សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង៖ យោងតាមរបាយការណ៍របស់សមត្ថកិច្ចខេត្តបាត់ដំបងបានឱ្យដឹងនៅព្រឹកថ្ងៃទី២១ខែវិច្ឆិកាឆ្នាំ២០២២នេះថា, កម្លាំងជំនាញផ្នែកព្រហ្មទណ្ឌនៃអធិការដ្ឋាននគរបាលស្រុករតនៈមណ្ឌល និងកម្លាំងជំនាញការិយាល័យព្រហ្មទណ្ឌកំរិតស្រាលនៃស្នងការដ្ឋាននគរបាលខេត្តបាត់ដំបង បានសហការជាមួយកម្លាំងនគរបាលខណ្ឌទួលគោក នៃស្នងការដ្ឋាននគរបាលរាជធានីភ្នំពេញ បានធ្វេីការឃាត់ខ្លួនជនសង្ស័យចំនួន០១នាក់ករណីលួចម៉ូតូ០១គ្រឿងបានសម្រេចហើយរត់គេចខ្លួន។
លោកវរសេនីយ៍ឯក ឈឿង គឹមសុង នាយការិយាល័យនគរបាលព្រហ្មទណ្ឌកម្រិតស្រាលបានឱ្យដឹងថា កិច្ចប្រតិបត្តិការឃាត់ខ្លួននេះធ្វើឡើងនៅវេលាម៉ោង ១១និង១០នាទី ថ្ងៃទី២០ ខែវិច្ឆិកា ឆ្នាំ២០២២ តាមបទបញ្ជារបស់លោក កែវ សុជាតិ ព្រះរាជអាជ្ញាអមសាលាដំបូងខេត្តបាត់ដំបង ក្រោយទទួលបានបណ្តឹងរបស់ឈ្មោះ ភន រស់ ភេទប្រុស អាយុ២៥ឆ្នាំ រស់នៅភូមិជាមន្រ្តី ឃុំត្រែង ស្រុករតនៈមណ្ឌល ខេត្តបាត់ដំបង។
សមត្ថកិច្ចបានឱ្យដឹងថាជនសង្ស័យត្រូវបានឃាត់ខ្លួនឈ្មោះ ឈុំ សីហា ភេទប្រុស អាយុ៣០ឆ្នាំ មានទីលំនៅភូមិស្វាយ ឃុំស្វាយពោធិ៍ ស្រុកស្រីសន្ធរ ខេត្តកំពង់ចាម ដែលជនសង្ស័យខាងលើកាលពីថ្ងៃទី១៨ ខែវិច្ឆិកា ឆ្នាំ២០២២ វេលាម៉ោងប្រហែល១៦និង៥០នាទី រូបគេបានធ្វើសកម្មភាពលួចម៉ូតូ០១គ្រឿងរបស់ជនរងគ្រោះនៅចំណុចទំនប់ស៊ីម៉ងត៍ ស្ថិតក្នុងភូមិជាមន្រ្តី ឃុំត្រែង ស្រុករតនៈមណ្ឌល ខេត្តបាត់ដំបង ។
ក្រោយពីឃាត់ខ្លួនសាកសួរជនសង្ស័យបានសារភាពថារូបគេពិតជាបានធ្វេីសកម្មភាពលួចយកម៉ូតូម៉ាកហុងដាឌ្រីម ពណ៌ខ្មៅ ស៊េរីឆ្នាំ២០២២ ពាក់ស្លាកលេខបាត់ដំបង1AQ-7235 លេខតួND125M-6238119 លេខម៉ាស៊ីនND125ME-6238 របស់ជនរងគ្រោះខាងលើពិតប្រាកដមែន បន្ទាប់មកផ្នែកជំនាញកំពុងរៀបចំសំណុំរឿងបញ្ជូនជនសង្ស័យទៅតាមនីតិវិធីច្បាប់ ។ចំណែកវត្ថុតាងម៉ូតូដែលដកហូតត្រូវបានប្រគល់ជូនដល់ម្ចាស់វិញផងដែរ៕
ដោយ៖ចន្ទ លីហ្សា
