សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ តារាចម្រៀងស្រីល្បីឈ្មោះ អ្នកនាង ម៉េង កែវពេជ្ជតា ទើបនឹងបង្ហោះសារនិយាយរឿងមិនបានបង្ហាញមុខក្នុងកម្មវិធីអង្គរសង្ក្រាន្ត និងព្រឹត្តិការណ៍បើកប្រគួតកីឡាស៊ីហ្គេម។ តែពេលនេះអ្នកនាង លេចវត្តមាននៅពហុកីឡដ្ឋានមរតកតេជោជាមួយកូនស្រី បណ្តូលចិត្តនិងថតរូបជាមួយ វណ្ណដា និងឡូរ៉ាម៉មដោយថែមទាំងពោលពាក្យសរសើរចំៗមុខទៅកាន់ពួកគេថែមទៀតផង។ ការសរសើរមិនដាច់ពីមាត់នេះត្រូវបានធ្វើឡើងក្រោយពីមុននេះលោកវណ្ណដា ត្រូវអ្នកឧកញ៉ា ឡេងណាវ៉ាត្រា រិះគន់លើចំណុចមួយចំនួន។
ការបញ្ចេញរូបថត និងសំណេរនេះបានធ្វើឲ្យអ្នកគាំទ្ររំភើបចិត្តព្រោះតែគេដឹងថា តារាស្រីល្បីឈ្មោះរូបនេះនឹងបង្ហាញវត្តមានក្នុងព្រឹត្តិការណ៍បើកកីឡាស៊ីហ្គេមលើកទី៣២ ដែលកម្ពុជាធ្វើជាម្ចាស់ផ្ទះនោះជាក់ជាមិនខាន។ នេះគឺជាការបំពេញក្តីបំណងអ្នកគាំទ្រដែលប្រាថ្នាចង់ឃើញវត្តមានសិល្បការិនីឆ្នើមរូបនេះលេចវត្តមានក្នុងកម្មវិធីដែលកម្ពុជាកំពុងតែត្រៀមបង្អួតមុខមាត់ និងជាមោទកភាពក្នុងនាមជាប្រជាពលរដ្ឋខ្មែរ ដែលបានទន្ទឹងរង់ចាំពេលវេលាជាច្រើនទសវត្សរ៍មកហើយនោះ។ អ្នកនាងបានបញ្ចេញសារនៅលើបណ្តាញសង្គមមុននេះថា”និស្ស័យឲ្យច្បាស់ក្រឡែត ប្អូនវណ្ណដា និងប្អូនស្រីឡូរ៉ា អ្នកទាំងពីរពិតជាគួរឲ្យស្រលាញ់រហូតមក ភ្ជាប់ដោយសារនេះគឺជារូបថតអ្នកនាងជាមួយនឹងកូនស្រីបណ្តូលចិត្ត និងតារាចម្រៀងទាំងពីររូប។ បន្ថែមលើនេះអ្នកនាង បានទាំងបញ្ចេញសារថ្មីចុងក្រោយបន្ថែមទៀតដោយបានលើកសរសើរពីវណ្ណដាថា Vanda ជាតារាចម្រៀងយុវវ័យល្បីខ្លាំងផ្នែក Rap ។ ក្រៅពីមានទេពកោសល្យល្អផ្តាច់ហើយ គាត់នៅមានអត្តចរិតថ្លៃថ្នូរ ចេះដាក់ខ្លួន មិនឆ្មើង មិនរើសអើង មិនក្រអឺតក្រទម ។ ចំណុចសំខាន់មួយទៀតគឺគាត់ចេះនឹកឃេីញលេីកស្ទួយវប្បធម៌ខ្មែរ និងសិល្បករបុរាណចាស់ៗ ។ ទាំងនេះគ្រប់គ្រាន់អោយខ្ញុំ និងអ្នកផ្សេងសរសើរបានហើយ អ្នកគាំទ្របានបង្ហាញអារម្មណ៍រីករាយរំភើបនឹងការលេចវត្តមាននៅពេលនេះ ដែលក្នុងនោះអ្នកនាងក៏បានសរសើរពីទេពកោសល្យរ៉េបរបស់វណ្ណដាដែរថាតារាចម្រៀងរូបនេះធ្វើបានល្អ សូម្បីតែកូនស្រីរបស់អ្នកនាងក៏ពេញចិត្តនឹងសមត្ថភាពទេពកោសល្យរបស់វណ្ណដា ដែរ។អ្នកគាំទ្រសប្បាយចិត្តដែលបុគ្គលល្បីឈ្មោះមានសមត្ថភាពលេចវត្តមានក្នុងព្រឹត្តិការណ៍ដ៏សម្បើមមួយនេះ រហូតអ្នកខ្លះស្នើឲ្យពួកគាត់មានស្នាដៃសិល្បៈរួមគ្នាថែមទៀតផង។
គេនៅមិនទាន់បានដឹងនៅឡើយទេថាតើពួកគាត់នឹងបង្ហាញស្នាដៃសិល្បៈអ្វីខ្លះដើម្បីបង្ហាញទៅកាន់ទស្សនិកជនក្នុងប្រទេស និងជុំវិញពិភពលោកដែលបាននិងកំពុងចាប់អារម្មណ៍ និងទន្ទឹងរង់ចាំទស្សនាបើក និងបិទព្រឹត្តិការណ៍ស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២។ អ្វីដែលជាការចាប់អារម្មណ៍ផងដែរនោះគឺគេសង្កេតឃើញសិល្បករជាច្រើន រួមទាំងផលិតកម្មធំៗក្នុងស្រុកជាច្រើនបានបញ្ចេញស្នាដៃសិល្បៈរបស់ខ្លួនដើម្បីចូលរួមអបអរសាទរក្នុងឱកាសពិសេសខាងលើនេះផងដែរ។ អ្វីដែលធ្វើឲ្យគេកោតសរសើរនោះគឺអ្នកនាងម៉េង កែវពេជ្ជតា បានស្រូតរូតរះពីការចេញទៅកម្សាន្តនៅលើទឹកដីនៃប្រទេសបារាំងដើម្បីមកចូលរួមព្រឹត្តិការណ៍នេះទាន់ពេលវេលាផងដែរ៕
ដោយ ៖ វឌ្ឍនា
