សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បានបេីករថយន្តស្ទូចមួយគ្រឿងក្នុងល្បឿនលឿននិងមិនប្រយ័ត្នបានជ្រុលទៅបុករថយន្តកូរ៉េចតនៅចិញ្ចើមផ្លូវចំពីក្រោយពេញទំហឹងប៉ើងធ្លាក់ចូលក្នុងប្រឡាយ រីឯរថយន្តបង្ករេចង្កូតទៅបុកសួនច្បារពុះចែកទ្រូងផ្លូវកល់ជាប់ទៅមុខលែងរួច ។
ករណីគ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង១១និង ១៥នាទីយប់ថ្ងៃទី១៨ ខែកក្កដា ឆ្នាំ ២០២៣ ស្ថិតនៅតាមបណ្តោយផ្លូវជាតិលេខ៣ ក្នុងសង្កាត់ពងទឹក ខណ្ឌដង្កោ ។
យោងតាមប្រភពពីប្រជាពលរដ្ឋដែលរស់នៅក្បែរកន្លែងកើតហេតុបានប្រាប់ឱ្យដឹងថា មុនពេលកើតហេតុនោះពួកគាត់បានឃើញរថយន្តកូរ៉េ ក្បាលពណ៌ខៀវ មួយគ្រឿងមិនមានស្លាកលេខបើកបរដោយបុរសម្នាក់យកមកចតនៅប្របចិញ្ចើមផ្លូវជាតិលេខ៣ ដោយរថយន្តនោះបានបែកកង់ទៅមុខមិនរួច។លុះក្រោយមកស្រាប់តែមានរថយន្តស្ទូចមួយគ្រឿងក្បាលពណ៌ស ពាក់ផ្លាកលេខ ភ្នំពេញ 3E-5545 បើកបរដោយបុរសម្នាក់ធ្វើដំណើរតាមបណ្តោយផ្លូវជាតិលេខ៣ក្នុងទិសដៅពីលិចទៅកើតដោយល្បឿនយ៉ាងលឿន ខណៈមកដល់ចំណុចកើតហេតុស្រាប់តែរេចង្កូតទៅខាងស្តាំដៃបុកពីក្រោយរថយន្តកូរ៉េពេញទំហឹងប៉ើងធ្លាក់ចូលប្រឡាយផ្លូវខូចខាតយ៉ាងដំណំ ចំណែករថយន្តបង្កបានរេចង្កូតទៅបុកសួនច្បារពុះចែកទ្រូងផ្លូវកល់ទៅមុខលែងរួច តែសំណាងល្អក្នុងហេតុការណ៍គ្រោះថ្នាក់ចរាចរណ៍នេះមិនបណ្ដាលឱ្យមានមនុស្សរងរបួសនោះទេ ។
ក្រោយកេីតហេតុភ្លាមៗ តៃកុងរថយន្តបង្កបានបើកទ្វារចុះរត់គេចខ្លួនបាត់ស្រមោលដោយបន្សល់ទុកតែរថយន្តនៅកន្លែងកើតហេតុ។ បន្ទាប់មកសមត្ថកិច្ចមូលដ្ឋានប៉ុស្តិ៍នគរបាលរដ្ឋបាលសង្កាត់ពងទឹកបានចុះមកដល់ រួចក៏ទំនាក់ទំនងទៅផ្នែកជំនាញចរាចរណ៍ឱ្យចុះមកធ្វេីការវាស់វែងយករថយន្តទាំងពីរគ្រឿងទៅរក្សាទុកនៅការិយាល័យចរាចរណ៍ជំនាញផ្លូវគោកនៃស្នងការដ្ឋាននគរបាលរាជធានីភ្នំពេញ ដេីម្បីដោះស្រាយគ្នាតាមនីតិវិធី៕
ដោយ ៖ ភារ៉ា ដង្កោ
