សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យោងតាមរបាយការណ៍របស់សហព័ន្ធស្រូវអង្ករកម្ពុជា បានបញ្ជាក់ថា ៖ ចិន គឺជាប្រទេសទិញអង្ករធំជាងគេរបស់កម្ពុជា ខណៈប្រទេសមួយនេះកំពុងសហការជាមួយក្រុមហ៊ុនលក់ទំនិញអនឡាញ Alibaba ដេីម្បីពង្រីកទីផ្សារអង្ករនៅប្រទេសចិន។
សហព័ន្ធស្រូវអង្ករកម្ពុជា បានឱ្យដឹងទៀតថា សហព័ន្ធស្រូវអង្ករ បានប្រជុំជាមួយតំណាងក្រុមហ៊ុន Alibaba កញ្ញា Jiali Pan នាយកផ្នែកកិច្ចការសាធារណៈ និងលោក ឆាយ ម៉េង អ្នកគ្រប់គ្រងផ្នែកប្រតិបត្តិ នៃក្រុមហ៊ុនអាលីបាបា (Alibaba) ដើម្បីពិភាក្សាអំពីការនាំចេញ និងដាក់លក់អង្ករកម្ពុជានៅអាលីបាបា និងទីផ្សារផ្សេងៗទៀតដែលពាក់ព័ន្ធទៅនឹងគេហទំព័រពាណិជ្ជកម្មអេឡិចត្រូនិចដ៏ល្បីរបស់ប្រទេសចិនមួយនេះ។ នេះបើតាមលោក លន់ យ៉េង អគ្គលេខាធិការរបស់សហព័ន្ធស្រូវអង្ករកម្ពុជា។
ជាមួយគ្នានេះ តាមការលើកឡើងរបស់លោក លន់ យ៉េង នៅថ្ងៃទីចន្ទទី១០ ខែកក្កដា ឆ្នាំ២០២៣នេះថា៖ ភាគីទាំងពីរ សម្រេចថា នឹងពិនិត្យការងាររួមគ្នា លើការជំរុញ ផ្សព្វផ្សាយឱុ្យបានកាន់តែទូលំទូលាយ លើប្រភេទអង្កររបស់កម្ពុជា ឱ្យមានការចាប់អារម្មណ៍នៅប្រទេសចិន។ លោកបន្តថា តាមរយៈការពិភាក្សាគ្នានេះ ភាគីទាំងពីរ ក៏នឹងពិនិត្យលើការធ្វើផ្សព្វផ្សាយរួមគ្នានាពេលខាងមុខ និងភាគីនាំចូលអង្កររបស់កម្ពុជា នៅប្រទេសចិន ទាក់ទងនឹងការស្តុងអង្ករផ្គត់ផ្គង់នៅប្រទេសចិន។
របាយការណ៍ពីសហព័ន្ធស្រូវអង្ករកម្ពុជា បានគូសបញ្ជាក់ថា៖ កម្ពុជា នៅឆមាសទី១ នៃឆ្នាំ២០២៣នេះ បានសម្រេចការនាំចេញអង្ករបានជិត ៥០ភាគរយ នៃផែនការ ៧០ម៉ឺនតោន ពោលគឺសម្រេចបានចំនួន ៣៣ម៉ឺនតោន ដែលគិតជាទឹកប្រាក់មានចំនួន ២២៩ លានដុល្លារសហរដ្ឋអាមេរិក។
គួរបញ្ជាក់ថា បច្ចុប្បន្ន កម្ពុជានាំចេញអង្ករទៅប្រទេសចិន ក្រោមកូតា៤០ម៉ឺនតោន។ ក្រៅពីអង្ករ កម្ពុជា ក៏នាំចេញផងដែរ នូវកសិផលច្រើនមុខទៀត ដូចជា ស្វាយស្រស់ ចេកស្រស់ ដំឡូងមីចំណិត ផ្លែមៀនប៉ៃលិន ជាដើម៕
ដោយ៖ សហការី(រូបភាព៖ ឯកសារ)
