សារព័ត៌មាន នគរវត្ត តែងតែនាំមុខគេជានិច្ច
ខ្សែការពារស្លាបឆ្វេងសញ្ជាតិអេស្ប៉ាញ Jordi Alba នឹងចាកចេញពីក្លិប Barcelona នៅរដូវក្តៅនេះ បន្ទាប់ពីក្លិបម្ចាស់ជើងឯកអេស្ប៉ាញមួយនេះយល់ព្រមបញ្ចប់កិច្ចសន្យារបស់គាត់នៅដើមរដូវកាល។
Alba វ័យ៣៤ឆ្នាំបានចូលរួមជាមួយក្លិបក្នុងឆ្នាំ២០១២ ពីក្លិប Valencia ហើយបានជួយក្រុមឈ្នះពានរង្វាន់ La Liga ៦ដង, ពានរង្វាន់ Copa del Rey ៥ដង និង Champions League ក្នុងឆ្នាំ២០១៥។ គាត់បានបង្ហាញខ្លួន៤៥៨លើកសម្រាប់ក្លិប Barcelona រួមទាំង២៩នៅរដូវកាលនេះ ខណៈដែល Barcelona ឈ្នះ La Liga។ Alba គឺជាកីឡាករទី២ដែលចូលរួមជាមួយប្រធានក្រុម Sergio Busquets ក្នុងការចាកចេញនៅរដូវក្តៅនេះ។
សេចក្តីថ្លែងការណ៍មួយនៅលើគេហទំព័ររបស់ក្លិប Barcelona បានឲ្យដឹងថា “FC Barcelona សូមថ្លែងអំណរគុណជាសាធារណៈចំពោះ Alba សម្រាប់វិជ្ជាជីវៈ ការប្តេជ្ញាចិត្ត និងការលះបង់របស់គាត់ និងទំនាក់ទំនងដ៏វិជ្ជមាន និងមិត្តភាពរបស់គាត់ជាមួយសមាជិកទាំងអស់នៃគ្រួសារ Barcelona ហើយសូមជូនពរគាត់ឱ្យជួបតែសំណាងល្អនៅក្នុងជីវិត។Barcelona នឹងក្លាយជាផ្ទះសម្រាប់អ្នកជានិច្ច Jordi!”។
ការសម្រេចចិត្តនេះធ្វើឡើងនៅពេលក្លិប Barcelona កែទម្រង់ក្រុមរបស់ខ្លួនឡើងវិញដើម្បីបំពេញតាមច្បាប់លេងដោយយុត្តិធម៌ហិរញ្ញវត្ថុរបស់ La Liga។
មុនពេលរដូវកាលបច្ចុប្បន្ន ក្លិបបានលក់ភាគហ៊ុននៃសិទ្ធិទូរទស្សន៍នាពេលអនាគតរបស់ពួកគេ និងអង្គភាពផលិតប្រព័ន្ធផ្សព្វផ្សាយរបស់ពួកគេ BarcaStudios ដើម្បីអនុញ្ញាតឱ្យពួកគេចុះឈ្មោះកីឡាករថ្មីចំនួន៤នាក់។បន្ទាប់មកក្លិបត្រូវដកកីឡាករបន្ថែមទៀត ដើម្បីអនុញ្ញាតឱ្យមានថវិកាដើម្បីទិញខ្សែការពារបារាំង Jules Kounde ដែលបានចុះហត្ថលេខាពី Sevilla ៕
ដោយ៖ ភារៈ(រូបភាព ៖ BBC Sport)
