សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់ជាបុគ្គលិកប្រមូលសំរាមក្រុមហ៊ុនសុីនទ្រី សង្ស័យងងុយដេកបានធ្លាក់ពីលេីរថយន្តចូលក្រោមកង់កិនស្លាប់ភ្លាមៗនៅនឹងកន្លែង បង្កការភ្ញាក់ផ្អេីលដល់អ្នកដំណេីរកាលពីវេលាម៉ោង៦:៣០នាទីព្រឹក ថ្ងៃពុធទី១៨ ខែមករា ឆ្នាំ២០២៣ នៅត្រង់ចំណុចលើផ្លូវលេខ២១៧ ក្នុងភូមិខ្វា សង្កាត់ដង្កោ ខណ្ឌដង្កោ រាជធានីភ្នំពេញ ។
សពរងគ្រោះមានឈ្មោះ ហឿន សុខហួយ ភេទប្រុស អាយុ២៦ឆ្នាំ មុខរបរបុគ្គលិកប្រមូលសំរាមក្រុមហ៊ុនស៉ីនទ្រី(វេនយប់) មានទីលំនៅភូមិព្រៃទទឹក ឃុំព្រៃទទឹក ស្រុកស៉ីធរកណ្តាល ខេត្តព្រៃវែង (ស្លាប់នៅកន្លែងកើតហេតុ) ។ ចំណែករថយន្តបង្កម៉ាក HINO ពណ៌លឿង គ្មានស្លាកលេខ(របស់ក្រុមហ៊ុនស៉ីនទ្រី) ។
តាមប្រភពព័ត៌មានពីកន្លែងកេីតហេតុបានឱ្យដឹងថា មុនកេីតហេតុ ជនរងគ្រោះ និងក្រុមការងារមានប្រមាណ៣នាក់ទៀតបានអង្គុយនៅលើកាងក្រោយនៃរថយន្តសុីនទ្រីខាងលេី ខណៈរថយន្តកំពុងធ្វេីដំណេីរតាមបណ្ដោយផ្លូវលេខ២១៧ ស្រាប់តែជនរងគ្រោះធ្លាក់ពីលេីរថយន្តចូលកង់ក្រោយកិនស្លាប់ភ្លាមៗនៅនឹងកន្លែងកេីតហេតុតែម្ដង ។ ចំណែកតៃកុង រថយន្តឃេីញសភាពបែបនេះ ក៏ភ័យចុះពីលេីរថយន្តគេចខ្លួនបាត់ស្រមោលទៅ ។
ក្រោយកេីតហេតុ សមត្ថកិច្ចមូលដ្ឋានបានចុះមកដល់ និងសហការជាមួយជំនាញចរាចរណ៍ធ្វេីការវាស់វែងយករថយន្តបង្កទៅរក្សាទុកនៅអធិការដ្ឋាននគរបាលខណ្ឌដង្កោដេីម្បីដោះស្រាយបន្ត។ ចំណែកសពជនរងគ្រោះត្រូវបានសមត្ថកិច្ចធ្វេីកំណត់ហេតុប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណី ៕
ដោយ ៖ ភារ៉ា ដង្កោ
