សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ គ្រោះអគ្គិភ័យមួយបានឆាបឆេះផ្ទះប្រជាពលរដ្ឋចំនួន២ខ្នងយ៉ាងសន្ធោសន្ធៅបង្កការភ្ញាក់ផ្អេីលដល់ប្រជាពលរដ្ឋនិងសមត្ថកិច្ចរួមទាំងក្រុមរថយន្តពន្លត់អគ្គិភ័យមកធ្វើអន្តរាគមន៍កាលពីវេលាម៉ោង៨និង៣០នាទីព្រឹក ថ្ងៃទី២៤ ខែមីនា ឆ្នាំ២០២៣ ស្ថិតនៅភូមិភា សង្កាត់ប្រទះឡាង ខណ្ឌកំបូល។
ម្ចាស់ផ្ទះឈ្មោះ ហេង វី ភេទប្រុស អាយុ៤១ឆ្នាំ មុខរបរលក់ដូរ ផ្ទះដែលត្រូវអគ្គិភ័យឆាបឆេះនោះមានទំហំ ទទឹង៦ម៉ែត្របណ្តោយ៨ម៉ែត្រ ប្រភេទឈេីលេីថ្មក្រោម។
ចំណែកម្ចាស់ផ្ទះមួយខ្នងទៀតឈ្មោះ ឆន វែង ភេទប្រុស អាយុ៥២ឆ្នាំ ផ្ទះដែលត្រូវអគ្គិភ័យឆាបឆេះនោះទំហំទទឹង៦ម៉ែត្រនិងបណ្តោយ៨ម៉ែត្រប្រភេទឈេីលេីថ្មក្រោម។
តាមប្រភពព័ត៌មានបានឱ្យដឹងថា មុនពេលកេីតហេតុខណៈម្ចាស់ផ្ទះកំពុងលក់ដូរនៅខាងក្រោមស្រាប់តែឆ្លងចរន្តអគ្គិសនីឆាបឆេះផ្ទះឈ្មោះហេង វី ផ្នែកខាងលេីបង្កជាអណ្តាតភ្លេីងឆាបឆេះយ៉ាងសន្ធោសន្ធៅ ភ្លាមៗនោះប្រជាពលរដ្ឋដែលនៅក្បែរនាំគ្នាជួយដងទឹកមកជះពន្លត់ដែរ តែដោយសារភ្លេីងបានឆាបឆេះខ្លាំងឡេីងៗក៏បានរាលដាលដល់ផ្ទះមួយខ្នងទៀតដែលនៅជាប់គ្នា ទេីបរាយការណ៍ទៅសមត្ថកិច្ចនឹងក្រុមពន្លត់អគ្គិភ័យមកធ្វើអន្តរាគមន៍ភ្លាមៗ។
ក្នុងរង្វង់ប្រតិបត្តិការខាងលេីនេះរថយន្តពន្លត់អគ្គិភ័យចំនួន៨គ្រឿងមកធ្វើអន្តរាគមន៍ ក្នុងនោះមានរថយន្តពន្លត់អគ្គិភ័យរបស់កងរាជអាវុធហត្ថ១គ្រឿងមិនបានបាញ់ពន្លត់ទេ រថយន្តពន្លត់អគ្គិភ័យរបស់ក្រុមហ៊ុនស្រាបៀរ កម្ពុជា១គ្រឿងមិនបានបាញ់ពន្លត់ទេ រថយន្តពន្លត់អគ្គិភ័យស្នងការដ្ឋាននគរបាលរាជធានី២គ្រឿងបាញ់ទឹកពន្លត់អស់ទាំង២គ្រឿង រថយន្តរបស់កងពលតូចលេខ៧០ចំនួន២គ្រឿងបាញ់អស់ទាំង២គ្រឿង រថយន្តរបស់បុរី សង្ឃឹមថ្មី២គ្រឿងបាញ់អស់ទាំង២គ្រឿង។ ចំណែកផ្ទះចំនួន២ខ្នងត្រូវបានអគ្គិភ័យឆាបឆេះអស់ទាំងស្រុង។
ក្នុងហេតុការណ៍គ្រោះអគ្គិភ័យខាងលេីនេះមិនមានមនុស្សរងរបួសនោះទេ៕
ដោយ៖សុខាសែនជ័យ
