អ្នកចម្រៀងច្រៀងតាមភ្លើងស្តុបម្នាក់ធ្លាប់ ច្រៀងរកប្រាក់ជួយសង្គម ប៉ុន្តែពេលនេះធ្លាក់ខ្លួនឈឺធ្ងន់គ្មានប្រាក់ព្យាបាល

ភ្នំពេញ៖  លោក មាន សិរីវិចិត្រ ធ្លាប់ត្រូវបានគេឃើញច្រៀងតាមភ្លើងស្តុបមួយចំនួនមិនខ្លាចក្តៅ រងាដើម្បីស្វែងរកថវិកាជួយដល់កិច្ចការងារសង្គមទាំងជួយដល់មន្ទីរពេត្យ ក្មេងកំព្រា ចាស់ជរា និងជនទីទ័លក្រផ្សេងៗ។ ស្រាប់តែពេលនេះធ្លាក់ខ្លួនឈឺជំងឺមួយចំនួនគ្មានលទ្ធភាពព្យាបាលឡើយ។ 

លោក មាន សិរីវិចិត្រ ធ្លាប់ទាំងដឹកនាំអ្នកចម្រៀងមួយចំនួនច្រៀងនៅតំបន់ភ្លើងស្តុបក្បាលថ្នល់ ស្តុបផ្សារជម្ពូវ័ន រយៈពេលជិត១០ឆ្នាំមកហើយ ហើយក៏បានលេចមុខក្នុងការងារមនុស្សធម៌ជាច្រើនផងដែរ។ លោកបានលើកឡើងប្រាប់សារព័ត៌មានយើងថា បច្ចុប្បន្នលោកមានជំងឺរលាកតម្រងនោម  ក្រពះ អាលែកហ្ស៊ីបំពង់ក ដែលត្រូវការការព្យាបាលជាបន្ទាន់ និងសម្រាកពីការងារច្រៀងមួយរយៈ។ លោកថា លោកបានទៅព្យាបាលនៅមន្ទីរពេទ្យមួយរយៈខ្លី ប៉ុន្តែដោយគ្មានលទ្ធភាពលោកបានសម្រេចចិត្តចាកចេញពីមន្ទីរពេទ្យដើម្បីមើលថែជំងឺនៅផ្ទះ។ លោកថា ចំណាយនៅមន្ទីរពេទ្យត្រូវចាយខ្ទង់រយដុល្លារអាមេរិក ដូចនេះលោកគ្មានលទ្ធភាពទេ មានតែទិញថ្នាំខ្លះ ទ្រាំឈឺនៅផ្ទះ ហើយមុននេះមិត្តភក្កិក៏បានមកសាកសួរសុខទុក្ខនៅផ្ទះខ្លះដែរ។ លោកថាអាការៈឈឺចុកឆ្អល់ពោះជាប្រចាំ ក្អកខ្លាំង ពេលខ្លះចេញឈាម ហើយវេជ្ជបណ្ឌិតតម្រូវឱ្យលោកសម្រាកព្យាបាលរយៈពេលយូរបន្តិចនិងតាមដានបន្តដើម្បីកុំឲ្យស្ថានភាពជំងឺកាន់តែធ្ងន់ធ្ងរពិបាកព្យាបាល។ លោកថា ដោយសារតែជំងឺប្រចាំកាយធ្វើទុក្ខក្នុងរយៈពេលមួយសប្តាហ៍កន្លងមកនេះលោកបានសម្រេចចិត្តលក់របស់ទ្រព្យប្រចាំខ្លួនគ្មានសល់សូម្បីតែម៉ូតូដែលជិះរាល់ថ្ងៃក៏បញ្ចាំគេដើម្បីព្យាបាលជំងឺដែរ ដែលពេលនេះអាចទាល់មានតែកាត់កេរ្តិ៍ខ្មាសស្នើសុំការសន្តោសប្រណីពីទស្សនិកជនតែប៉ុណ្ណោះ សង្ឃឹមថាពុកម៉ែបងប្អុនមិនប្រកាន់និងអធ្យាស្រ័យ។ លោកថាមិនតូចចិត្តទេដែលខិតខំបំពេញការងារសង្គមដែលខ្លួនស្រលាញ់ចូលចិត្ត ហើយបើទោះបីជាពេលនេះធ្លាក់ខ្លួនឈឺគ្មានលទ្ធភាពព្យាបាលជំងឺបន្ត ប៉ុន្តែលោកនៅតែសង្ឃឹមថាស្ថានភាពជំងឺរបស់លោកនឹងប្រសើរ និងមានលទ្ធភាពជួយដល់កិច្ចការងារសង្គមបន្តទៀត។ 

សម្រាប់ទស្សនិកជនដែលអាណិតចំពោះលោក មាន សិរីវិចិត្រ អាចធ្វើការទំនាក់ទំនងទៅកាន់លោកដោយផ្ទាល់តាមរយៈហ្វេសប៊ុកលោកផ្ទាល់ ឈ្មោះជាភាសាខ្មែរ មាន សិរីវិចិត្រ ឬ លេខទូរស័ព្ទ093641931/0882723800 ឬផ្តល់ថវិកាសម្រាប់គាត់តាមរយៈលេខគណនីយធនាគារABA004150678៕ 

ដោយ ៖ វឌ្ឍនា