សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ ៖ យ៉ាងហោចណាស់ផ្ទះរបស់ប្រជាពលរដ្ឋចំនួន៣ខ្នង ត្រូវបានអគ្គិភ័យឆាបឆេះ បណ្តាលឲ្យខូចខាតទ្រព្យសម្បត្តិមួយចំនួនធំ និងមនុស្សម្នាក់បានស្លាប់ផងដែរ នៅក្នុងហេតុការណ៍ឆ្លងចរន្តអគ្គិសនីចំនួន២ករណីផ្សេងគ្នា នៅស្រុកបសេដ្ឋ និងស្រុកភ្នំស្រួច ខេត្តកំពង់ស្ពឺ ។ នេះបេីយោងតាមប្រភពព័ត៌មានពីរបាយការណ៍របស់អគ្គស្នងការដ្ឋាននគរបាលជាតិនៅព្រឹកថ្ងៃអាទិត្យទី២៥ ខែធ្នូ ឆ្នាំ២០២២។
របាយការណ៍ដដែលបន្តថា ករណីទី១ ៖ នៅវេលាម៉ោង១និង៣០នាទីព្រឹកថ្ងៃទី២៥ ខែធ្នូ ឆ្នាំ២០២២ នៅចំណុចភូមិត្រពាំងទន្លាប់ ឃុំទួលអំពិល ស្រុកបសេដ្ឋ មានករណីអគ្គីភ័យឆាបឆេះផ្ទះ១ខ្នង ធ្វើពីឈើប្រក់ក្បឿង ទំហំ ៥x៧ ម្ចាស់ឈ្មោះ សយ រ៉ា ភេទស្រី អាយុ ៤៩ឆ្នាំ ។ មូលហេតុ ឆ្លងចរន្តអគ្គីសនី (ផ្ទុះសេខ្សែភ្លើង) ការខូចខាត: -ផ្ទះឆេះអស់ទាំងស្រុង -ស្លាប់មនុស្ស ១នាក់ ឈ្មោះ ឡេង ណារ៉ាត់ ភេទប្រុស អាយុ ២៣ឆ្នាំ (វិកលចរិត) ត្រូវជាកូនម្ចាស់ផ្ទះ -ស្រូវចំនួន ៤បាវ -ទូដាក់សម្លៀកបំពាក់ ១ និងសម្ភារៈប្រើប្រាស់មួយចំនួនតូច។
ករណីទី២ ៖ នៅវេលាម៉ោង ០០.២០នាទីរំលងអធ្រាត្រឈានចូលថ្ងៃទី២៥ ខែធ្នូ ឆ្នាំ២០២២ មានករណីអគ្គីភ័យឆាបឆេះផ្ទះ១ខ្នង ស្ថិតនៅភូមិទី១ ឃុំត្រែងត្រយឹង ស្រុកភ្នំស្រួច ខេត្តកំពងស្ពឺ ធ្វើពីឈើលើបេតុងក្រោម ប្រក់ក្បឿង និងតយ៉ាកប្រក់សង្ក័សី ម្ចាស់ឈ្មោះ ណុក ចន្ថា ភេទប្រុស អាយុ ៤២ឆ្នាំ ។ មូលហេតុនៃការឆាបឆេះ គឺម្ចាស់ផ្ទះដុតទៀនបំភ្លឺ រួចដេកលក់ បណ្តាលឱ្យឆេះរាលដាលដល់ពូក និងឆេះផ្ទះតែម្តង ។
ការខូចខាតក្នុងករណីទី២នេះ រួមមាម ៖ ឆេះផ្ទះចំនួន០២ខ្នង +ផ្ទះទី១ ៖ ទំហំ ៨x១៤ ឆេះអស់ទាំងស្រុង -ម៉ូតូ ២គ្រឿង -ទូឈើសម្រាប់ដាក់ចំនួន -លុយខ្មែរ៤លានរៀល -គ្រែដេចំនួន៤និងសម្ភារ:ផ្ទះបាយមួយចំនួន និងផ្ទះទី២ ៖ ធ្វើអំពីឈើប្រក់សង្ក័សី ទំហំ ០៥x១២ ឆេះអស់ទាំងស្រុង, -ទូឈើចំនួន២, -គ្រែដេកចំនួន២, -លុយខ្មែរ២០ម៉ឺនរៀល ។
ក្នុងហេតុការណ៍ខាងលើ កម្លាំងនគរបាលសហការជាមួយកម្លាំងពាក់ព័ន្ធអន្តរាគមន៍សង្គ្រោះ ប្រើប្រាស់រថយន្តពន្លត់អគ្គីភ័យ ចំនួន៧គ្រឿង (ស្នងការដ្ឋាន២គ្រឿង អធិការដ្ឋានស្រុកភ្នំស្រួច ១គ្រឿង ក្រុងច្បាមន ១គ្រឿង កងរាជអាវុធហត្ថខេត្ត ១គ្រឿង កោះឆ្នេរ១គ្រឿង សាលានគរបាលកម្ពុជា-វៀតណាម ១គ្រឿង) ៕
ដោយ៖ សហការី
