លោក ស៊ី ជីនពីង រិះគន់សហរដ្ឋអាមេរិកចំពោះការដឹកនាំកិច្ចខិតខំប្រឹងប្រែងដើម្បីទប់ស្កាត់ប្រទេសចិន

ចែករំលែក៖

ប្រធានាធិបតី Xi Jinping បានចោទប្រកាន់លោកខាងលិចដែលដឹកនាំដោយសហរដ្ឋអាមេរិកថា បានព្យាយាមទប់ស្កាត់និងរារាំងការអភិវឌ្ឍរបស់ប្រទេសចិន។ នៅក្នុងសុន្ទរកថានាពេលថ្មីៗនេះ ប្រធានាធិបតីចិនលោក Xi Jinping បានរិះគន់យ៉ាងចំៗទៅលើសហរដ្ឋអាមេរិកថាជាអ្នកដឹកនាំកិច្ចខិតខំប្រឹងប្រែងរបស់លោកខាងលិចដើម្បីទប់ស្កាត់ប្រទេសចិន។
លោក Xi បានធ្វើការចោទប្រកាន់នេះ ក្នុងអំឡុងពេលនៃកិច្ចប្រជុំមួយកាលពីថ្ងៃទី ៦ ខែមីនា ជាមួយទីប្រឹក្សានយោបាយរបស់ប្រទេស ដែលកំពុងចូលរួមសម័យប្រជុំដំបូងនៃសន្និសីទប្រឹក្សានយោបាយប្រជាជនចិន (ហៅម្យ៉ាងទៀតថា សន្និសីទប្រឹក្សានយោបាយ) ថ្នាក់ទី 14 ក្នុងរដ្ឋធានីប៉េកាំង។
ជាពិសេស លោក Xi បានកត់សម្គាល់ថា «បណ្តាប្រទេសលោកខាងលិចដែលដឹកនាំដោយសហរដ្ឋអាមេរិកបានព្យាយាមទប់ស្កាត់ប្រទេសចិនដែលជាបញ្ហាប្រឈមដ៏លំបាកដែលមិនធ្លាប់មានពីមុនមកចំពោះការអភិវឌ្ឍរបស់ប្រទេស។
ដូច្នេះហើយ លោកបានអំពាវនាវឱ្យរក្សាភាពស្ងប់ស្ងាត់ និងការប្តេជ្ញាចិត្តជាយុទ្ធសាស្ត្រ បន្តការរីកចម្រើន ទន្ទឹមនឹងការធានាស្ថិរភាព ការផ្តួចផ្តើមគំនិត … ដើម្បីដោះស្រាយជាមួយនឹងការផ្លាស់ប្តូរយ៉ាងជ្រាលជ្រៅ និងស្មុគស្មាញនៃស្ថានភាពក្នុងស្រុកនិងអន្តរជាតិ។
កាសែត Wall Street Journal បាននិយាយថា ការអត្ថាធិប្បាយរបស់លោក Xi លើគោលនយោបាយអាមេរិកគឺកម្រណាស់ ពីព្រោះមេដឹកនាំចិនតែងតែបដិសេធការរិះគន់សហរដ្ឋអាមេរិកដោយផ្ទាល់នៅក្នុងសុន្ទរកថាសាធារណៈ៕ ដោយ៖ ធីរីណា