សារព័ត៌មាន នគរវត្ត តែងតែនាំមុខគេជានិច្ច
ខេត្តកំពត៖ នៅរសៀលថ្ងៃទី២៤ខែកុម្ភៈឆ្នាំ២០២៣នេះលោកបណ្ឌិត ម៉ៅ ធនិន អភិបាលនៃគណៈអភិបាលខេត្តកំពតបានដឹកនាំមន្ត្រីជំនាញពាក់ព័ន្ធចុះពិនិត្យ ការងាររៀបចំសួនច្បារនិងឆ្នេរចន្លោះ ស្ពានថ្មនិងស្ពានរថភ្លើង ក្នុងសង្កាត់កំពង់បាយ ក្រុងកំពត និងបានណែនាំឱ្យក្រុមការងារដាក់គ្រឿងចក្របន្ថែមទៀត ធ្វើយ៉ាងណាកាយដីស្អុយចេញពីមាត់ព្រែក និងបូមខ្សាច់ដាក់ចេញជាឆ្នេរឱ្យបានរួចរាល់មុនចូលឆ្នាំប្រពៃណីជាតិខ្មែរខាងមុខនេះ ។
សូមរំលឹកថា ក្រោមការដឹកនាំរបស់លោកម៉ៅ ធនិន ជាអភិបាលខេត្ត ក្នុងរយៈពេលត្រឹមតែជាងមួយឆ្នាំប៉ុណ្ណោះ ហេដ្ឋារចនាសម្ព័ន្ធ សួនច្បារ ផ្លូវបេតុងនិងផ្លូវធ្វើដំណើរនានាក្នុងខេត្តត្រូវបានស្ថាបនា និងកែលម្អពង្រឹងគុណភាពឡើងវិញ។ ជាមួយគ្នានេះឆ្នេរខ្សាច់កម្សាន្តចំនួន៣ទីតាំង បាននិងកំពុងលេចចេញជារូបរាងបណ្តើរៗសម្រាប់ទទួលភ្ញៀវទេសចរដែលមកសម្រាកកម្សាន្តក្នុងខេត្ត។
តាមប្រសាសន៍របស់់លោកបណ្ឌិតអភិបាលខេត្តបានឱ្យដឹងថា ចំពោះឆ្នេរខ្សាច់ដែលមានទីតាំងចន្លោះពីស្ពានថ្ម (ស្ពានព្រែកកំពង់បាយ) រហូតដល់ស្ពានដែក (ស្ពានរថភ្លើង) នឹងរៀបចំឱ្យបានមុនថ្ងៃចូលឆ្នាំខ្មែរខាងមុខ ដើម្បីអាចឱ្យភ្ញៀវទេចរមុជទឹកបាន។
បច្ចុប្បន្ននេះ លោកអភិបាលខេត្តបានចុះពិនិត្យដោយផ្ទាល់ជាញឹកញាប់ និងបានជំរុញអ្នកបច្ចេកទេស ព្រមទាំងក្រុមជាងពន្លឿនការស្ថាបនាឆ្នេរនេះឱ្យបានហើយរួចរាល់តាមកាលកំណត់៕
ដោយ៖ចន្ទ លីហ្សា
