សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង ៖ ប្រជាពលរដ្ឋប្រមាណ៨គ្រួសារបានសំណូមពរដល់អាជ្ញាធរក្រុងស្វាយរៀងមេត្តាចុះពិនិត្យមើលក្រុមអាជីវករជីករណ្តៅដីយកអាចម៍ដីលក់ជ្រៅពេក អាចបង្កឱ្យបាក់ដីលំនៅឋាននិងដីស្រែរបស់ពួកគាត់ស្ថិតនៅភូមិតារាងបាល់ សង្កាត់គយត្របែក ក្រុងស្វាយរៀង។
បើតាមក្រុមប្រឹក្សាសង្កាត់គយត្របែក បានឱ្យដឹងថា ម្ចាស់អាជីវកម្មជីករណ្តៅដី យកអាចម៍ដីលក់នេះ មានឈ្មោះ តូ ភេទប្រុស ហើយនៅក្នុងកិច្ចសន្យានៃច្បាប់ធ្វើអាជីវកម្ម គឺជីករណ្តៅជម្រៅ០៥ម៉ែត្រ និងទុកចំណីរណ្តៅទំហំ០៥ម៉ែត្រ បើមានផលប៉ះពាល់ត្រូវសងសំណងជូនប្រជាពលរដ្ឋ។ ប៉ុន្តែជាក់ស្តែង ឈ្មោះតូ ម្ចាស់អាជីវកម្មនោះអនុវត្តខុសកិច្ចសន្យា ដោយជីករណ្តៅដីជ្រៅជម្រៅ១០ម៉ែត្រ ហើយទុកចិញ្ចើមចំណីរណ្តៅដីតែ២ម៉ែត្រ បង្កឱ្យបាក់ដីលំនៅឋាន និងដីស្រែរបស់ប្រជាពលរដ្ឋ ហើយដឹកដីលើសទ្រុងបង្កឱ្យធ្លាក់អាចម៍ដីលើផ្លូវក្រាលកៅស៊ូ នាំឱ្យមានការហុយ និងរអិលពិបាកក្នុងការធ្វើដំណើររបស់ប្រជាពលរដ្ឋទៀតផង។
ចំណែកឯលោក តូ ម្ចាស់អាជីវកម្មជីករណ្តៅដីយកអាចម៍ដីលក់វិញ ក៏បានប្រាប់ឱ្យដឹងដែរថា លោកមិនគេចវេះទេ គាត់បានប្រាប់ម្ចាស់ដីដែលប៉ះពាល់ហើយថា លោកនឹងចាក់ដីបំពេញកន្លែងដែលបាក់ឲ្យស្មើដូចដើមវិញ ក៏ប៉ុន្តែដោយសារមានភ្លៀង មិនអាចដឹកដីចូលទៅចាក់បាន ទើបខ្លួនដឹកគ្រឿងចក្រចេញ ចាំមើលរាំងភ្លៀង ឬចូលឆ្នាំចិនហើយ ខ្លួននឹងដឹកដីមកចាក់លុបឲ្យស្មើវិញហើយ។
លោក តូ បានបញ្ជាក់ទៀតថា ការជីកជ្រៅ ព្រោះខ្លួនទិញដីថ្លៃ ១ហិកតាថ្លៃ៧ម៉ឺនដុល្លារ បើជីកជម្រៅ៥ម៉ែត្រគឺខាត ហើយច្បាប់ឱ្យជីកជម្រៅ៥ម៉ែត្រ ខ្លួនបានបង់សួយសារអាកររួចហើយ រីឯការជីកថែមជម្រៅ៥ម៉ែត្រទៀត (១០ម៉ែត្រ) គឺបង់សួយសារអាករឱ្យមន្ទីររ៉ែនិងថាមពលខេត្តស្វាយរៀងបន្ថែម គឺមិនខុសច្បាប់ទេ ព្រោះមន្ទីរអនុញ្ញាត និងបង់សួយសារអាកររួចហើយ ។
ពាក់ព័ន្ធករណីខាងលើនេះ លោក បាត់ សាក់ ប្រធានការិយាយល័យធនធានរ៉ែ នៃមន្ទីររ៉ែនិងថាមពលខេត្តស្វាយរៀង បានឱ្យអ្នកសារព័ត៏មានដឹងថា ច្បាប់អនុញ្ញាត គឺឱ្យជីកជម្រៅ៥ម៉ែត្រ និងទុកចំណីរណ្តៅ៥ម៉ែត្រ បើម្ចាស់អាជីវកម្មជីកដល់១០ម៉ែត្រ ចាំលោកចុះទៅពិនិត្យមើល បើមានផលប៉ះពាល់ដីស្រែប្រជាពលរដ្ឋ លោកនឹងសុំគោលការណ៍កោះហៅមកដោះស្រាយ ៕
ដោយ៖ សុថាន
