សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ ៖ ស្ត្រីជនសង្ស័យជនជាតិថៃម្នាក់ត្រូវបានកម្លាំងជំនាញកងរាជអាវុធហត្ថខេត្តបញ្ជូនទៅសាលាដំបូងខេត្តបន្ទាយមានជ័យនៅរសៀលថ្ងៃចន្ទ ទី២៦ ខែធ្នូ ឆ្នាំ២០២២នេះ។
សមត្ថកិច្ចប្រាប់ថា នៅថ្ងៃទី២៥ ខែធ្នូ ឆ្នាំ ២០២២នេះ កម្លាំងមូលដ្ឋានកងរាជអាវុធហត្ថក្រុងប៉ោយប៉ែត បានឃាត់ខ្លួននារីជនជាតិថៃម្នាក់ ជាបុគ្គលិកកាស៊ីណូ ករណីរំលោភលើទំនុកចិត្ត ប្រព្រឹត្តកាលពីថ្ងៃទី០១ ខែវិច្ឆិកា ឆ្នាំ២០២២ រហូតដល់ថ្ងៃទី ២៤ ខែធ្នូ ឆ្នាំ២០២២ នៅចំណុចកាស៊ីណូ ផាលេសផ្តាស់ ស្ថិតនៅភូមិសាមគ្គីមានជ័យ សង្កាត់អូរជ្រៅ ក្រុងប៉ោយប៉ែត ព្រមទាំងដកហូតវត្ថុតាងរួមមាន៖ ១.មាសសន្លឹកចំនួន ០៥សន្លឹក, ២.កងដៃលោហៈធាតុពណ៌លឿងចំនួន០១កង, ៣.ឡែបថប់ ពណ៌ខ្មៅ ចំនួន ០១គ្រឿង, ៤.នាឡិកា ចំនួន០១គ្រឿង, ៥.ខ្សែកលោហៈធាតុពណ៌លឿងចំនួន០១ខ្សែ, ៦.ទូរស័ព្ទម៉ាក Iphone 14pro max ចំនួន ០១គ្រឿង, ៧.ប្រាក់ថៃចំនួន ១០០,០០០បាត ហើយយកមកសួនាំនៅមូលដ្ឋានកងរាជអាវុធហត្ថក្រុងតាមនីតិវិធី។ ការឃាត់នេះយោងតាមពាក្យបណ្តឹងឈ្មោះ ប៉េង រស្មី ភេទប្រុស អាយុ៣៨ឆ្នាំ ជនជាតិខ្មែរ មានទីលំនៅភូមិមិត្តភាព សង្កាត់ប៉ោយប៉ែត ក្រុងប៉ោយប៉ែត ។
ជនសង្ស័យជនជាតិថៃឈ្មោះ កុងចៃ ឡាក់សាម៉ី (ហៅលុកម៉ី) ភេទស្រី អាយុ ២៧ឆ្នាំ បច្ចុប្បន្នស្នាក់នៅភូមិសាមគ្គីមានជ័យ សង្កាត់អូរជ្រៅ ក្រុងប៉ោយប៉ែត។
លោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែត ប្រាប់ថា កាលពីនៅថ្ងៃទី ២៤ ខែធ្នូ ឆ្នាំ២០២២ ជនសង្ស័យឈ្មោះ កុងចៃ ឡាក់សាម៉ី (ហៅលុកម៉ី) ភេទស្រី អាយុ២៧ឆ្នាំ ជនជាតិថៃ ជាបុគ្គលិកនៅក្នុងកាស៊ីណូ ផាលេសផ្តាស់ក្រុប មានតួនាទីកាន់ផ្នែកគណនេយ្យផ្ទេរប្រាក់ចេញចូលនៅក្នុងក្រុមហ៊ុន ដោយមានការសង្ស័យខាងក្រុមហ៊ុនបានធ្វើការត្រួតពិនិត្យបញ្ជីរបស់ក្រុមហ៊ុនក៏ស្រាប់តែបានឃើញថាជនសង្ស័យបានផ្ទេរប្រាក់ចេញពីក្រុមហ៊ុនចាប់តាំងពីថ្ងៃទី០១ ខែវិច្ឆិកា ឆ្នាំ២០២២ រហូតដល់ថ្ងៃទី២៤ ខែធ្នូ ឆ្នាំ២០២២ សរុបជាទឹកប្រាក់ទាំងអស់ចំនួន៧,៤៧៧,២៤៤បាត។
ក្រោយឃាត់ខ្លួន និងសួរចម្លេីយ ជនសង្ស័យបានឆ្លើយសារភាពថា រូបខ្លួនពិតជាបានធ្វេីសកម្មភាពលួចផ្ទេរប្រាក់របស់ក្រុមហ៊ុនពិតប្រាកដមែន។ ដោយផ្អែកតាមចម្លេីយសារភាព និងមានវត្ថុតាង ជនសង្ស័យត្រូវបានបញ្ជូនមកកាន់បញ្ជាការដ្ឋានកងរាជអាវុធហត្ថខេត្តបន្ទាយមានជ័យ ចាត់ការបន្តតាមនីតិវិធី។
លោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្តបន្ទាយមានជ័យ ទទួលការងារស្រាវជ្រាវ និងបង្ក្រាបបទល្មេីសបានឱ្យដឹងថា ការបង្ក្រាបករណីខាងលើនេះ ក៏ទទួលបានការអនុញ្ញាតពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ និងមានការសម្របសម្រួលនីតិវិធីពីលោក កើត វណ្ណារ៉េត ព្រះរាជអាជ្ញា អមសាលាដំបូងខេត្តបន្ទាយមានជ័យផងដែរ ។
បច្ចុប្បន្ន ជនសង្ស័យត្រូវបានកម្លាំងជំនាញកងរាជអាវុធហត្ថខេត្តបន្ទាយមានជ័យបញ្ជូនទៅសាលាដំបូងខេត្តបន្ទាយមានជ័យដើម្បីចាត់ការតាមផ្លូវច្បាប់ ចំណែកវត្ថុតាងត្រូវបានកម្លាំងមូលដ្ឋានកងរាជអាវុធហត្ថក្រុងប៉ោយប៉ែតប្រគល់ជូនម្ចាស់ដេីមវិញ៕
ដោយ ៖ វណ្ណា
