សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ ៖ ក្នុងរយៈពេល២៩ថ្ងៃ ជនពិការភាព ដោយសារមីន និងសំណល់ជាតិផ្ទុះពីសង្គ្រាមចំនួន៦៥០នាក់ នៅក្នុងនិងមកពីបណ្តាខេត្តមួយចំនួនទទួលបានការផ្តល់ជូននូវ ដៃ-ជេីង សិប្បនិម្មិត ពីអាជ្ញាធរមីន (C.M.A.A) និង អង្គការJAIOUFOOT ប្រទេសឥណ្ឌា ក្នុងយុទ្ធនាការ ឥណ្ឌា ដេីម្បីមនុស្សជាតិ ជំរុំផលិតផ្តល់ដៃ ជើង សិប្បនិម្មិតជូនជនពិការភាព។ យុទ្ធនាការ ឥណ្ឌា ដេីម្បីមនុស្សជាតិ ជំរុំផលិតផ្តល់ដៃ ជើង សិប្បនិម្មិតជូនជនពិការភាព រៀបចំឡេីងដោយ អាជ្ញាធរមីន (C.M.A.A) និង អង្គការJAIOUFOOT ប្រទេសឥណ្ឌ ត្រូវបានបិទបញ្ចប់នៅថ្ងៃទី២៩ ខែមិនា ឆ្នាំ២០២៣នេះ។
លោក ព្រំ សុភមង្គល អនុប្រធានអាជ្ញាធរមីន ក៏បានថ្លែងអំណរគុណដល់ប្រទេសឥណ្ឌាដែលបានផ្តល់ជំនួយដៃ ជេីងសិប្បនិម្មិត ជូនដល់ប្រជាជនកម្ពុជា ជាពិសេសខេត្តបន្ទាយមានជ័យ ដែលរងគ្រោះដោយសារគ្រាប់មីនដោយឥតគិតថ្លៃចំនួន៦០០នាក់ ដែលនេះគឺជាការចូលរួមចំណែកយ៉ាងផុសផុលជាមួយ និងរាជរដ្ឋាភិបាលកម្ពុជាក្នុងការរឹតចំណងមិត្តភាពរវាងប្រទេសទាំងពីរឱ្យកាន់តែមានភាពល្អប្រសើរឡើង។
លោក ព្រំ សុភមង្គល បានលេីកឡេីងថា ៖ ក្នុងរយៈពេល ៣០ឆ្នាំ ដោយគិតចាប់ពីឆ្នាំ១៩៩២ មកផ្ទៃដីប្រមាណ ២.៥៥៤ គីឡូម៉ែត្រការ៉េ ត្រូវបានរំដោះក្នុងនោះមីនប្រឆាំងមនុស្សចំនួន ១,១៥៣,២១៧គ្រាប់, មីនប្រឆាំងរថក្រោះចំនួន ២៦,១៣៥គ្រាប់ និងគ្រាប់យុទ្ធភ័ណ្ឌមិនទាន់ផ្ទុះ ៣,០៣៤,៧២៧គ្រាប់ ត្រូវបានរកឃើញ និងបំផ្លាញចោល ដែលបានធ្វើឱ្យចំនួនជនរងគ្រោះថ្នាក់បន្តធ្លាក់ចុះពី ៤.៣២០នាក់ក្នុងឆ្នាំ១៩៩៦ មកនៅក្រោមចំនួន១០០នាក់ ក្នុងមួយឆ្នាំជាមធ្យមក្នុងរយៈពេល១០ឆ្នាំចុងក្រោយ ដោយឡែកក្នុងឆ្នាំ២០២២មានជនរងគ្រោះចំនួន៤១នាក់។ ជាមួយនឹងសមិទ្ធផលដែលយើងសម្រេចបានរយៈពេល៣០ឆ្នាំ កន្លងមកវាពិតជាបានឆ្លុះបញ្ចាំងពីភាពចាស់ទុំនៃវិស័យមីននៅកម្ពុជា ដែលយើងអាចមានសមត្ថភាពក្នុងការចែករំលែកបទពិសោធន៍ ចំណេះដឹង ទៅប្រទេសដែលរងផលប៉ះពាល់ដោយសារមីន និងសំណល់ជាតិផ្ទុះពីសង្គ្រាម ទាំងយន្តការកិច្ចសហប្រតិបត្តិការអន្តរជាតិទ្វេភាគី និងពហុភាគី ជាពិសេសក្រោមឆ័ត្រអង្គការសហប្រជាជាតិ។
យោងតាមរបាយការណ៍របស់ខេត្តបន្ទាយមានជ័យ បានធ្វើការបោសសម្អាតផ្ទៃដីបានចំនួន ២៧៨ គីឡូម៉ែត្រក្រឡា រកឃើញនិងកំទេចមីន ប្រឆាំងមនុស្សចំនួន ២៣១.២១០ គ្រាប់, មីនប្រឆាំងរថក្រោះចំនួន ៤.៤៣៩គ្រាប់ និងសំណល់ជាតិផ្ទុះពី សង្គ្រាមចំនួន ២៥៨.១៩២ គ្រាប់ ហើយអ្នកទទួលផលសរុបចំនួន ២.១១៥.០៤០ នាក់។ បេីគិតពីឆ្នាំ១៩៧៩ ដល់ឆ្នាំ២០២២ ដែលមានរយៈពេល៤៧ឆ្នាំ ខេត្តបន្ទាយមានជ័យមាន ជនរងគ្រោះដោយសារគ្រាប់មីនចំនួន ៨.៨៨៦នាក់ ក្នុងនោះមាន ជនរងគ្រោះដោយសារមីន ៧.១៣៩នាក់ និងជនរងគ្រោះដោយសារសំណល់ជាតិផ្ទុះពីសង្គ្រាមចំនួន ១.៧៤៧នាក់ ជនរងគ្រោះដែលបានស្លាប់បាត់បង់ជីវិតមានចំនួន ២.២៥៥ នាក់ របួស ៥.១៨៩ នាក់ និងពិការ ១.៤៤២ នាក់,ហើយមានជនរងគ្រោះជាបុរស ៧.២២៧ នាក់ ស្ត្រី ៧៣៩ នាក់ កុមារា ៧២៣នាក់ កុមារី ១៨៣ នាក់ និង មិនស្គាល់អត្តសញ្ញាណ១៤នាក៕
ដោយ ៖ វណ្ណា
