សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ យុវជនម្នាក់បានជិះម៉ូតូចុះពីលើស្ពានអាកាសស្ទឹងមានជ័យយ៉ាងលឿន ខណៈមកដល់ផ្លូវកោងមិនប្រយ័ត្នក៏ជ្រុលទៅបុកខឿនថ្មបណ្តាលឱ្យដួលរងរបួសរលាត់ដៃជើង ពេលនោះស្រាប់តែលេចមុខជនសង្ស័យមួយក្រុមមានគ្នាបីនាក់បានមកលើកយកម៉ូតូរបស់ជនរងគ្រោះជិះចេញពីកន្លែងហេតុទៅបាត់។ ហេតុការណ៍នេះបានកើតឡើងកាលពីវេលាម៉ោង៣រំលងអធ្រាត្រឈានចូលថ្ងៃព្រហស្បតិ៍ ទី៨ ខែធ្នូ ឆ្នាំ២០២២ នៅចំណុចផ្លូវកោងខាងក្រោមស្ពានអាកាសស្ទឹងមានជ័យ តាមបណ្ដោយផ្លូវលេខ២៧១ ពីមន្ទីរពេទ្យរុស្ស៊ីមកស្ពានអាកាសស្ទឹងមានជ័យ ចុះទៅខាងវត្តស្ទឹងមានជ័យ ស្ថិតក្នុងសង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ។
ជនរងគ្រោះមានឈ្មោះ លី ឌៀវ ភេទប្រុស អាយុ១៦ឆ្នាំ ជនជាតិខ្មែ មុខរបររត់ឡំប្រឺតា រស់នៅភូមិឫស្សី សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ។ ម៉ូតូដែលបាត់ទៅម៉ាកស៊ុយហ្ស៊ុយគីនិច ពណ៌ស ស៊េរីឆ្នាំ២០១៥ ពាក់ស្លាកលេខភ្នំពេញ1FG-6050 (ត្រូវបានជនសង្ស័យលើកជិះយកទៅបាត់)។
តាមសម្ដីជនរងគ្រោះបានរៀបរាប់ប្រាប់ឱ្យដឹងថា ដំបូងឡើយគាត់បានចេញពីម្ដុំទួលស្លែង ក្នុងគោលបំណង ទៅផ្ទះនៅឯស្ទឹងមានជ័យទី៣ ដោយជិះតាមបណ្ដោយផ្លូវលេខ២៧១ ឡើងលើស្ពានអាកាសស្ទឹងមានជ័យបត់ទៅខាងវត្តស្ទឹងមានជ័យ។ ខណៈជិះម៉ូតូមកដល់ចំណុចកើតហេតុខាងលើដោយសារផ្លូវកោងហើយមិនប្រយ័ត្នក៏បានបុកនឹងខឿនថ្ម បណ្ដាលឱ្យដួលរលាត់ដៃជើង ខណៈពេលនោះក៏លេចមុខជនសង្ស័យចំនួន២នាក់ក្នុងចំណោម៣នាក់បានមកប្រាប់គាត់ឲ្យអង្គុយសិនកុំងើប ចំណែកឯម្នាក់ទៀតបានលើកម៉ូតូរបស់គាត់ដោយគាត់ស្មានតែយកម៉ូតូរបស់គាត់ទុកនៅកៀន ស្រាប់តែជននោះបញ្ចេះម៉ូតូហើយក៏ជិះគេចទៅបាត់ ចំណែកឯពីរនាក់ទៀតក៏ដើរទៅបាត់ឈឹងតែម្ដង។
ក្រោយកើតហេតុ ប្រជាពលរដ្ឋបាននាំជនរងគ្រោះទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលស្ទឹងមានជ័យទី១ ដើម្បីឱ្យសមត្ថកិច្ចជួយធ្វើអន្តរាគមន៍ និងរកម៉ូតូរបស់គាត់មកវិញ៕
IMG_7063 IMG_7067 IMG_7068 IMG_7065
ដោយ ៖ ភារ៉ា ដង្កោ
