សារព័ត៌មាន នគរវត្ត តែងតែនាំមុខគេជានិច្ច
នៅក្នុងសេចក្តីថ្លែងការណ៍មួយកាលពីយប់ថ្ងៃទី 27 ខែមីនា នាយករដ្ឋមន្ត្រីអុីស្រាអែល លោក Netanyahu បាននិយាយថា លោកនឹងពន្យារពេលផែនការកំណែទម្រង់ប្រព័ន្ធតុលាការដែលមានភាពចម្រូងចម្រាសអស់រយៈពេលជាយូរមកហើយនៅក្នុងប្រទេសនេះ។
កាសែត Washington Post បានដកស្រង់សម្តីនាយករដ្ឋមន្ត្រីអុីស្រាអែល Benjamin Netanyahu ដែលនិយាយថា លោកនឹងពន្យារពេលផែនការកំណែទម្រង់ប្រព័ន្ធតុលាការដែលមានភាពចម្រូងចម្រាសជាច្រើនខែ ដែលនាំឱ្យមានការតវ៉ានិងអំពើហិង្សានៅទូទាំងប្រទេសអុីស្រាអែល។
លោក Netanyahu បាននិយាយថា៖ «ដោយការទទួលខុសត្រូវចំពោះប្រទេសជាតិ ដោយចេញពីការចង់រារាំងប្រទេសមិនឱ្យមានការបែកបាក់ ខ្ញុំសូមអំពាវនាវឱ្យពន្យារពេលកំណែទម្រង់ប្រព័ន្ធតុលាការ»។ នាយករដ្ឋមន្ត្រីអុីស្រាអែលបាននិយាយថា ការសម្រេចចិត្តនេះត្រូវបានធ្វើឡើងដោយមានការយល់ព្រមពីសមាជិកសភាភាគច្រើនមកពីក្រុមចម្រុះដែលកំពុងកាន់អំណាចបច្ចុប្បន្ន។
នៅថ្ងៃដដែល លោក Netanyahu បានចុះហត្ថលេខាលើកិច្ចព្រមព្រៀងជាមួយរដ្ឋមន្ត្រីសន្តិសុខជាតិ Itamar Ben-Gvir និងមេដឹកនាំគណបក្ស Otzma Yehudit ដើម្បីផ្អាកផែនការកំណែទម្រង់ប្រព័ន្ធតុលាការ ប៉ុន្តែនាយករដ្ឋមន្ត្រី Netanyahu ក៏ត្រូវតែសន្យាផងដែរក្នុងការនាំយកផែនការនេះទៅបោះឆ្នោតនៅសម័យប្រជុំបន្ទាប់ ដែលគ្រោងធ្វើនៅដើមរដូវក្តៅនេះ។
ផែនការកំណែទម្រង់ប្រព័ន្ធតុលាការត្រូវបានគេរំពឹងថានឹងផ្តល់ឱ្យរដ្ឋាភិបាលរបស់លោក Netanyahu នូវអំណាចកាន់តែច្រើនក្នុងការជ្រើសរើសចៅក្រមនិងការកំណត់អំណាចរបស់តុលាការកំពូល រួមទាំងអ្នកដែលស្តាប់ករណីធ្ងន់ធ្ងរនៅក្នុងប្រទេសអុីស្រាអែលផងដែរ។ នេះបានបង្កើនក្តីបារម្ភថា លោក Netanyahu អាចគេចផុតពីការចោទប្រកាន់ពីអំពើពុករលួយយ៉ាងងាយស្រួល។
មនុស្សជាច្រើនបានតវ៉ាប្រឆាំងនឹងច្បាប់នេះចាប់តាំងពីខែមករាមក។ ភាពតានតឹងបានកើនឡើងនៅពេលដែលនាយករដ្ឋមន្ត្រី Netanyahu បណ្តេញរដ្ឋមន្ត្រីការពារជាតិ Yoav Gallant កាលពីថ្ងៃទី 26 ខែមីនា បន្ទាប់ពី Gallant បានអំពាវនាវឱ្យបញ្ឈប់ច្បាប់កំណែទម្រង់ប្រព័ន្ធតុលាការរហូតដល់ចុងបញ្ចប់នៃទិវាជាតិក្នុងខែមេសា៕
ដោយ៖ ធីរីណា(រូបថត៖ CNN)
