សារព័ត៌មាន នគរវត្ត តែងតែនាំមុខគេជានិច្ច
ការប្រកួតជម្រុះ FA Cup ជុំទី៥បានបញ្ចប់ហើយក្នុងនោះបានរកឃើញ៨ក្រុមឡើងទៅកាន់វគ្គ១/៤ផ្តាច់ព្រ័ត្រនៅរដូវកាលនេះ។ ក្រុមមេឃខៀវ Manchester City នឹងធ្វើជាម្ចាស់ផ្ទះទទួលក្រុម Burnley របស់អតីតកីឡាករ Vincent Kompany ក្នុងវគ្គ១/៤ផ្តាច់ព្រ័ត្រនៃពានរង្វាន់ FA Cup ។
វីរបុរសរបស់ Man City កីឡាករ Kompany ដែលបានលេងឱ្យក្លិបពីឆ្នាំ២០០៨ ដល់ឆ្នាំ២០១៩ បានដឹកនាំក្រុម Burnley ទៅកាន់កំពូលតារាងនៃក្របខ័ណ្ឌ Championship ក្នុងរដូវកាលដំបូងរបស់គាត់ដែលដឹកនាំ។
ក្រុម Grimsby មកពី League Two ដែលជាក្រុមដែលមានចំណាត់ថ្នាក់ទាបបំផុតដែលនៅសេសសល់ក្នុង FA Cup ត្រូវប៉ះក្រុម Brighton & Hove Albion ហើយ Manchester United ធ្វើជាម្ចាស់ផ្ទះទទួល Fulham ។
ក្រុម Sheffield United ប្រកួតជាមួយក្រុម Blackburn ដែលជាគូប្រជែង Championship ក្នុងការប្រកួតចុងក្រោយជាមួយគ្នា។ ក្រុម Sheffield United បានយលឈ្នះ Tottenham Hotspur ដែលស្ថិតក្នុងចំណាត់ថ្នាក់លេខ៤ក្នុងក្របខ័ណ្ឌ Premier League កាលពីថ្ងៃពុធ ខណៈដែលក្រុមBlackburn បានធ្វើឱ្យក្រុម Leicester City ខកចិត្តក្នុងការប្រកួតជុំទី៥របស់ពួកគេ។
ក្រុម Grimsby បានបង្កើតលទ្ធផលនៃការប្រកួតជុំទី៥ ដោយការយកឈ្នះ ២-១ នៅលើក្រុម Southampton នៃក្របខ័ណ្ឌ Premier League ដើម្បីឈានទៅកាន់វគ្គ១/៤ផ្តាច់ព្រ័ត្រនៃ FA Cup ជាលើកដំបូងគិតចាប់តាំងពីឆ្នាំ១៩៣៩។
ការប្រកួតជម្រុះជុំទី៥ដែលបានបញ្ចប់កាលពីរាត្រីថ្ងៃពុធគឺក្រុម Man City បានយកឈ្នះ Bristol City ៣-០, Fulham ឈ្នះ Leeds ២-០, Blackburn ឈ្នះ Leicester City ២-១, Brighton ឈ្នះ Stoke ១-០ ដែលក្រុមទាំងនេះបានប្រកួតកាលពីថ្ងៃទី២៨ កុម្ភៈ។ ចំណែកក្រុម Grimsby យកឈ្នះ Southampton ២-១, ក្រុម Burnley ឈ្នះ Fleetwood ១-០, Man Utd ឈ្នះ West Ham ៣-១ និង Sheffield United ឈ្នះ Tottenham ១-០ ដែលក្រុមទាំងនេះបានប្រកួតកាលពីរាត្រីថ្ងៃទី១ឈានចូលថ្ងៃទី២ មីនា។
សម្រាប់ការប្រកួតវគ្គ៨ក្រុមចុងក្រោយនៃពានរង្វាន់ FA Cup នឹងត្រូវលេងពីថ្ងៃទី១៧ដល់ថ្ងៃទី១៩ ខែមីនា។ ការចាប់ឆ្នោតវគ្គ៨ក្រុមចុងក្រោយ FA Cup៖ Manchester City ប៉ះ Burnley, Manchester United ប៉ះ Fulham, Brighton & Hove Albion ប៉ះ Grimsby Town និង Sheffield United ប៉ះ Blackburn Rovers ៕
ដោយ៖ ភារៈ(រូបភាព ៖ BBC Sport)
