សារព័ត៌មាន នគរវត្ត តែងតែនាំមុខគេជានិច្ច
ខេត្តត្បូងឃ្មុំ ៖ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ នៅថ្ងៃទី០២ ខែមេសា ឆ្នាំ២០២៣ បានអញ្ជើញជាអធិបតីដ៏ខ្ពង់ខ្ពស់កាត់ខ្សែបូរឆ្លង និងសម្ពោធមហាចេតិយតម្កល់អដ្ឋិធាតុយុទ្ធជនកងកម្លាំងប្រដាប់អាវុធសាមគ្គីសង្គ្រោះជាតិកម្ពុជាទាំង៤៩រូប ព្រមទាំងដង្ហែអដ្ឋិធាតុយុទ្ធជនទាំង៤៩រូប មកតម្កល់នៅតម្កល់នៅក្នុងមហាចេតិយ នៅតំបន់ប្រវត្តិសាស្ត្រយោធាតេជោកោះថ្ម X16 ស្ថិតក្នុងភូមិកោះថ្ម ឃុំទន្លូង ស្រុកមេមត់ ខេត្តត្បូងឃ្មុំ។នាឱកាសនោះដែរពិក៏បានមានការអញ្ជើញចូលរួមសំណាក់សមាជិកព្រឹទ្ធសភា រដ្ឋសភា សមាជិករាជរដ្ឋាភិបាល ថ្នាក់ដឹកនាំក្រសួងការពារជាតិ អគ្គបញ្ជាការ ព្រមទាំងមន្ត្រីរាជការ និងប្រជាពលរដ្ឋយ៉ាងច្រើនកុះករផងដែរ។
សូមបញ្ជាក់ថា, មហាចេតិយនេះ បានចាប់ផ្តើមសាងសង់កាលពីថ្ងៃទី២០ ខែសីហា ឆ្នាំ២០២២ ក្រោមអធិបតីភាព សម្តេចពិជ័យសេនា ទៀ បាញ់ ឧបនាយករដ្ឋមន្ត្រីរដ្ឋមន្ត្រីក្រសួងការពារជាតិ ។
មហាចេតិយនេះ ត្រូវបានសង់ឡើងនៅតំបន់ប្រវត្តិសាស្ត្រយោធាតេជោកោះថ្ម X16 ក្នុងភូមិកោះថ្ម ឃុំទន្លូង ស្រុកមេមត់ ខេត្តត្បូងឃ្មុំ។
ក្នុងបុព្វហេតុរំដោះជាតិ និងប្រជាជនកម្ពុជាចេញពីរបបប្រល័យពូជសាសន៍ប៉ុលពត កងកម្លាំងប្រដាប់អាវុធសាមគ្គីសង្គ្រោះជាតិ ដែលបង្កើតឡើងដោយសមមិត្ត ហ៊ុន សែន នាថ្ងៃទី១២ ខែឧសភា ឆ្នាំ១៩៧៨ ជាច្រើនរូបបានពលីជីវិត របួស និងពិការ។
ក្នុងនោះមានកងកម្លាំងប្រមាណ ៤៩រូប ដែលបានពលីជីវិតលើសមរភូមិ ហើយរកក្រុមគ្រួសារមិនឃើញ ក៏ត្រូវបានរៀបចំបញ្ចុះនៅបូជនីយដ្ឋានយុទ្ធជនពលីកម្ពុជា ស្ថិតនៅភូមិសួសរ៉ាំ ឃុំឡុងយ៉ាវ ស្រុកកាំមី ខេត្តដុងណាយ (ដូនណៃ) ប្រទេសវៀតណាម។ ខេត្តដុងណាយនេះ គឺជាប់ខាងកើតទីក្រុងហូជីមិញ (ព្រៃនគរ)។
ការសាងសង់មហាចេតិយសម្រាប់តម្កល់អដ្ឋិធាតុយុទ្ធជនកងកម្លាំងប្រដាប់អាវុធសាមគ្គីសង្គ្រោះជាតិកម្ពុជា ត្រូវបានធ្វើឡើងក្រោមការចង្អុលបង្ហាញ និងណែនាំដោយផ្ទាល់ពីសំណាក់សម្តេចតេជោ ហ៊ុន សែន នាយករដ្ឋមន្ត្រីកម្ពុជា។
កាលពីថ្ងៃទី២០ ខែមិថុនា ឆ្នាំ២០២២ ក្នុងឱកាសអញ្ជើញប្រារព្ធខួប៤៥ឆ្នាំនៃទិវាចងចាំដំណើរឆ្ពោះទៅការផ្តួលរំលំរបបប្រល័យពូជសាសន៍ ប៉ុល ពត (២០ មិថុនា ១៩៧៧-២០ មិថុនា ២០២២) សម្តេចតេជោ ហ៊ុន សែន បានណែនាំឱ្យរៀបចំធ្វើមាតុភូមិអដ្ឋិធាតុយុទ្ធជនកងកម្លាំងប្រដាប់អាវុធសាមគ្គីសង្គ្រោះជាតិកម្ពុជាចំនួន ៤៩រូប មកទុកដាក់នៅកម្ពុជា។
សម្តេចតេជោ ហ៊ុន សែន បានគូសបញ្ជាក់នាពេលនោះថា កម្ពុជាមានសុខសន្តិភាព មានលទ្ធភាព ដែលគួរដល់ពេលនាំអដ្ឋិធាតុយុទ្ធជនរំដោះជាតិគ្មានសាច់ញាតិទាំងនោះ ត្រឡប់មកកាន់ទឹកដីកំណើតវិញ។
បន្ទាប់ពីបញ្ចុះលើដីវៀតណាម៤៤ឆ្នាំ អដ្ឋិធាតុយុទ្ធជនកងកម្លាំងប្រដាប់អាវុធសាមគ្គីសង្គ្រោះជាតិកម្ពុជាទាំង ៤៩រូប ត្រូវបានដង្ហែពីវៀតណាម នៅថ្ងៃទី២ ខែវិច្ឆិកា ឆ្នាំ២០២២ ហើយរៀបចំបូជា និងរក្សាទុកបណ្តោះអាសន្ននៅអគារមិត្តភាពនាតំបន់ប្រវត្តិសាស្ត្រយោធាតេជោកោះថ្ម X16 នៅថ្ងៃទី០២ ខែធ្នូ ឆ្នាំ២០២២។
ទន្ទឹមការសម្ពោធឆ្លងមហាចេតិយនោះ អដ្ឋិធាតុយុទ្ធជនកងកម្លាំងប្រដាប់អាវុធសាមគ្គីសង្គ្រោះជាតិកម្ពុជាទាំង ៤៩រូប ដង្ហែចូលតម្កល់ក្នុងមហាចេតិយនៅថ្ងៃទី០២ ខែមេសា ឆ្នាំ២០២៣ ក្រោមអធិបតីភាពសម្តេចពិជ័យសេនា ទៀ បាញ់។
សូមបញ្ជាក់ថា, នៅរសៀលថ្ងៃទី០១ ខែមេសា ឆ្នាំ២០២៣ នាយឧត្តមសេនីយ៍ សៅ សុខា អគ្គមេបញ្ជារងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស រៀបចំពិធីសូត្រមន្តតាមបែបសាសនា មុនធ្វើពិធីសម្ពោធឆ្លង។
ការសាងសង់មហាចេតិយនេះ គឺជាបង្ហាញឱ្យឃើញនូវការនឹករលឹកដល់គុណូបការៈដ៏ធំធេងរបស់យុទ្ធជនពលី ហើយក៏ការរៀបចំទុកដាក់ឱ្យបានសមនឹងគុណបំណាច់របស់ពួកគេចំពោះជាតិមាតុភូមិ៕
ដោយ៖ សហការី
