សារព័ត៌មាន នគរវត្ត តែងតែនាំមុខគេជានិច្ច
ក្រុមការពារតំណែងជើងឯកមាន់គកបារាំងបានបង្ហាញបញ្ជីឈ្មោះកីឡាករទាំង២៥រូបសម្រាប់ត្រៀមប្រជែងពានរង្វាន់ World Cup នៅកាតាឆ្នាំនេះ ដោយក្រុមរបស់លោក Deschamps មានខ្សែប្រយុទ្ធសំខាន់ៗមុតស្រួចរហូតដល់៧នាក់។
ខ្សែការពារ Raphael Varane លេងឲ្យក្រុម Manchester United ត្រូវបានបញ្ចូលក្នុងក្រុមការពារតំណែងជើងឯកបារាំងសម្រាប់ World Cup ដែរ ទោះបីជាគាត់នៅតែជាសះស្បើយពីរបួសក៏ដោយ។ខ្សែការពារកណ្តាលវ័យ២៩ឆ្នាំរូបនេះបានចាកចេញពីទីលានទាំងទឹកភ្នែកបន្ទាប់ពីរងរបួសជើងក្នុងលទ្ធផលស្មើ ១–១ របស់ Manchester United នៅ Chelsea កាលពីថ្ងៃទី២២ ខែតុលា។
អ្នកចាំទី Hugo Lloris លេងឲ្យក្រុមមាន់ខ្នាយមាស Tottenham នឹងចូលលេងក្នុង World Cup ជាលើកទី៤របស់គាត់។ រីឯខ្សែប្រយុទ្ធ Karim Benzema របស់ Real Madrid និងខ្សែប្រយុទ្ធ Paris St-Germain Kylian Mbappe ក៏ត្រូវបានគេដាក់ឈ្មោះក្នុងបញ្ជីផងដែរ។
ចំណែកខ្សែការពារ William Saliba និង Ibrahima Konate របស់ Arsenal និង Liverpool ក៏ទទួលបានការហៅទៅកាន់ក្រុមរបស់លោកDidier Deschamps ផងដែរ។
លោក Deschamps គ្រូបង្វឹកក្រុមជម្រើសជាតិបារាំងបានដាក់ឈ្មោះកីឡាករត្រឹមតែ២៥នាក់ប៉ុណ្ណោះ បើទោះបីជាអាចជ្រើសរើសបាន២៦នាក់ក៏ដោយ ហើយក្រុមរបស់គាត់នឹងចាប់ផ្តើមការពារតំណែងជើងឯករបស់ខ្លួននៅថ្ងៃទី២២ ខែវិច្ឆិកាខាងមុខ ដោយត្រូវប៉ះជាមួយក្រុមអូស្ត្រាលីក្នុងពូល D ដែលរួមមានដាណឺម៉ាក និងទុយនេស៊ីផងដែរ។
ខ្សែបម្រើ Paul Pogba មិនបានចូលរួមទេបន្ទាប់ពីមានរបួសជង្គង់កាលពីខែកក្កដា ដោយមិនបានលេងឱ្យក្រុម Juventus នៃក្របខ័ណ្ឌ Serie A ចាប់តាំងពីផ្ទេរពី Manchester United មកវិញក្នុងរដូវក្ដៅនេះ។ ចំណែកកីឡាករ N’Golo Kante ក៏ត្រូវបានអវត្តមានដែរដោយសាររបួសសរសៃពួរ ខណៈដែលខ្សែប្រយុទ្ធ Antony Martial របស់ Manchester United ដែលរបួសខ្នងក៏មិនមានវត្តមានក្នុងក្រុមជម្រើសជាតិដែរ។
ខាងក្រោមនេះគឺជាបញ្ជីឈ្មោះកីឡាករទាំង២៥រូបរបស់ក្រុមជម្រើសជាតិមាន់គកបារាំងសម្រាប់ត្រៀមប្រកួត World Cup 2022 នៅកាតា៖
អ្នកចាំទី ៖ Alphonse Areola (West Ham), Hugo Lloris(Tottenham), Steve Mandanda (Rennes)។
ខ្សែការពារ ៖ Lucas Hernandez (Bayern Munich), Theo Hernandez (AC Milan), Presnel Kimpembe (Paris St-Germain), Ibrahima Konate (Liverpool), Jules Kounde (Barcelona), Benjamin Pavard (Bayern Munich), William Saliba (Arsenal), Dayot Upamecano (Bayern Munich), Raphael Varane(Manchester United)។
ខ្សែបម្រើ ៖ Eduardo Camavinga (Real Madrid), YoussoufFofana (Monaco), Matteo Guendouzi (Marseille), Adrien Rabiot(Juventus), Aurelien Tchouameni (Real Madrid), Jordan Veretout (Marseille)។
ខ្សែប្រយុទ្ធ ៖ Karim Benzema (Real Madrid), Kingsley Coman(Bayern Munich), Ousmane Dembele (Barcelona), Olivier Giroud (AC Milan), Antoine Griezmann (Atletico Madrid), Kylian Mbappe (Paris St-Germain), Christopher Nkunku (RB Leipzig) ៕
ដោយ៖ ភារៈ
