទេីបធ្វេីឱ្យរថយន្តដាច់កាឡេកង់មុខម្ខាងទៅមុខលែងរួច ។
ហេតុការណ៍គ្រោះថ្នាក់ចរាចរណ៍នេះបានកេីតឡេីងកាលពីវេលាម៉ោង១១ និង៣០នាទីយប់ថ្ងៃចន្ទ ទី៧ ខែវិច្ឆិកា ឆ្នាំ២០២២ស្ថិតនៅតាមបណ្ដោយផ្លូវជាតិលេខ២ ត្រង់ចំណុចរង្វង់មូលតាខ្មៅ ក្រុងតាខ្មៅ ខេត្តកណ្ដាល។
តាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុគេឃើញរថយន្តមួយគ្រឿងម៉ាក Lexus RX330 ពណ៌ស ពាក់ស្លាកលេខនគរបាល2-8768 បើកដោយបុរសម្នាក់សង្ស័យស្រវឹងស្រាពីជើងទៅត្បូងក្នុងល្បឿនលឿន ខណៈមកដល់ចំណុចកើតហេតុខាងលើបានបុករះបង្គោលឡាក់បាក់អស់៥ដើម និងហោះទៅបុកឡំប្រឺតា ដែលចតលើចិញ្ចើមផ្លូវប៉ើងទៅផ្ទប់នឹងរបងសាលាដំបូងខេត្តកណ្ដាល បណ្ដាលឱ្យម្ចាស់ឡំប្រឺតារងរបួសធ្ងន់ ។ ភ្លាមៗនោះអ្នកបើករថយន្តបង្កហេតុមិនព្រមឈប់ទទួលខុសត្រូវនោះទេ គឺបានបើកថយក្រោយ រួចបន្តដំណេីររហូតដល់ភូមិស្ទឹងជ្រៅ សង្កាត់ដើមមៀន ក្រុងតាខ្មៅក៏ជ្រុលទៅបុករបងផ្ទះប្រជាពលរដ្ឋរងការខូចខាតហើយរថយន្តដាច់កង់មុខម្ខាងទៅលែងរួច ទេីបតៃកុងរថយន្តបង្កបានចុះរត់គេចខ្លួនបាត់ស្រមោលទៅ ។
ក្រោយកើតហេតុ សមត្ថកិច្ចជំនាញចរាចរណ៍ក្រុងតាខ្មៅ បានចុះមកធ្វេីការវាស់វែងស្ទួចយករថយន្តបង្កនិងឡំប្រឺតាដែលរងការខូចខាតទៅរក្សាទុករង់ចាំឱ្យម្ចាស់រថយន្តបង្កចូលខ្លួនមកដោះស្រាយតាមច្បាប់ ៕
ដោយ ៖ ភារ៉ា ដង្កោ
