សារព័ត៌មាន នគរវត្ត តែងតែនាំមុខគេជានិច្ច
ខេត្តត្បូងឃ្មុំ-កំពង់ចាម៖ នាំគ្នាទៅទទួលយកការចាក់វ៉ាក់សាំងកូវីដ-១៩ ដូសជំរុញត្រឹមត្រូវតាមវេន និងបង្កេីនការប្រុងប្រយ័ត្នការពារខ្លួន “៣ការពារ និង៣កុំ” ជា ពិសេសនារដូវចូលឆ្នាំប្រពៃណីយ៍ជាតិខ្មែរខាងមុខនេះ នៅតែជាមធ្យោបាយដ៏ល្អប្រសេីរបំផុតក្នុងការជួយ សង្គ្រោះអាយុជីវិតមនុស្សចេញពីមច្ចុរាជកូវីដ-១៩ និងបន្តឱ្យដំណេីរការសេដ្ឋកិច្ចគ្រួសារ-សង្គម មាននិរន្តរ៍ភាពយូរអង្វែងតទៅ និងមានកំណេីនជាលំដាប់ក្រោមការដឹកនាំដ៏ត្រឹមត្រូវ ប៉ិនប្រសប់ និងឈ្លៀសវៃរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជាប្រសាសន៍ពន្យល់ដល់សិស្សានុសិស្ស និងលោកគ្រូ-អ្នកគ្រូ ព្រមទាំងប្រជា ពលរដ្ឋនៃខេត្តត្បូងឃ្មុំ របស់លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាលនិងជាប្រធានគណកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស (គ.វ.ក-១៩) ក្នុងអំឡុង ពេលបំពេញបេសកកម្មនាថ្ងៃទី៧-៨ ខែកុម្ភៈ ឆ្នាំ២០២៣ នៅខេត្តត្បូងឃ្មុំ និងខេត្តកំពង់ចាម។
លោកស្រីប្រធាន គ.វ.ក-១៩ បានបន្តថា ប្រសិទ្ធភាពវ៉ាក់សាំងកូវីដ-១៩ ដែលបង្កេីតឱ្យមានអង់ទីគ័រប្រឆាំងនឹងវីរុសកូវីដ-១៩ កេីតមានឡេីងក្រោយពីបុគ្គលបានចាក់វ៉ាក់សាំងកូវីដ-១៩ ដូសមូលដ្ឋាន នឹងដូសជំរុញជាបន្តបន្ទាប់តាមពេលវេលាដែលបានកំណត់ ឫវេនត្រូវចាក់ បានត្រឹមត្រូវ។
ក្នុងពេលចុះពិនិត្យការងារចាក់វ៉ាក់សាំងកូវីដ-១៩ នៅស្រុកមេមត់នៃខេត្តត្បូងឃ្មុំ និងនៅតាមរោងចក្រ និងសាលារៀននៃខេត្តកំពង់ចាមនោះ លោកស្រីឱ វណ្ណឌីន ក៏បានលើកឡើងទៅកាន់សិស្សានុសិស្ស លោកគ្រូ -អ្នកគ្រូ ថ្នាក់ដឹកនាំនៃវិទ្យាល័យ និងកម្មករ-កម្មការិនីរោងចក្រផងដែរថា រហូតមកដល់បច្ចុប្បន្ននេះ កម្ពុជាបានដំណើរការចាក់វ៉ាក់សាំងបង្ការជំងឺកូវីដ-១៩ ដូសជំរុញ ដល់ដូសទី៦ ហើយៗមូលហេតុដែលយើងត្រូវចាក់វ៉ាក់សាំងកូវីដ-១៩ ដូសជំរុញជាបន្តបន្ទាប់រហូត ដល់ ដូសទី៦ ក៏ព្រោះតែកងការពារក្នុងរាង្គកាយរបស់យើង មិននៅស្ថិតថេរបានយូរនោះទេ ពោល គឺត្រូវធ្លាក់ចុះជាបណ្តេីរបន្ទាប់ពីចាក់ដូសចុងក្រោយបាន ៤ខែ ហេីយនឹងបន្តធ្លាក់ចុះអស់សឹងតែដល់សូន្យប្រសិនបេីយេីងពន្យាការចាក់ដូសជំរុញលេីសពី ៨ខែ ឡេីងទៅ។
សូមកត់សម្គាល់ថា បេសកកម្មចុះពិនិត្យការងារចាក់វ៉ាក់សាំងកូវីដ-១៩ ដូសជំរុញខាងលេីនេះ ធ្វើឡើងនៅភូមិសាស្ត្រក្នុងខេត្តត្បូងឃ្មុំចំនួន ៦ទីតាំង រួមមាន៖ រោងចក្រVG2, វិទ្យាល័យហ៊ុន សែន ពញាក្រែក, វិទ្យាល័យ មេមត់, មណ្ឌលសុខភាពស្លា, វិទ្យាល័យហ៊ុន សែន តំបែ និងវិទ្យាល័យសម្តេចម៉ែ ត្បូងឃ្មុំ និងបន្តចុះពិនិត្យនៅទឹកដីខេត្តកំពង់ចាម នៅតាមទីតាំងមួយចំនួនមានដូចជា វិទ្យាល័យ ព្រះសីហនុ, ផ្សារធំ កំពង់ចាម, រោងចក្រមេតថេត និងរោងចក្រសាន់ស៊ូ។
រាល់លេីកនៅពេលបានជួបជាមួយប្រជាពលរដ្ឋ សិស្សា នុសិស្ស និងកម្មករ កម្មការិនីនៅតាមទីតាំងដែលក្រុម ការងារបានទៅដល់ លោកស្រី ឱ វណ្ណឌីន ដែលជាអ្នកនាំពាក្យក្រសួងសុខាភិបាល ផងដែរនោះ បានខិតខំធ្វេីការពន្យល់ណែនាំបន្ថែមអំពីសារ:ប្រយោជន៍ទទួលបានពីការចាក់វ៉ាក់សាំងកូវីដ-១៩ ដូសជំរុញបន្តបន្ទាប់ ហានិភ័យនៃការចាក់មិនត្រឹមត្រូវ និងជំរុញឱ្យបុគ្គលគ្រប់រូប ជាពិសេស អ្នកដែលមានជំងឺប្រចាំកាយ និងជនវ័យចាស់ ចាំបាច់បំផុតទៅទទួលការចាក់វ៉ាក់សាំងកូវីដ-១៩ ដូសជំរុញ ជាបន្តបន្ទាប់ យ៉ាងហោចណាស់ឲ្យបាន ៦ដូស សម្រាប់បុគ្គលម្នាក់ៗ ព្រោះថា បេីចាក់ត្រឹមតែដូសមូលដ្ឋាននៃវ៉ាក់សាំងកូវីដ-១៩នោះ វាមិនគ្រប់គាន់នោះទេ។ ទោះបីជាយើងទាំងអស់គ្នាបានចាក់វ៉ាក់សាំងកូវីដ-១៩ ដូសជំរុញបាន ៦ដូសក្តី ក៏មិនត្រូវភ្លេចពីការបន្តការការពាខ្លួន “៣ការពារ និង៣កុំ” ទៅតាមរបៀបនៃការរៀនរស់នៅជាមួយវត្តមាននៃវីរុសកូវីដ-១៩ ឱ្យបានត្រឹមត្រូវផងដែរ។
ក្នុងឱកាសនោះដែរ លោកស្រីវេជ្ជបណ្ឌិត បានផ្ដល់អនុសាសន៍ណែនាំផ្តាំផ្ញេីដល់សិស្សានុសិស្ស លោកគ្រូ- អ្នកគ្រូ នៅតាមសាលារៀន វិទ្យាល័យ កម្មករ-កម្មការិនីនៅតាមរោងចក្រ និងបងប្អូនអាជីវករលក់ដូរនៅតាមទីផ្សារទាំងអស់ សូមកុំជឿតាមពាក្យឃោសនារបស់ជនអគតិមួយចំនួន ដែលបានធ្វើសកម្មភាពបំភ្លៃការពិតថាវ៉ាក់សាំងកូវីដ-១៩ មានផលប៉ះពាល់ដល់សុខភាព និងគ្មានប្រសិទ្ធភាព។
គូសបញ្ជាក់លេីចំណុចនេះ លោកជំទាវបានលេីកឡេីងថា វ៉ាក់សាំងបង្ការជំងឺកូវីដ-១៩ ទាំងអស់ដែលបាន និងកំពុងប្រើប្រាស់នៅកម្ពុជា គឺសុទ្ធតែមានការទទួលស្គាល់ពីអង្គការសុខភាពពិភពលោក (WHO) ត្រឹមត្រូវ។ លោកជំទាវបានបន្ថែមទៀតថា ប្រសិនបើវ៉ាក់សាំងកូវីដ-១៩ នេះធ្វើទុក្ខ និងគ្មានប្រសិទ្ធភាព ម៉្លេះក្រុមគ្រូពេទ្យដែលជាមន្ត្រីជួរមុខ នឹងមិនទទួលការចាក់វ៉ាក់សាំងកូវីដ-១៩ នេះរហូតដល់ដូសទី៦ឡើយ តួយ៉ាងរូបលោកជំទាវផ្ទាល់ក៏បានចាក់វ៉ាក់សាំងកូវីដ-១៩ ដូសទី៦ រួចរាល់ហេីយដែរ។
លោកស្រីរដ្ឋលេខាធិការ បានលេីកឡេីងនូវចំណុចសំខាន់ៗដែលបានណែនាំបន្ថែមនៅក្នុងពិធីសំណេះ សំណាលនៅតាមវិទ្យាល័យ រោងចក្រ និងទីផ្សារនានានៃខេត្តត្បូងឃ្មុំ និងកំពង់ចាម មានដូចជា៖
១) នាឱកាសចូលឆ្នាំថ្មីប្រពៃណីជាតិខ្មែរ កាន់តែខិតជិតមកដល់ សូមបងប្អូនជនរួមជាតិទាំងអស់មេត្តាបើកបរដោយប្រុងប្រយ័ត្ន គោរពសិទ្ធិគ្នាទៅវិញទៅមក,គោរព ច្បាប់ចរាចរណ៍ ដើម្បីជៀសផុតពីបញ្ហាគ្រោះថ្នាក់ចរា ចរណ៍។ ចៀសវាងពិសាគ្រឿងស្រវឹងនៅពេលបេីកបរ។
២) យុវជន-យុវតីទាំងអស់ត្រូវជៀសឆ្ងាយពីគ្រឿង ញៀន ពីព្រោះគ្រឿងញៀនជាអាវុធដ៏កាចសាហាវបង្កឲ្យខាតបង់ពេលវេលា ខាតបង់ធនធាន និងបង្កមហន្តរាយដល់បុគ្គល ដល់គ្រួសារ និងសង្គមជាតិទាំងមូល។ ដូច្នេះ យុវជនទាំងអស់ត្រូវមានម្ចាស់ការខ្លួនឯង កុំផុងខ្លួនស្ដាប់តាមការអូសទាញរបស់មនុស្សជុំវិញខ្លួនឲ្យប្រើប្រាស់គ្រឿងញៀនតាមគ្រប់រូបភាព។
៣) ពិតណាស់មនុស្សយើងរស់នៅបានដោយសារការបរិភោគចំណីអាហារ ដូចនេះ សូមគិតអំពីសុវត្ថិភាព អនាម័យ ចំណីអាហារល្អ ដែលមិននាំឲ្យមានបញ្ហាសុខភាព និងមិនបង្កគ្រោះថ្នាក់ដល់អាយុជីវិត។ សូមកុំយកមេតាណុលទៅលាយធ្វេីស្រាស ឫលាយបញ្ចូលគ្នានូវស្រាច្រេីនមុខ ជាមួយនឹងភេសជ្ជ:ផ្សេងៗ ដែលធ្វេីឱ្យពុល ម្យ៉ាងវិញទៀត ត្រូវខិតខំរក្សាសុខភាពឱ្យបានល្អ ហេីយយើងគួរគប្បីកុំពិសារប្រៃពេក ផ្អែមពេក និងអាហារដែលមានជាតិខ្លាញ់ច្រើន៕
ដោយ៖ សូរិយា
