សារព័ត៌មាន នគរវត្ត តែងតែនាំមុខគេជានិច្ច
ខ្សែការពារ Pablo Mari របស់ក្លិបកាំភ្លើងធំ Arsenal បានត្រឡប់មកហ្វឹកហាត់វិញជាមួយក្លិបខ្ចីជើង Monza គឺពីរខែបន្ទាប់ពីត្រូវបានជនសង្ស័យចាក់ឲ្យរបួសក្នុងផ្សារទំនើបនៃប្រទេសអ៊ីតាលី។ កីឡាករវ័យ២៩ឆ្នាំរូបនេះបានវះកាត់ដើម្បីបង្កើតឡើងវិញនូវសាច់ដុំដែលរងរបួស២កន្លែងនៅខ្នងរបស់គាត់នៅឯមន្ទីរពេទ្យ Niguarda ក្នុងទីក្រុង Milan ។
បន្ទាប់ពីការប៉ុនប៉ងចាក់សម្លាប់ Mari ដែលបានចូលរួមជាមួយ Arsenal ពីក្រុមប្រេស៊ីល Flamengo ក្នុងខែមករា ឆ្នាំ២០២០ បាននិយាយថា គាត់មានអារម្មណ៍ថា “សំណាង” ដែលបានរួចផុតពីរបួសដែលគំរាមកំហែងដល់អាយុជីវិត។ ខ្សែការពារបានសរសេរលើ Twitter ថា “ត្រឡប់មកក្រុមវិញ មួយជំហានម្តងៗ”។
បុគ្គលិកផ្សារទំនើប Luis Fernando Ruggieri វ័យ៤៧ឆ្នាំបានស្លាប់នៅក្នុងឧប្បត្តិហេតុនៅទីក្រុង Milan កាលពីខែតុលា។ បុគ្គលិកម្នាក់ទៀតត្រូវបានរងរបួសរួមជាមួយអតិថិជន៤នាក់រួមទាំង Mari នៅក្នុងផ្សារទំនើបដែលក្រុមឧក្រិដ្ឋជនប៉ុនប៉ងចាក់សម្លាប់មនុស្សដែលចូលទិញអីវ៉ាន់នៅទីនោះ។
Mari លេងបាន១៩ប្រកួតសម្រាប់ក្រុមកាំភ្លើងធំ មុនពេលចូលរួមជាមួយ Udinese ក្នុងលក្ខខណ្ឌខ្ចីជើងនៅដើមឆ្នាំ។ បន្ទាប់មកគាត់ត្រូវបានគេខ្ចីទៅកាន់ក្លិប Monza ដែលទើបឡើងឋានៈថ្មីក្នុងខែសីហា ៕
ដោយ៖ ភារៈ(រូបភាព ៖ BBC Sport)
