សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ អបអរសាទរទៅកាន់តារាសម្តែងស្រីវ័យក្មេង ចន្ធី ដាឡែន ទទួលបានចំណាត់ថ្នាក់លំដាប់រងទី២ពីកម្មវិធី ប្រកួតធីតាឯកសង្ក្រាន្ត រដូវកាលទី៤។ ដំណឹងនេះបានធ្វើឲ្យក្រុមអ្នកគាំទ្រតារាសម្តែងរូបនេះផ្ញើសារជូនពរលើកទឹកចិត្តជាហូរហែទៅកាន់នាងផងដែរ។
គេចាំបានថាមុននេះ ចន្ធី ដាឡែន នាងបានលើកឡើងថាមិនមែនចូលរួមសម្តែងព្រោះចង់បានភាពល្បីល្បាញនោះទេ ប៉ុន្តែចង់បំពេញក្តីបំណងពីតូចរបស់នាងគឺចង់ក្លាយខ្លួនជាតួអង្គទេវត្តាឆ្នាំថ្មី ដែលត្រូវបានរៀបចំផលិតដោយក្រសួងព័ត៌មាននោះ។ តារាស្រីរូបនេះក៏ថ្លែងក្តីរំភើបរីករាយដែលបានតំណាងជាបេក្ខភាពតំណាងខេត្តត្បូងឃ្មុំ និងអាចឈានដល់តំណាក់កាលនៃវគ្គផ្តាច់ព្រ័ត្រដែលនៅសល់បេក្ខភាព៧រូបចុងក្រោយនោះ។ នាងថាចូលដល់វគ្គចុងក្រោយនេះនាងមានក្តីរំពឹងខ្ពស់ថានឹងទទួលបានតំណែងណាមួយពីកម្មវិធីប្រកួត ខណៈដែលវិញ្ញាសាដែលនាងធ្លាប់បានចូលរួមកន្លងមកគឺនាងធ្វើបានល្អ។ នាងថាមួយរយៈចុងក្រោយនេះនាងផ្អាកការងារសិល្បៈច្រើនដើម្បីសំងំហ្វឹកហាត់ លើវិញ្ញាសាខ្លះដើម្បីប្រាកដថានាងនឹងធ្វើបានល្អ ហើយពេលនេះលទ្ធផលគឺនាងពិតជាពេញចិត្ត និងទន្ទឹងរងចាំអ៊ុតថ្ងៃប្រកួតផ្តាច់ព្រ័ត្រនាពេលដ៏ខ្លីខាងមុខ។ នាងថាក្រោយបញ្ចប់ការប្រកួតនឹងនៅតែបន្តសំរុកថតភាពយន្តមួយចំនួនដដែលខណៈដែលរឿងខ្លះនាងទទួលរួចហើយ និងកំពុងចចារភាពយន្តមួយចំនួនទៀត ដែលនាងរំពឹងថាការប្រកួតនេះមិនត្រឹមតែអាចបំពេញក្តីស្រមៃទេ ថែមទាំងជាបទពិសោធន៍ជីវិតថ្មីបន្ថែមទៀតសម្រាប់នាង។ នាងបានលើកឡើងមុននេះដែរថា នេះជាថ្ងៃដែលនាង ទន្ទឹងរង់ចាំ ហើយនាងពិតជារំភើបដែលបានតំណាងអោយខេត្តត្បូងឃ្មុំ ហើយក៏ទទួលបាន ជ័យលាភីលំដាប់រងទី២។ នាងសូមថ្លែងអំណរគុណទៅដល់បងប្អូនដែលនៅតាមបណ្ដាញសង្គម និងអ្នកម្តាយបងប្អូនញាតិរបស់នាង ដែលតែងតែគ្រាំទ្រនិងលើកទឹកចិត្តនិងផ្តល់ក្តីស្រលាញ់ដល់រូបនាងខ្ញុំជាច្រើនកន្លងមក ។
គួរបញ្ជាក់ដែរថាកម្មវិធីធីតាឯកសង្ក្រាន្តត្រូវបានររៀបចំប្រកួតដោយក្រុមហ៊ុន FIRST UNITED NETWORK និង ស្ថានីយទូរទស្សន៍ ជាតិកម្ពុជា ដែលបានបង្កើតកម្មវិធីមួយនេះឡើងសម្រាប់ជាប្រយោជន៍ដល់សង្គមនិងផ្តល់ឱកាសដល់យុវត្តីខ្មែរដើម្បីបញ្ចេញសមត្ថភាពនិងយល់ដឹងពីវប្បធម៍ខ្មែរ។ក្រោយការប្រកួតម្ចាស់ជ័យលាភីម្ចាស់មកុដបានទៅលើកញ្ញា អ៊ិន ប៉ូលិកា តំណាងខេត្តសៀមរាប។ លំដាប់រងទី១បានទៅលើ កញ្ញា សៀ គីមស័ង តំណាងខេត្តកំពង់ចាម ៕
ដោយ ៖ វឌ្ឍនា
