ព័ត៌មានទាន់ហេតុការណ៍៖

វិភាគអន្តរជាតិ៖ ពូទីន៖ គ្មានអ្នកណាម្នាក់នៅរស់ឡើយ បើសង្គ្រាមរវាងអាមេរិកនឹងរុស្ស៊ីផ្ទុះឡើង

ចែករំលែក៖

នៅក្នុងបទសម្ភាសន៍ជាមួយ លោក Oliver Stone អ្នកដឹកនាំកម្មវិធីដ៏ល្បីរបស់អាមេរិក ប្រធានាធិបតីពូទីនបានបញ្ជាក់ថា បើសង្គ្រាមរវាងអាមេរិកនឹងរុស្ស៊ី អាចផ្ទុះ ឡើងនោះ គឺគ្មានអ្នកណាម្នាក់នៅរស់ ឡើយ។

លោកពូទីន បានឆ្លើយនឹងសំណួរស្តីពីសង្គ្រាមរវាងប្រទេសមហាអំណាច យោធាទាំងពីរដែលនឹងអាចផ្ទុះឡើងពេលនោះលោកពូទីន បានលើកឡើងថា«ខ្ញុំគិតថា គ្មានអ្នកណាអាចនៅរស់ឡើយក្នុងសង្គ្រាមបែបនេះ»។ លោកពូទីនបន្តទៀតថាសម្ពន្ធមិត្តយោធាណាតូ កំពុងស្វែងរកសត្រូវ ដើម្បីភាពស្ថិតស្ថេររបស់ ខ្លួន។ បើណាតូ​គ្មានសត្រូវទេ នឹងត្រូវរលាយបែកខ្ញែកគ្នា មិនខានឡើយ។

ទាំងនោះហើយបានជាណាតូ ធ្វើ ​ សកម្មភាពចាត់ទុកភាគីណាមួយជាសត្រូវ ទើបណាតូអាចបន្តឈរជើងបាន ហើយ សត្រូវដែលណាតូ សំដៅនាពេលនេះគឺ​រុស្ស៊ី។ បើទោះបីបែបណាក្តី លោកពូទីន​សង្ឃឹមថា ទំនាក់ទំនងរវាងអាមេរិកនឹងរុស្ស៊ីនិងល្អប្រសើរឡើង មិនឈានទៅរក សង្គ្រាម​នោះឡើយ។

លោកពូទីន បានឆ្លើយនូវសំណួរ របស់​លោក Oliver Stone នៅថ្ងៃទី៦ខែ មិថុនា ថា« ខ្ញុំសង្ឃឹម ហើយតែងតែសង្ឃឹមរហូត ដល់ថ្ងៃស្លាប់ យើងនឹងមានទំនាក់ទំនងល្អ​នឹងគ្នា។ នៅក្នុងបទសម្ភាសន៍នោះមាន៤ផ្នែកផ្សេងគ្នា នឹងត្រូវផ្សាយនៅលើកញ្ចក់ទូរទស្សន៍ អាមេរិកនាថ្ងៃទី១២និង១៥ ខែ មិថុនាខាងមុខ។

ការលើកឡើងរបស់លោកពូទីន គឺជា រឿងសមហេតុសមផល បើសង្គ្រាមរវាង អាមេរិកនឹងរុស្ស៊ីផ្ទុះឡើង ប្រជាពលរដ្ឋ ​ ប្រទេសទាំង២ពិបាកក្នុងការរក្សាជីវិតណាស់ ទាំងប្រទេសដទៃទៀតនៅលើពិភពលោក ដោយសារតែប្រទេសទាំងពីរ មានអាវុធ​ទំនើបៗជាច្រើន ពិសេសគឺគ្រាប់បែក​បរមាណូ។ បើសរុបអាវុធបរមាណូរបស់អាមេរិកនិងរុស្ស៊ី គឺអាចបំផ្លាញភពផែន ដីនេះទាំងមូល ឲ្យទៅជាភពវាលរហោឋានគ្មានមនុស្សរស់នៅ។

នៅពេលនេះបើទោះបីមានការប្រឈមមុខតានតឹងដាក់គ្នាក្តី តែអាមេរិក និងរុស្ស៊ីខិតខំបញ្ចៀសសង្គ្រាមមិនឲ្យកើតឡើង រវាងប្រទេសទាំងពីរ ដេលអាចបំផ្លាញ គ្រប់យ៉ាង ។ ក្រុមអ្នកវិភាគបានលើក ឡើងថា ទាំងរុស្ស៊ីនិងអាមេរិក បើមាន សង្គ្រាមនោះ គ្មានប្រទេសណាមួយព្រមចុះ ចាញ់ឡើយ បើទោះបីខ្លួនត្រូវរលាយក្តី។

គេគិតថាបើទោះបីប្រទេសទាំងពីរខិតខំបញ្ចៀសសង្គ្រាមក៏ដោយ ក៏ប្រទេសទាំងពីរបានត្រៀមលក្ខណៈរួចរាល់សម្រាប់ សង្គ្រាមជាទ្រង់ទ្រាយធំ ហើយបើប្រទេស ១ក្នុងចំណោមពីរមិនត្រៀមលក្ខណៈ ទេ​នោះគឺប្រាកដជាចាញ់មិនខាន។ កន្លង​មកមេដឹកនាំរុស្ស៊ីបានបញ្ជាក់ថា មីស៊ីល ការពារ របស់អាមេរិក ដាក់នៅគ្រប់ទិសទីជុំវិញពិភពលោកនោះ មិនមែនសំដៅ ទៅលើ កូរ៉េខាងជើងនោះឡើយ គឺសំដៅ ទៅលើរុស្ស៊ីទៅវិញទេ។

ចំណែករុស្ស៊ីក៏មិននៅស្ងៀមដែរកាលពីប៉ុន្មានថ្ងៃមុន ប្រព័ន្ធផ្សព្វផ្សាយលោកខាងលិចបានផ្សាយថា រុស្ស៊ីបានបញ្ជូនកាំជ្រួច​មីស៊ីល ទៅកាន់ព្រំដែនជាប់ប្រទេស ប៉ូឡូញ និង Lithuania ដូចជាការត្រៀម លក្ខណៈធ្វើសង្គ្រាមជាមួយប្រទេសតំបន់អឺរ៉ុប។

ក្រោយពីមានការប្រឈម មុខតានតឹង​ដាក់ គ្នាជាមួយអាមេរិកនិងណាតូក៏ដូចជាការមិន ចុះសម្រុងនឹងគ្នាក្នុងការស្វែងរក ដំណោះស្រាយបញ្ចប់សង្គ្រាមនៅក្នុង​ប្រទេសស៊ីរី។ រុស្ស៊ីបានត្រៀមលក្ខណៈរួចជាស្រេចក្នុងការធ្វើសង្គ្រាមទ្រង់ទ្រាយធំជាមួយលោកខាងលិច។

កន្លងមកថ្មីៗក្រសួងការពារជាតិរុស្ស៊ីបាន​ថ្លែងបញ្ជាក់ពីការបញ្ជូនប្រព័ន្ធមីស៊ីល ធុន Iskander-M ទៅប្រចាំការបន្ថែមទៀតនៅលើដែនដីខេត្ត Kaliningrad ជាខេត្តនៅប៉ែកខាងលិចបង្អស់នៃសហព័ន្ធរុស្ស៊ីនៅជាប់នឹងព្រំដែនប៉ូឡូញ និងលីទុយ អានី។ ក្រសួងយោធារុស្ស៊ីគូសបញ្ជាក់ថា ការបញ្ជូនប្រព័ន្ធមីសុីលទៅនេះគឺក្នុងក្របខ័ណ្ឌនៃលំហាត់សឹក។

មូលហេតុនៃការបញ្ជាក់នេះមកពីមួយថ្ងៃមុនប្រព័ន្ធផ្សព្វផ្សាយលោកខាងលិចខ្លះមាន Reuters និងកាសែតអង់គ្លេស The Guardian យោងទៅលើប្រភពពីអេស្តូនីបាននាំគ្នាផ្សាយថា មីស៊ីលធុន Iskander-M ដែលដឹកទៅនោះគឺតាមកប៉ាល់ចេញពីកំពុងផែក្រុង Siant -Petersbourg ។ ម៉្លោះហើយបានជាកាលពីពេលកន្លងទៅដោយថ្លែងទៅពួកអ្នកកាសែត តំណាងផ្លូវការនៃក្រសួងការពារជាតិរុស្ស៊ី លោកឧត្តមសេនីយ៍ទោ Igor Kona- shenkovបាននិយាយ លម្អិតថា កងទ័ពរុស្ស៊ីដែលធ្លាប់បានបញ្ជូនមីស៊ីលបែបនេះមិនតិចដងទេ ទៅកាន់តំបន់ Kaliningrad ហើយនឹងបន្តបញ្ជូនវាតទៅទៀតទាំងក្នុងអនាគតដើម្បីឲ្យសមទៅនឹងតម្រូវការសម្រាប់ធ្វើលំហាត់សឹក។

Iskander-M ជាមីស៊ីលចល័តហើយក្នុង ក្របខ័ណ្ឌនៃផែនការខាងត្រៀមប្រយុទ្ធ​អង្គភាព ទ័ពមីស៊ីល២៤ម៉ោងលើ២៤ម៉ោង តែងតែ បោះពួយឆ្លងកាត់លំហល្ហល្ហេវនៃសហព័ន្ធរុស្ស៊ីទាំងតាមផ្លូវអាកាសទាំងតាមផ្លូវទឹក និងទាំងតាមផ្លូវគោកដោយវិធីខ្លួន ឯង។

ឧត្តមសេនីយ៍តំណាងឲ្យក្រសួងការពារជាតិ រុស្ស៊ីថែមទាំងបង្ហើបឲ្យដឹងពីចំណុច រសើបមួយទៅផងគឺថា ការដឹកមីស៊ីល Iskander លើកនេះត្រូវរុស្ស៊ីធ្វើដោយចំហដោយចេតនាគឺបញ្ចេញរូបរាងវាយ៉ាង សម្ញែងនៅលើក ប៉ាល់ឈ្មោះ Ambal ដែលដឹកវាគ្រាន់តែជានុយទាក់ភ្នែកផ្កាយរណបអាមេរិកាំង ហើយ មិនយូរប៉ុន្មានក៏មានផ្កាយរណបឈ្លបយកការណ៍អាមេរិកាំងហោះកាត់ពីលើថតមីស៊ីលនោះមែន។ ហេតុដែលអនុញ្ញាតឲ្យភាគីរុស្ស៊ីបកអាក្រាតពីប្រតិ បត្តិការបំពេញដោយផ្កាយ រណបអាមេរិកាំង រួចកំណត់បានយ៉ាងទៀងទាត់អំពីកម្ពស់ហោះ និងផ្លូវហោះរបស់វានៅ ពីលើដែន ដីរុស្ស៊ី ។

ពិតជាយោងលើទិន្នន័យផ្តល់ដោយ ផ្កាយ រណបរបស់ខ្លួនដែលបណ្តាញឈ្លបយកការណ៍អាមេរិកាំងកាលពីថ្ងៃកន្លងទៅបានទម្លាយដំណឹងថា រុស្ស៊ី ចាប់ផ្តើមដឹក មីស៊ីល Iskander ទៅកាន់ខេត្ត Kaliningrad ។ មូស្គូធ្លាប់បានឲ្យដឹងថា មីស៊ីលនេះអាចជាប្រតិកម្មទល់នឹងបក្សសម្ព័ន្ធ អូតង់ដែលនៅតែបន្តដំឡើងខែលមីស៊ីលប្រឆាំងមីស៊ីលនៅលើដែនដីប៉ូឡូញជា ខែលដែលរុស្ស៊ីចាត់ទុកជាគ្រោះថ្នាក់ឥតប្រកែកបានដល់សន្តិសុខជាតិរបស់ខ្លួន។

កន្លងមកមានសេចក្តីប្រកាសមួយបង្កឲ្យមានការព្រួយបារម្ភយ៉ាង ខ្លាំងពីប្រជា ពល រដ្ឋដោយបានបញ្ជាក់ថា សង្គ្រាម​នុយក្លេអ៊ែរ នឹងកើតឡើងក្នុងពេលឆាប់ៗ។

ការប្រកាស ខាងលើស្របពេលដែល ភាពតានតឹង​កំពុង តែកើនខ្លាំងឡើងនៅ​មជ្ឈិមបូព៌ា។

យោងតាមប្រភពព័ត៌មានពី Metro ប្រធានាធិបតីរុស្ស៊ីលោក វ្ល៉ាឌីមៀរ ពូទីន កាលពីថ្ងៃចន្ទបានស្នើច្បាប់ព្យួរកិច្ចព្រម ព្រៀងទីក្រុងមូស្គូ-ក្រុងវ៉ាស៊ីនតោន ចំពោះ ការបោះបង់ចោលនូវលោហធាតុសម្រាប់ផលិតអាវុធនុយក្លេអ៊ែរ។

មន្ត្រីរុស្ស៊ីបាននិយាយកាលពីថ្ងៃសុក្រថា ជម្រកក្រោមដីត្រូវបានគេសាងសង់ រួចរាល់ហើយដែលវាអាចផ្តល់ទីលំនៅដល់ មនុស្សចំនួន១២លាននាក់ដែលនេះគឺល្មម គ្រប់គ្រាន់សម្រាប់ចំនួនប្រជាជននៅក្នុង ទីក្រុងមូស្គូទាំងអស់។

សមាគមគ្រប់គ្រងកងទ័ព Arms Control Association បាននិយាយថា សហរដ្ឋ អាមេរិក និងរុស្ស៊ីនៅតែបន្តបញ្ជូនគ្រាប់យុទ្ធ សាស្ត្រច្រើនជាង១.៥០០គ្រាប់តាមយន្តហោះទម្លាក់គ្រាប់បែកពីរបីរយគ្រឿង និង គ្រាប់មីស៊ីលដែលច្រើនជាងការចាំបាច់ឆ្ងាយណាស់ដើម្បីទប់ស្កាត់ការវាយប្រហារដោយ អាវុធនុយក្លេអ៊ែរ ហើយម្យ៉ាងទៀតនោះពួក គេកំពុងតែធ្វើប្រព័ន្ធដឹកជញ្ជូនអាវុធនុយក្លេអ៊ែរឲ្យកាន់តែទំនើបខ្លាំងឡើង។

កន្លងមកប្រធានាធិបតីរុស្ស៊ីលោក ពូទីន បានបង្កឲ្យពិភពលោកកាន់តែព្រួយបារម្ភ ដោយយល់ថា ប្រទេសនេះបានត្រៀម លក្ខណៈធ្វើសង្គ្រាមលោកលើកទី៣ដោយប្រទេសនេះបានចាប់ផ្តើមធ្វើលំហាត់សមជម្លៀសពលរដ្ឋជាង៤០លាននាក់នៅទូទាំងប្រទេសចាប់ពីថ្ងៃទី៤ ខែតុលា ឆ្នាំ២០១៦៕ ម៉ែវ សាធី


ចែករំលែក៖